Daok atah di pasak ban Sóc Trăng jaik 11km, palei pak yot di mikva Khmer di xã Phú Tân, huyện Châu Thành hu meng sa rituh thun ini mai. Meng dom pandap mbuan duah yau ye: kreim, la-a… , tapa plaak tangin gheih di urang pak ini, hu ngak jeng pandap piah pandar yaok harei dalam sang… , abih di nyu lac dom thun jaik ini, mikva hu ngak ka dom janih pandap pak jeng pandap lưu niệm gheih mekre piah pablei ka tuai mai ravang me-in… Ini jeng lac pandap ka tuai ba nao alin hadiah ka gauk gar hadei di yaok mbang mai tal Sóc Trăng. Sa-ai Quách Tiểu  Phụng, sa urang tuai mai ravang iek HTX pak kreim la-a, khan lac: "Ini lac bruk ngak meng kan, drei njauk khik ramik, drei pablei tapa negar langiu urang takre lo, drei njauk cakrok, drei mboh pandap biak gheih, mekre".

Di pasak xã hu labik parang iek pandap pak meng kan di HTX Mây tre đan Thuỷ Tuyết. Meyah mai tal dom labik ini, tuai mboh hatung hatai biak chreih chrai haong  yaok ratuh janih pandap meng pandap pandar yaok harei tal pandap ngak mekre, pandap alin hadiah… hu ngak meng havei ia, kreim, la-a. Tui amuk Trương Thị Bạch Thuỷ, Yam ndok HTX Mây tre đan Thuỷ Tuyết, urak ini HTX daok pamaong ngak jeng bruk pambuak gauk ngak tabiak, pablei salih pambuak haong cakrok yu lit, dịch vụ di dom sang bhap bini haong gauk, meng nan ngak brei paglaong yaom di palei ngak, yaih khan pandap tal tuai mai ravang me-in.

 “Urak ini HTX hu labaih 700 janih pandap. Pak ini pandap hu pablei ka darak pasar dalam taneh ia saong pablei tapa negar langiu. Dom pandap pablei tapa negar langiu rilo meng lac pandap piah pandar, yau ye yot caik khan ao ka nhà hàng, khách sạn. Kol dahlak daok hu bruk padang ngak meng havei ia, meng kreim, yau ye homestay, labik padeih padei, labik yu lit”.

Urang Khmer hu biak rilo ilamu, meng dom rija, roya, ilamu padang ngak baha, kandi, dom janih alat ragam, dom ragu tamia bhap bini tal dom khan ao meng kan … Dom thun jaik ini, taphia bruk patagok saong khik ramik ilamu, tỉnh Sóc Trăng saong bhap bini Khmer daok biak caik hatai sangka ba pandar dom ilamu ini piah patagok yu lit.

Pagap yau di harei 15/10 saka ia bulan yaok thun, bhap bini Khmer meng grauk phum sóc saong tuai damuai pataom gauk mai di kraong Maspero, ban Sóc Trăng piah uan Oóc Om Bóc – pakacah ghe Ngo. Tapa nan, tuai mboh biak chreih chrai tuk hu mboh di anak meta dom baoh ghe ngo rilo sambo màu, bingu la hadah mekre, atah meng 25-30m, pajeng meng 50-60 menuac vah haong gauk. Sa-ai kamei Trần Thị Quế Hương, urang tuai mai meng tỉnh Đồng Nai hu mbaok tame iek pakacah ghe ngo khan lac:  “Ini lac mbang camereip drei hu mbaok tame bruk ini, biak praong, biak bui sambai chreih chrai. Ini mada lac harei pataom praong di bhap bini pak ini, nan ye mikva hu mbaok biak rilo. Piah gam ravang me-in, gam maong iek bruk pakacah ghe ngo pak ini…"

Bruk njauk menyai nan lac, meng 93 baoh baha Khmer hu padang ngak biak gheih, biak mekre, daok jeng labik dui pachreih tuai mai ravang iek tuk mai tal Sóc Trăng. Pagap yau baha Botum Vongsa Som Rong di phường 5, TP Sóc Trăng hu meng 600 thun. Tukvak jaik ini, baoh baha daok jeng labik ravang iek di tuai damuai kayua nyu hu padang ngak biak gheih mekre tui ialmu ngak baoh baha Khmer; dalam nan, bảo tháp saong rup patau phật Thích Ca niết bàn lac kadha praong dui pachreih. Tuai mai tal ini daok hu ravang iek labik parang iek dom khan ao meng kan di bhap bini Khmer, hu cuk ngui “ngak jeng urang Khmer” dalam khan ao bangsa, nan lac dom blah khan ao cuk lakhah, cuk nao me-in atau khan ao cuk dalam bruk ngak mbang ngak huak yaok harei di mikva.

Amuk Dương Thị Ngọc Diễm, Phaok akaok UBND ban Sóc Trăng brei thau, rilo labik baha Nam tông Khmer hu jeng labik ravang iek di tuai dalam taneh ia saong tuai dunya, yau ye: baha Som Rong, chùa Dơi, baha Pem buôl thmây, baha Chroi Tum Chás…. Meng sarak daong di tỉnh hu buh jien ngak brei dom labik nan hijao, hacih, mekre, pabak hatai caong di tuai damuai.

"Dương Thị Ngọc Diễm Nao gam haong Sarak 05 của tỉnh, ban Sóc Trăng hu ngak harak  pok tagok tỉnh piah daong sarak yu lit ini. Mbang ka 1, ngan saong baha Som Rong daong mbang 1 lac 100 triệu đồng. Urak ini daok hu daong sarak yu lit mbang 2 haong yaom phun jien lac 1 tỷ đồng piah patui bruk padang ngak dom labik duh ka tuai damuai. Kol dahlak jeng daok ngak harak piah pok tagok tỉnh brei buh jien tame ngak pasiam baha Mahatup piah patagok yu lit di anak tal"./.