Dom urang pablei salih meda tame tal bein blei kaya nong haong yaom glaong jang duk haong dahlau daih

Patui jalan saong patagok khang kadang bruk “Đồng Khởi” dalam padang ngak palei pala bahrau, Danak dak ka 09 di Tỉnh ủy Bến Tre ka padang ngak palei pala bahrau vaktu 2020 - 2025, pamaong tal thun 2030 hu ndom cambaih, abih labik dalam tỉnh pataom tame, sangka peih ngak 4 bruk lac jien mek tame, jalan mbak nao mai, alam môi trường saong siam mekre sron mbon. Kayua yau nan ye, padang ngak palei pala bahrau hu jeng bruk praong dalam, hu bhap bini njauk hatai pachreih tui. Tal urak ini, dalam tỉnh hu 63 xã mek hu chuẩn palei pala bahrau, 40 xã mek hu meng 15-18 tiêu chí, 39 xã ngak hu meng 10 tal 14 tiêu chí, oh daok hu xã halei ngak hu mala 10 tiêu chí. Kuhria rah tapa hu 16,25 tiêu chí sa xã.

Piah ngak hu siam bruk padang ngak palei pala bahrau dalam luac 10 thun tapa, yaok ấp, yaok xã ngan saong pakat sit di abih, samar ngak salah abih, yaom lac tuk camereip daok hu rilo kan kandah. Ong  Nguyễn Văn Vũ, Bí thư Chi bộ ấp Xương Long, xã Thới Thạnh, huyện Thạnh Phú, tỉnh Bến Tre khan lac, padang ngak palei pala bahrau gaok rilo bruk kan kandah yau bruk alam môi trường, yah klaak dom jaman aih angaok kraong ribaong di bhum palei pala. Min chi bộ ấp Xương Long njauk hatai pachreih tui, dom urang đảng ba akaok nao dahlau dalam bruk yah klaak dom jaman, meng nan jak ba bhap bini ngak tui.

Tui ong Huỳnh Quang Đức, Phaok Yam ndok Sở Ngak nong saong patagok palei pala tỉnh Bến Tre, tal urak ini jien mek tame kuhria rah tapa di rahra palei pala tỉnh Bến Tre hu 50 triệu đồng sa urang sa thun, tagok 36 triệu đồng duk haong thun 2010. Mbaok meta palei pala hu salih bahrau mboh di anak meta. Rilo bhap bini chreih chrai mboh cambaih bui sambai mangaok mbaok tuk ndom tal kein laba di bruk padang ngak palei pala bahrau di tỉnh Bến Tre.

Pagap yau sa-ai Phạm Văn Hải, sa urang ngak nong pandar ilamu glaong di ấp Bình An, xã Châu Bình, huyện Giồng Trôm, hadei di 5 thun bhum palei Châu Bình hu salih bahrau gah jalan mbak nao mai. Dom jalan haluk, gluh baok kan nao mai di bilan hajan hu salih meng dom jalan bê tông hacih, mekre. Jeng meng hu danak dak, sa-ai Hải hu pilih ruah nao ngak bruk di negar Japon di thun 2014. Tuk mai veik palei di thun 2017, sa-ai Hải patak pataom hu phun jien, peih sa bein dưa lưới ngak tui ilamu glaong, mek jien tame hu tani tanat 120 triệu đồng sa thun. Meng jien mek tame ini, sa-ai peih pabak dom bein phun, pala la-u, saong rik daong rilo jang phun jien piah ka xã Châu Bình hu jien padang ngak palei pala bahrau.

Tuk ndom menyai ka jalan anak sang, ong Bùi Văn Cửng, ấp Bình Phú oh padauk hu bui sambai, kayua jalan ini hu ong alin hadiah taneh saong buh tabiak 30 triệu đồng, ngak pasiam bê tông, piah ka dom jalan bê tông dalam xã hu pambuak pagam gauk, nao mai mbuan lagaih. Dom jalan palei hu praong mekre jang, hu daong ka bruk pablei kaya nong hu mbuan lagaih jang. Dom urang pablei salih meda tame tal bein blei kaya nong haong yaom glaong jang duk haong dahlau daih.

Urak ini taong abih jalan mbak nao mai di xã Châu Bình, huyện Giồng Trôm hu ngak siam veik abih, bruk ngak mbang KT tagok jang rilo, raidiuk bhap bini tagok mboh di anak meta, jien mek tame kuhria rah tapa hu 62 triệu đồng sa urang sa thun, rilo jang labaih 2 mbang duk haong tuk bahrau peih bruk padang ngak palei pala bahrau. Meng bruk njauk hatai pachreih tui di bhap bini, dom bruk kayua Đảng ủy xã haong UB bhap bini xã ba tabiak jeng hu pachreih tui. Meng nan, ngak jeng xã palei pala bahrau paglaong, bahrau hu pok brei angan di puac thun 2021./.

Urang lang: Mousa Phương – 14/06