Anai Phùng Thị Ngọc Mai, gru pato Ngữ văn, Sang bac THCS Huỳnh Khương Ninh (quận 1), brei thau, thun bac 2023-2024, đề thi pilih ruah tame tal bac 10 môn Ngữ văn khik tani tanat duk haong thun dahlau. Abih 3 câu hỏi di đề thi jeng oh caik ka anek saih bac kanal abih lý thuyết, min brei hu ilamu ngak, ilamu mboh saong thau langyah. Kayua yau nan ye, anek saih brei bac cambaih đề thi, ba tabiak tukvak cambaih laih piah ngak bài ka yaok câu hỏi, plaih vak biak atah di gah nghị luận xã hội, bloh oh daok tukvak piah sahneng, piah ngak gah nghị luận văn học.

Rilo thun mai ini, đề thi salih bahrau tui jalan pablak tame thaot binguk, biểu đồ, văn bản duk iek tame panuac tangi sua gah nghị luận xã hội. Anaik saih njauk plaih patui panuac tangi sua bo brei ba tabiak pahu jalan sahneng, pambuak pagam haong rup di drei. Piah daong ka anek saih ngak krein, ngak randap haong đề thi, meng akaok thun bac, anai gru Nguyễn Thu Hà, akaok kapul Ngữ văn, Sang bac THCS Ngô Sĩ Liên (quận Tân Bình) ba tabiak đề kiểm tra di tal bac hu ngak dreih yau đề thi pilih ruah anek saih. Gru pato duah pataom dom kadha vak, bruk bahrau, ba tame đề thi, daong ka anek saih ngak krein, ngak randap, hu ilamu piah ngak tuk gaok dom asal kadha karei.

Ngan haong môn Toán, tui anai Phạm Thị Thanh Thủy, Akaok kapul Toán, Sang bac THCS Huỳnh Khương Ninh, anek saih bhian  lahik rilo tukvak tuk gaok dom bài toán hu pandar bruk di anak meta. Kayua yau nan ye, dom adei brei bac cambaih đề, sahneng kuhria tani tanat, meng nan duah tabiak jalan ngak bài toán. Ngan saong dom bài toán hu rilo panuac sua tangi sit, asal kadha di panuac sua tangi dahlau, lac jalan piah langyah panuac sua tangi patui di nan. Tuk ngak, anek saih brei hu dom jalan langyah piah mek hu abih dom điểm di panuac tangi sua nan.

Daok môn sap Anh, anai gru Bùi Thị Trà My, Phó hiệu trưởng Sang bac THCS Huỳnh Khương Ninh brei thau, đề thi rilo thun mai ini oh sangka rilo ka ngữ pháp bo peih praong “vốn từ vựng” ka anek saih. Nan ye dalam tuk pato di tal bac, gru oh lac pato ngữ vựng dalam tapuk pato bac bo brei sangka ba tame panuac bahrau tui jalan cakrok di xã hội – yau dom bruk gah “trí thông minh nhân tạo”, ChatGPT, biến đổi khí hậu…

Jaik abih gru pato tal bac 9 jeng brei thau, anek saih tal 9 daok dalam tukvak cakrok samar gah tâm sinh lý nan ye mbuan hu bruk srau kadau gah hatai sahneng, abih di nyu lac bhian duh hatai tuk dang anak rilo pilih ruah hatai caong pilih ruah. Kayua yau nan ye, anai gru Bùi Thị Trà My mboh lac, gru chủ nhiệm brei samar thau hatai sahneng, hatai caong di anek saih, hu jalan tacei pato dom bruk pambuak tal pilih ruah anek saih, pambuak bruk siam haong amaik ame di anek saih dalam bruk brei panuac tacei jalan pilih ruah hatai caong iek tui prein bac di anek saih tal 9.

Hu rilo thun hu ilamu dalam bruk tacei jalan, anai gru Nguyễn Thu Hà Sang bac THCS Ngô Sĩ Liên ndom lac, piah pakacah hu siam, dom anek saih brei khik hu hatai chreih chrai. Ilamu di anai gru pato môn Ngữ văn lac yaok thun, dahlau di tuk anek saih yam tame 2 harei pakacah glaih glar, anai payua ka dom adei sa đoạn video clip hu asal kadha bui sambai, pablak tame dom băng rôn pachreih ba, kadha daoh bui sambai yau sa panuac tadhau ayuh patuah jamo, daong pabak prein ka anek saih.

Tui ong Võ Thiện Cang, Akaok Jabat Khảo thí saong Taong yaom bruk pato pakai (Sở pato megru TPHCM), thun bac 2023-2024, TPHCM pandar bruk tut angan online ka taong abih hatai caong tal 10 thường saong tal 10 chuyên, tích hợp. Kayua yau nan ye, anek saih saong amaik ame di anek saih njauk duah thau dom kênh tư vấn, sahneng kuhria, pilih ruah hatai caong ka nyu lagaih, iek tui prein bac di drei saong jalan meng sang tal sang bac, plaih bruk salih sang bac di kreh thun bac.

Thun bac 2023-2024, mbang pakacah pilih ruah anek saih tal bac 10 công lập daok khik bruk kuhria điểm hệ số 1 ngan saong 3 môn Ngữ văn, Toán haong Ngoại ngữ. Langiu dom hatai caong pilih ruah anek saih tal bac 10 thường, anek saih meda tut angan hatai caong tame tal bac 10 chuyên saong tích hợp. Mbang pakacah tui kuhria hu peih tabiak di akaok bilan 6-2023./.