Durian daok lac phun pala praong, hu angan je, hu prein mariak gauk, lac kaya nong hu yaom pablei tabiak negar langiu rilo saong ba mai kein laba glaong di abih dalam dom janih phun pala praong di tỉnh Tiền Giang. Meng năng suất tui kuhria lac 20-25 tấn/ha saong yaom durian suan bilan, urang nong pablei di akaok bilan sa thun 2023 ini haong yaom glaong di abih, meng 120.000-140.000 đồng/kg, yaok ha mek hu meng 2 tal 2,4 tỷ đồng, kaoh abih phun jien buh tame, daok laba hu meng 1-1,2 tỷ đồng.

Urak ini, tỉnh Đồng Tháp hu 32 bhum pala durian hu pabak mã số, mblang taneh praong labaih 708ha. Tui yaom pablei labaih 100.000 đồng/kg, urang nong pala durian laba hu yaok thun jaik 1 tỷ đồng/ha, glaong jang yaok piluh mbang duk haong ngak padai. Yaom durian tagok, urang ngak bein mek laba glaong, lac bruk njauk uan tabuan ka gah pala durian. Min, mayah gah chức năng saong kanja palei oh khik ramik siam ye meda ba tal bruk oh pasang iek hu bhum pala, labaih durian pablei tabiak negar langiu saong khat lahik ka urang nong.

Di Tiền Giang, mayah dahlau deih, taneh bhum pala sa janih durian tok pataom di dom xã tapen kraong Tiền di huyện Cai Lậy ye urak ini peih praong tapa jaik abih dom huyện, ban sit bhum pasang iek ia sua gah pai saong bhum Đồng Tháp. Tỉnh Tiền Giang oh pachreih patagok rilo taneh pala durian di dom bhum taneh njom likhun, njom ia mbak atau di langiu bhum quy hoạch, bo pataom tame paglaong chất lượng baoh durian pablei baoh, pabak hu dom asal kadha di gah Trung Quốc ba tabiak piah pabak mã số bhum pala pablei tabiak negar langiu tui jalan chính ngạch.

Di tỉnh Long An, rilo rahra daok kuhria salih tapa pala saong peih praong mblang taneh pala durian kayua mboh hu yaom kinh te glaong. Urak ini dalam tinh hu jaik 500ha pala durian, tagok labaih 200 ha dut saong tukvak puac thun 2021. Min, tui So ngak nong saong patagok palei pala Long An, bruk pala durian daok dang anak rilo bala saong kan kandah kayua rilo tinh, ban daok kuhria peih praong bruk pala bahrau di dom bhum oh lagaih.

Anak bruk hu rilo urang ngak bein salih tapa pala durian, dom tinh, ban saong gah khik ramik hu ba tabiak rilo panuac ieu kakei rahra piah salih bruk bhian randap, oh pala mblah tui urang.

Di tỉnh Tiền Giang, piah cakrok khang kajap phun durian, patagok jien mek tame, daong ka urang nong ngak kaya mada, tinh hu padang saong peih ngak danak dak patagok phun durian tal thun 2025 saong Danak dak padang  talei pambuak gauk pablei baoh durian. Tal tukvak ini, Trung Quốc bahrau pabak ka tỉnh 02 mã số bhum pala saong tinh hu nộp harak gar, cang pasang iek taong yaom 21 harak gar, ngan haong labaih 1.100ha, tui kuhria mek hu 24.000 tấn, biak takik dut saong bruk pala. Piah ba mbuan lagaih jang dalam bruk pablei tabiak, urak ini So ngak nong saong patagok palei pala tỉnh Tiền Giang daok pambuak bruk haong kanja dom palei pato pasram ngak dom harak gar pablei tabiak negar langiu tui jalan chính ngạch ka dom doanh nghiệp saong hợp tác xã tui jalan ba tabiak lac tal puac thun ini hu labaih mateh dom mblang taneh pala hu Trung Quốc pabak mã số bhum pala.

Tỉnh Đồng Tháp lac labik hu mã số bhum pala durian camriep abih hu ginup prein pablei tabiak tui jalan chính ngạch tapa Trung Quốc di bilan 9/2022 di xã Mỹ Long, huyện Cao Lãnh praong labaih 16ha ngan haong 20 baoh sang hu mbaok tame. Urak ini tinh daok pataom tame bruk jao ilamo kỹ thuật pala ngak durian piah khik tani tanat chất lượng; daong ka po bein ngak po ilamo pala plaih bilan pala praong, paik oh njauk gam tukvak haong dom bhum pala di dalam saong langiu taneh ia. Gah ngak nong hu pok panuac ka UBND tỉnh khik ramik catang pajaih durian; khik ramik bhum pala durian, khik najuk bruk quy hoạch, plaih di bruk pala rilo, pala langiu quy hoạch

Di tỉnh Long An, gah ngak nong jeng daok pambuak bruk haong dom kapul, dom puk palei pasang iek mblang taneh pala durian; padang danak dak cak rok patagok phun mbang baoh hu pala rilo tal thun 2025 saong 2030. Padang ngak harak gar ieu likau pabak mã số bhum pala, labik papaok kadung durian pablei tabiak negar langiu hu lagaih. Gam tui di nan, samar drah duah mboh saong langyah biak catang dom bruk mek angan, bleik saleik, pandar mã số oh njauk haong bruk ba tabiak.

Gam hoang nan, pataom tame padang ngak dom chuỗi giá trị ngak tabiak, pataom blei, chế biến, pablei tabiak negar langiu baoh durian hu siam lagaih. Gam haong nan, ieu dom huyện kakei urang nong oh eng drei peih praong taneh pala durian di dom bhum hu taneh riya, halau ia oh lagaih ka bruk pala./.