Bahrau ini, Viện roh duah kapah saong cak rok patagok bruk ngak nong Nha Hố  di Mintri ngak nong saong patagok palei pala hu ngak salah adat eng drei pathau khan brei pandar dua pajaih nho NH01-152 (nho mbang that) saong NH02-97 (nho piah ngak alak) tui tacei pato di Sarak 94/2019 di Rajaei saong hu brei adat cak rok patagok bruk pala ngak di Ninh Thuan. Anak meta mboh lac, dom pajaih nho ini jeng lagaih haong langik tasik saong taneh riya di Ninh Thuan; dalam nan, pajaih nho NH02-90 (nho Syrah) hu Mintri ngak nong saong patagok palei pala pok brei angan saong ba tame pala rilo.

Urak ini, urang nong di Ninh Thuan daok pandar bruk pala nho mbang baoh that dalam sang halam saong pala nho ngak alak meng jalan kak phun nho tame paga pacang dang hu hình chữ Y.Tapa nan mboh lac, nyu trun hu rilo dom bruk oh siam di langik tasik saong daok paglaong nang suat, chat luong baoh nho, peih tabiak jalan ngak siam piah salih ka jalan pala nho meng kan jang yau dom pajaih nho oh daok lagaih. Jien buh tame ka 1ha (10.000m2) pala nho Syrah labaih 400 triệu đồng. Urang nong paik hu 3 vụ sa thun, baoh paik hu labaih 15 tấn/ha/vụ. Dua Công ty cổ phần pandap mbang Lâm Đồng-Ladofoods saong Công ty TNHH Vĩnh Tiến-Lâm Đồng hu blei veik abih haong yaom takik di abih lac 15 triệu đồng/tấn. Kuhria tui yaom takik di abih ini, urang nong mek hu labaih 675 triệu đồng/ha/thun lac hu laba glaong.

Saai Nguyễn Đình Trí daok di xã Nhơn Sơn, huyện Ninh Sơn lac sa dalam dom urang pala hu jak jeng pajaih nho mbang baoh that NH04-102 (nho anek tangin jhuk) dalam sang halam hu tabung pacang, khan lac: Mbang camriep, paik hu labaih 1,5 tấn/sào, jien mek tame jaik 200 triệu đồng. Tui kuhria bilan paik baoh mbang anak tal meda tagok jang. Baoh nho hu urang blei mai tal bein blei yaomg 120.000-140.000 đồng/kg tal 250.000-300.000 đồng/kg.

Phun jien piah pala sa sào nho mbang baoh that dalam sang halam lac labaih 250 triệu đồng. Meng hu tabung pacang nan ye nho takik hu halak halin palai kaik, urang nong takik pandar jru khik caga phun pala, nho praong siam; baoh tathak samu gauk, baoh praong, yamen bingi njauk tanut chuan meng paik, nan ye chat luong biak glaong. Pala meng 2-3 vụ/thun bo oh huac gaok kan kandah di langik tasik…

Saai Tống Minh Hoàng, po bein nho Hoàng Yến daok di xã Phước Thuận, huyện Ninh Phước pala hu siam dua pajaih nho ia tasau Hàn Quốc saong nho anek tangin juk, haong rilo siam lagaih di baoh nho mek hu tanut chuan ka baoh nho mekre, sambo mau saong oh hu asal, mbang that biak yamen bingi, nan ye hu darak pasa biak takre. Saai Hoàng khan lac: “asal di dua pajaih nho ini lac gha pagam haong phun nho tamuh bal glai bal glo, sa sao pala hu labaih 250 gha. Dua pajaih nho ini lagaih haong langik tasik saong taneh riya, nan ye tabiak bingu, ndam baoh biak rilo. Gam haong bruk palei nho that, bein pala daok peih pambang raok tuai mai rivang iek, mbang dom janih nho bahrau di pak bein, patagok jien mek tame.

Phó Akaok UBND tỉnh Ninh Thuận, Lê Huyền brei thau: Piah parilo dom janih nho, tinh hu ba tabiak jalan ka urang nong peih praong bruk pala nho dalam sang halam dom pajaih nho bahrau kayua Viện ngak tabiak meng dom pajaih hu asal meng negar langiu hu rilo siam lagaih, yau ye: nho NH01-152, Hạ Đen, Scarlotta, Kyoho, Black Queen, Shine Muscat.. piah paglaong kein laba di bruk pala.

Dom So, dom gah pambuak tal daok tacei pato pandar dom ilamo, ky thuat pala nho tui tanut chuan VietGAP saong pato tacei urang nong jhul khang bruk pambuak gauk cak rok patagok du lich sinh thái rivang bein nho, yaih khan angan je, rik daong bruk rami ramik veik gah ngak nong. Thun 2023, Ninh Thuận kuhria cak rok patagok peih praong mblang taneh pala dom pajaih nho bahrau tagok yaok ribau héc-ta jang yau paglaong sản lượng baoh nho meng dom pajaih nho bahrau. Gam haong nan, sangka cak rok patagok mblang hamu praong pala nho di palei nho Thái An, xã Vĩnh Hải, huyện Ninh Hải pambuak haong patagok yaom di baoh nho saong jien mek tame, kein laba ka urang nong./.