Nao tapa phà Châu Giang (ban Châu Đốc, tỉnh An Giang) lac mai tal dua palei Cam Phú Hiệp saong Châu Phong (ban sit Tân Châu, tỉnh An Giang). Dom thun jaik di ini, bruk manyim khan bai meng kan di urang bangsa Cam di xã Châu Phong hu jeng lac labik mai tal bhian randap di tuai damuai grauk labik.

Ong Mohamad, daok di palei Phũm Xoài, xã Châu Phong brei thau: langiu di 2 janih pandap meng kan lac xarông saong khan kama, labik ini daok hu ngak dom pandap bahrau, yau ye kadung teik, ba lô, ta-mo, móc khóa… Ini lac dom pandap hu tuai biak takre, abih di nyu nan lac tuai negar langiu blei ngak pandap lưu niệm dalam yaok mbang nao ma-in vaih tame rivang iek palei ngak. Yaom dom pandap ini jeng biak lap. Meng 20.000 - 200.000 đồng sa pandap.

Saai Trần Kim Huệ (daok di ban raya Hồ Chí Minh) tuai mai rivang iek palei manyim khan bai Châu Giang di urang Cam Châu Phong brei thau: “ini lac sa mbang nao ma-in biak kanal hadar. Dahlak ka oh sahaneng lac nao ravang iek palei ngak bo nyu chreih chrai yau nan. Oh lac hu thau ka ilamo hadah krah di urang Cam, dahlak daok blei hu rilo pandap khan bai mai alin ka adei saai dalam sang saong ayut saabat”.

Hu rilo kapul tuai mai rivang iek saong biak takre duah thau ka raidiuk, adat cambat, tanarakun di urang Cam. Tui amuk Võ Thụy Ý Như, akaok UBND xã Châu Phong: Dom thun jaik di ini, bruk manyim khan bai meng kan di mikva Cam hu jeng labik tal bhian randap di rilo tuai damuai atah jaik. Piah patagok bruk ba drei tame, dom labik du lich daok padang ngak bilik lakhah tui adat cambat meng kan di bangsa Cam piah ka tuai damuai, abih di nyu nan lac dom likei kumei anit ranam gauk mek thoat khik piah. Gam haong nan, daok hu ngak dom pandap mbang Cam tuk tuai caong khin. Meng bruk salih bahrau ini hu dui pachreih biak rilo tuai mai tal palei ngak.

Palei Cam Đa Phước (huyện An Phú, tỉnh An Giang) lac labik tal di rilo tuai damuai, abih di nyu nan lac tuai negar langiu, tui kuhria yaok bilan hu labaih 3.000 mbang tuai. Urak ini, palei Cam Đa Phước hu 2 mblang gilai duh ka bruk pajeng, rok tuai rivang iek. Di pak ini hu parang iek dom kik menyim khan bai, hu dua labik pablei pandap lưu niệm lac dom pandap meng kan ndung bak ilamo di mikva bangsa..

Di palei Cam Đa Phước meng hadei di tuk hu daong brei tame dom bruk ngak du lich rahra, raidiuk di urang Cam hu tagok mboh di anak meta. Ong Ysa, urang Cam daok di palei Cam Đa Phước khan lac: “dahlau deih, dom pandap manyim khan bai, xarông, kama, khan aw, pandap ngak meng tangin duh ka urang Cam ye urak ini jeng pandap du lịch, hu tuai damuai biak takre. Gam haong nan, dom pandap mbang meng kan di urang Cam An Giang yau ye tung lò mò, cà ri lisei nị, ko am hu jeng pandap mbang karei di palei Cam ini”.

Bruk cak rok patagok du lich rahra pambuak haong ilamo meng kan, gam daong ka mikva bangsa Cam hu jien mek tame, paglaong raidiuk, bo daok daong ka mikva di pak ini khang hatai jia jang dalam bruk taom gaok, ndem mayai nao mai. Hu rilo urang Cam yam tagok ngak kaya mada.

Taphia nan, palei bè Cồn Tiên jeng lac labik pachreih hu tuai damuai mai rivang iek bhum kraong ia akaok halau An Phú. Urak ini hu labaih 25 baoh sang rahra diuk meng bruk pajeng, raok tuai meng ban Châu Đốc tapa palei bè, palei Cam Đa Phước rivang iek yaok harei. Meng hatai caong di tuai damuai tuk mai ravang iek, duah thau, nan ye dom baoh sang hu pambuak bruk raong kaya ikan gam haong bruk pablei dom pandap panda meng kan di mikva bangsa saong duh ka bruk mbang manyum di tuai damuai mai rivang iek pak di mangaok bè./.