Danak dak binah 4 di Danak dak padang ngak jalan radaih angaok glaong nduac samar Châu Đốc - Cần Thơ - Sóc Trăng vaktu 1, labik tapa tỉnh Sóc Trăng atah 58km, hu yaom jien buh tame ngak abih tih 12 rabau tỷ đồng, mbaok taneh njauk mek piah ngak tagok tal labaih 384ha, gaok tapak tal 1.787 sang saong 8 kapul nyaom. Yaom lac danak dak praong, hu peih ngak samar drah min meng hu jalan ngak njauk, pathau khan siam, nan ye taduan hu bruk pachreih tui glaong di bol bhap rahra.

Di huyện Mỹ Xuyên, abih tih sang bhap bini njauk mek veik taneh lac 475 baoh… Urak ini huyện Mỹ Xuyên daok kham merat piah ngak salah bruk bayar jien ka taong abih dom sang nan dalam adit ini. Ong Đặng Văn Phương, Bí thư Huyện ủy, akaok UB bhap bini huyện Mỹ Xuyên brei thau: “Dahlak biak thau dhar phor mikva dalam labik hu sang, hu taneh njauk mek ngak jalan hu klah rabha haong đảng saong karja. Ini lac danak dak praong peih tabiak jalan cakrok bruk ngak mbang, ngak huak ka anek kamuan harei hadei.”

Dahlau di nan, UBND tỉnh Sóc Trăng hu tabiak yaom jien bayar, daong ka dom kapul nyaom, menuac urang hu taneh njauk mek piah ngak jalan radaih nduac samar. Tui nan, yaom bayar ka mbaok taneh njauk mek veik glaong di abih lac 7.875.000 đồng sa m2 saong biar di abih lac 56.900 đồng sa m2.

Sang ong Lý Phú Sang, daok di xã Phú Mỹ, huyện Mỹ Tú hu taneh njauk mek ngak jalan tagok tal 9.300m2 taneh ngak padai, tui yaom bayar, sang ong taduan hu jien bayar abih tih labaih 1 tỷ đồng, mboh lac yaom bayar yau nan nyu lagaih haong bruk di anak meta nan ye ong taduan mek. Ong Lý Phú Sang ndom lac: “dahlak mboh yaom bayar taneh di dahlak ye dahlak biak njauk hatai haong karja bayar yau ini dahlak meda blei hu taneh praong jang dua mbang taneh di dahlak piah pala drak. Hadei di tuk taduan hu jien bayar blaoh, dahlak nao duah blei taneh piah pala drak, saong dahlak jeng caong lac jalan samar hu peih ngak saong ngak salah piah ka bruk pajeng ba pandap panda pablei salih saong kinh tế cakrok jang.”

Di huyện Mỹ Tú, jalan radaih nduac samar tapa huyện atah labaih 23km, gaok tapak tal 601 sang saong 2 kapul nyaom, abih tih taneh njauk mek ngak jalan tagok tal 126 ha. Piah ngak siam bruk pathau khan, huyện hu padang mBan tacei pato pathau khan bruk bayar jien. Urak ini tỉnh hu tabiak blaoh yaom taneh, huyện hu peih bruk khan brei thau yaom bayar, daong saong hu mikva pachreih tui biak glaong.

Ong Lâm Văn Mẫn, Bí thư Tỉnh uỷ Sóc Trăng brei thau, taphia di bruk paglaong prein meriak gauk di nền kinh tế, langyah dom bruk pajeng ba pandap panda, jalan nduac samar daok daong pasiam bruk patagok jalan mbak nao mai dalam tỉnh, abih di nyu lac dom jalan nao mai duh ka pabah lamnge Trần Đề. Ini jeng lac prein jhul piah cakrok dom labik ngak kong bahrau, jhul patagok kinh tế - xã hội di bhum taneran kraong Cửu Long jeng yau di tỉnh Sóc Trăng: “Tỉnh daok kham merat abih drei piah ngak salah danak dak ini, piah palagaih ka bruk dui pachreih, ieu da-a urang buh jien tame ngak mbang, cakrok dom labik ngak kong, patagok dom labik đô thị, dịch vụ, cakrok dom bhum kinh tế di angaok jalan nduac samar nao tapa, dom labik pambuak tame, dom jalan pagam tame, tỉnh daok hu jalan pambuak bruk haong huyện saong hu mikva pachreih tui, kol dahlak mboh biak lagaih piah ngak dom labik ngak kong, đô thị pablei salih, dịch vụ atau dom bhum kinh tế.”

Piah ka dom danak praong samar hu peih ngak di tỉnh, bahrau ini, HĐ bhap bini tỉnh Sóc Trăng jeng brei tapa sarak ka jalan ngak saong yaom jien buh tabiak daong karei karei tuk Karja mek veik taneh padang ngak Danak dak binah 4 di Danak dak padang ngak jalan radaih angaok glaong nduac samar Châu Đốc - Cần Thơ - Sóc Trăng vaktu 1 saong Danak dak padang ngak tatua Đại Ngãi angaok jalan Roya 60 di dalam tỉnh Sóc Trăng saong tỉnh Trà Vinh.

Dalam tukvak tapa, tỉnh Sóc Trăng biak kham merat abih drei, pataom tame glaong di abih dom prein khang, peih ngak siam bruk pathau khan, jak ba piah ka dom danak dak hu peih ngak njauk tukvak ba tabiak./.