Yaok bilan, công an ban Thái Nguyên, tỉnh Thái Nguyên jeng hu peih pathau khan ka bruk salamat nao mai angaok jalan mbak saong tacei pato peih radaih njauk adat ka yaok ribau anek saih dalam ban. Dom pathau khan hu peih tabiak tui rilo jalan yau ye dak dalikan, kịch ka bruk peih radaih  angaok jalan mbak cambaic laic, dom dalikan bui sambai ndung bak ilamu lagaih haong raidiuk ka bruk salamat jalan mbak hu khan brei mbuan thau, mbuan kanal, ngak brei chreih chrai dom tal bac ngoai khoa pachreih anek saih tame bac. Gam haong nan gah chức năng  daok peih bruk mbaoh tangin tame harak pambuak bruk khik brei salamat jalan mbak, ANTT, salamat sang bac haong dom sang bac dalam ban.

Tapa dom mbang taom gaok ndem meyai nao mai nan, dom adei anek saih mboh mbuan thau, mbuan kanal, bruk ngak suan hukum jalan mbak di anek saih mboh trun. Adei  Đỗ Ngọc Ánh, bac tal 11A1, sang bac THPT Trần Quốc Tuấn khan lac: « Di bilik bac ye khol dahlak hu duah thau ka bruk nao mai salamat angaok jalan mbak, yau nan min dom ilamu nan lac biak thu lagu, kan kanal, kan dar. Var taom gaok ndem meyai nao mai ka bruk duah thau hukum salamat jalan mbak ini, khol dahlak mboh biak pachreih hatai, jalan pathau khan tui bruk ba tagok sân khấu, dom dalikan biak bui sambai min hu makna biak praong dalam, meng nan khol dahlak thau hu rilo ilamu tuk tabiak jalan. »

Daok adei Đỗ Như Ngọc, tal bac sap Anh 12A1, sang bac THPT Chuyên Thái Nguyên ye mboh lac dom var ndem meyai nao mai daong adei hu thau saong ngak tui hukum salamat nao mai angaok jalan mbak hu siam jang: « Panuac meyai, jeng yau asar kadha ndem meyai mbuan thau mbuan kanal jang, pabak ka rup drei hu thau ka hukum jalan mbak, hadei di nan brei mboh hatai iek praong meng bruk ngak njauk, iek praong drei, baoh sang saong menuac sia. »

Tapa dom var taom gaok ndem meyai nao mai nan anek saih  hu thau dom ilamu tuk tabiak jalan, dom bruk ndem meyai nao mai hu ilamu di angaok jalan mbak yau: Brei ngak catang tui adat ba tabiak di angaok jalan mbak; dom bien mbao saong gom tin hieu jalan mbak; langyah dom bruk tuk hu bala angaok jalan mbak; hukum ka salamat jalan mbak saong tacei pato ilamu peih radaih salamat…Dom sang bac hu mbaoh harak sanya haong Jabat Cảnh sát jalan mbak peih ngak dom quy định ka bruk nao mai angaok jalan. Thiếu tá Nguyễn Nam Hưng, Jabat Cảnh sát jalan mbak, Công an tỉnh Thái Nguyên brei thau :« Pathau khan tui jalan online, pathau khan tapa mạng, langiu di nan pathau khan tapak khol dahlak jeng hu salih birau asar kadha saong jalan pathau khan, ngak habar ka mbuan thau, mbuan kanal »

Tapa nan, Jabat Cảnh sát jalan mbak hu peih parang iek thaot binguk « Bala angaok jalan mbak, langyah bruk ngak suan » ; brei  1.000 tờ rơi khan ka bruk salamat jalan mbak  saong alin 20 baoh mot BH Honda tanut chuẩn ka dom anek saih. Danak dak jeng hu alin pandap brei ka dom anek saih lac «  đại sứ ilamu salamat jalna mbak » saong dom adei hu raidiuk kan kandah.

Tapa dom bruk ngak nan, Thành đoàn Thái Nguyên hu pabak ka anek saih dom ilamu peih radaih  hu siam salamat, rik tame daong dom adei paglong jalan sahaneng, ngak njauk tui Hukum nao mai angaok jalan mbak. Tukvak anak tal, Thành đoàn Thái Nguyên daok brei peih ngak di ralo sang bac karei dalam ban./.