Bilai Bien phong Nghĩa Thuận (huyen Quản Bạ- tinh Hà Giang) khik ramik labaih 20 ribau mbaik km jalan negar, di 2 xa tapen negar, ngan haong 18 puk palei, dalam nan hu 18 palei jaik taphia jalan negar. Dom thun tapa, Bilai Bien phong Nghĩa Thuận brei thau lac bruk dakwah pathau khan hukum ieu lac sa asal kadha hu angan makna, piah jak ba jum kul prein khang di rahra hu mbaok tame khik caga khang kajap rup ngak po taneh ia, khik siam makre jalan tapen negar, khik saron mbon an ninh chinh tri, siam makre, salamat ka rahra di bhum labik tapen negar. Thượng úy Ly Mý Lùng, bilai bien phong Nghĩa Thuận hu pandar jalan dakwah pathau khan jaik haong mikva urang bangsa Mông, daong ka rahra paglaong hatai sahaneng ka hukum, salih jalan sahaneng, jalan ngak, meng nan kham marat hu mbaok tame khik caga jalan talei di tapen negar:

“Urak ini lac dakwah pathau khan ka Hukum bien phong Viet Nam ngan haong klau sarak hukum tapen negar, gam tui di nan jeng pathau khan ka Sarak ka 27 saong Patacei ka 09 di tỉnh ka bruk yah klak dom adat cambat oh daok lagaih di dalam tinh Hà Giang meng dom thaot gamba binguk, video, gam tui di nan jeng pablak tame bruk dakwah pathau khan ka bruk pablei salih manuac.”

Ieu lac xa bhum ceik glaong di huyện Mường Lát, Pù Nhi hu jalan tapen negar atah 15km jaik taphia saong Lào. Nan ye, bruk rahra nao mai di dua taneh ia lac biak sarau kadau ngan haong rilo jalan sit, jalan praong. Kayua yau nan ye, bruk daong ka mikva thau tantu cambaih jang dom adat dalam bruk brei tapa lac hu makna biak glaong, abih di nyu nan lac daok pambuak haong bruk khik caga quyen ngak po taneh ia di bhum labik tapen negar. Đại úy Nguyễn Văn Phương, akaok kapul jak ba manuac urang bilai bien phong Pù Nhi brei thau:

“Sa di dalam dom labik sarau kadau abih ka bruk oh saron mbon ye kon dahlak hulin hu peih ngak rilo jalan ngak langyah meng bruk dakwah pathau khan pataom gauk tal bruk nao pathau khan labik ini tapa labik deih, meng gam sap Yuan saong sap bangsa, dak harei hatai sahaneng ngak njauk tui hukum di mikva di labik bilai bien phong khik iek hu paglaong tagok. Meng nan, bo dom urang ngak chung blaoh tal kon toi pham karei jeng mboh trun cambaih, mikva jeng halain hatain hu mbaok tame, tut angan tame dom baoh sang blaoh dom kapul eng drei khik iek jalan tapen negar, dom kapul khik rani tanat bruk saron mbon, siam makre bhum labik daok, gam haong bol lin bien phong nao pasang iek khik caga jalan tapen negar.”

Langiu di bruk peih mbang ginum biai puk palei, dom bol lin caga jalan talei nagar Pù Nhi daok nao jaik, thau cambaih bhum labik, bhian pambuak haong dom urang hu angan je dalam rahra puk palei nao tal yaok baoh sang piah dakwah pathau khan, jak ba mikva ngak njauk tui dom taka adat hukum brei bruk khik ieik glai, peih radaih, pacang caga aphaing matuy saong yah klak dom adat cambat oh daok lagaih, yah klak bruk tok gauk ka oh tal umo thun, tok gauk dalam but pajaih; gam tui di nan jeng sa tangin haong gauk hu mbaok tame khik caga quyen ngak po jalan tapen negar, labik jamang gang nagar./.