Sang saai Mã Thị Thêm pablei salih dom janih masin hadang, ba khía, chả ikan phi rilo thun ini mai di xã Tân Duyệt, huyện Đầm Dơi. Urak ini saai hu rilo labik mai mek pandap di sa-ai piah pablei veik, nan ye bruk ngak mbang di sa-ai hu tani tanat. Di bilan 9/2022, saai Thêm haong dom urang dalam kapul brei padang HTX Huy Thịnh piah padang ngak dom pandap hu prein khang di palei drei mek hu tanut chuan OCOP.

Saai ngak yau nan, lac kayua bahrau hu dom jabat chức năng daong palagaih piah hu mbaok tame dom danak dak pablei salih di rilo tinh, ban; rilo labik caong blei pandap biak rilo, tani tanat min biak sahanang hatai ka chất lượng hacih saat, salamat pandap mbang. Meng nan, saai Mã Thị Thêm ba tabiak jalan padang ngak 5 pandap, lac Ba khía pandam; Ba khía padam sarau blaoh; masin hadang; Chả cá phi chiên saong ikan phi pandam mek hu tanut chuan OCOP 3 patuk: “Hadei di tuk padang HTX, dahlak tut angan pandap OCOP. Kol dahlak daok ngak pasiam dom pandap tui jalan paglaong chất lượng, hacih saat, gheih mekre saong hu mbaok tame pakacah OCOP piah brei mboh labik dang, yaom glaong, meng nan paglaong yaom pandap, cak rok pataok tani tanat jang.”

Di huyện Đầm Dơi hu rilo baoh sang ngak pandap, pablei salih hu hatai sahaneng yau saai Mã Thị Thêm saong ngak hu jak jeng. Tapa nan daong ka palei hu 37 pandap OCOP 3 patuk, 3 pandap OCOP 4 patuk. Sa dalam dom jalan ngak di jabat chức năng palei peih ngak hu siam lagaih lac daong padang dom HTX. Dom kein lagaih hu brei mboh cambaih laih di HTX lac hu bhum pandap tamo praong jang; menuac ngak rilo jang; mikva pataom hu phun jien piah buh tame ngak dom asal kadha kan ngak salah hu, yau ye sang xưởng, pandap panda jamraik piah ngak, tame paok pandap panda…

Pagap yau Hợp tác xã Trúc Thương di xã Tân Dân, huyện Đầm Dơi. Dahlau di nan, saai Trần Xuân Oanh, Yam ndok HTX Trúc Thương tok ngak saong pablei salih sit sot hadang thu di sang. Min mboh hu dom kein lagaih, saai Oanh khang hatai likau padang HTX di thun 2021. Tal thun 2022, HTX Trúc Thương hu 3 pandap lac hadang thu, hadang thu samal (chà bông), masin hadang hu brei angan OCOP 3 patuk pakat tỉnh. Saai Trần Xuân Oanh brei thau lac, HTX tuk halei jeng mek chất lượng pandap ngak gha, meng nan dak padang angan je, dak padang hatai jia di bhap bini: “Anek hadang blei tame ye drei blei hadang haluk daok ndiuk, oh pruh jru hagait. Tuk ngak ye brei ngak ka nyu hacih, tuk ye caik hatai khik iek tukvak tuk, blaoh ba nao pabu thu di langik pandiak dalam 2 harei meng ba tame jamraik jan. Tuk ngak brei cuk harum tangin, cuk pataih pacang mbaok, khan ao pacang rup pabap piah khik hacih saat, blaoh tame paok biak tani tanat.”

Tui Jabat ngak nong saong patagok palei pala huyện Đầm Dơi, tapa pasang iek, thun ini di dalam huyện hu 5 labik hu pandap OCOP hu ginup prein tagok tanut meng 3 patuk tagok 4 patuk. Jabat chức năng huyện Đầm Dơi daok  daong dom labik nan piah paglaong chất lượng dom pandap panda piah mek hu tanut chuan OCOP glaong jang. Ong Huỳnh Nhật Trường, Jabat Ngak nong saong patagok palei pala huyện Đầm Dơi brei thau: “Dalam thun ini, kol dahlak pataom tame ngak khang, padang ngak 10 pandap mek hu OCOP 3 patuk, paglaong 6 pandap meng 3 patuk tagok 4 patuk. Taphia di nan, sangka daong dom labik peih praong bruk ngak tabiak pandap piah khik kajap chất lượng pandap panda mek hu piah pandap panda OCOP di huyện dak harei dak siam jang.”

Huyện Đầm Dơi, Cà Mau mek hu dom jak jeng siam lagaih meng bruk dak padang saong cak rok patagok hu pandap panda OCOP pambak tame prein khang. Min, piah cak rok patagok khang kajap, dom labik ngak jeng biak caong hu bruk daong ba, pato tacei dalam dom bruk yau ye harak gar pambuak bruk, pato tacei dom po pandap padang dom danak dak peih praong bruk ngak, bhum pandap tamo piah ngak, buh jien blei bahrau atau pasiam veik pandap panda jamraik ngak pandap, dây chuyền công nghệ; pandar dom jalan ngak công nghệ số;… piah ka pandap panda OCOP dak harei dak dang kajap saong yam atah jang./.