Oh lac labik menek tabiak đờn ca tài tử min ban Cao Lãnh, tỉnh Đồng Tháp hu manek tabiak rilo Nghệ nhân ưu tú. Urak ini, ban hu 36 kalup kapul đờn ca tài tử di xã, phường saong 1 kalup kapul di ban Cao Lãnh hu abih tih 426 urang.

Tal melam sanecar yaok adit, di Mblang bein Hai Bà Trưng, Phường 2, dom urang dalam kapul đờn ca tài meng ban Cao Lãnh hu peih mbang ma-in, pasram dom kadha daoh tài tử. Di pak ini, rahra saong tuai damuai meda hu pang, hu maong iek sa danak dak đờn ca tài tử meng dom sap daoh, urang paik capi lac dom menuac dalam kalup kapul. Saai Mai Thanh Loan, nghệ nhân oh bac tapa tal bac halei, mai meng Phường 6, ban Cao Lãnh khan lac: "Meng tuk daok sit dahlak biak takre janih ilamo ini saong jeng hu pasram daoh. Tukvak hadei, janih ilamo ini hu thau tal rilo jang, nan je dahlak meng mai gilac veik piah pasram dom kadha daoh drei takre abih ka nyu njauk lagu, piah tuk drei nao daoh atau hu nao pakacah, parang me-in haong dom adei saai atah jaik piah bac megru rilo jang".

Akaok Kalup kapul đờn ca tài tử ban Cao Lãnh lac Nghệ nhân ưu tú Thu Ba, urang kak kajap haong janih ilamo ini yau ralaow darah di drei, umo 63 thun min ong hu labaih 45 thun main đờn ca tài tử. Nghệ nhân ưu tú Thu Ba oh lac đờn naih bo ong daoh jeng biak gheih, ong caong janih ilamo ini cak rok patagok khang kajap, saong daok caong rai dam dara harei ini khik ramik saong patagok. Nghệ nhân Thu Ba khan lac:  "Dalam labaih 2 thun jaik di ini hu cak rok patagok khang lo. Drei jeng jak ba adei saai, dom adei dalam mban pan akaok kalup kapul tinh jeng yau nan, drei pambak praong bruk ngak ini blaoh drei pathau khan, daong ba, pato tacei. Nan lac patoa veik, urak ini drei daok pato sa tal hu piluh dom kamuan, ngak habar piah ka rai patui veik di kalup kapul bac biak samar, bac biak naih".

Biak kan piah khan brei thau hu abih dom chreih chrai bo janih ilamo đờn ca tài tử ba mai. Dalam đờn ca tài tử, mboh hu hatai anit ranam palei negar, taneh ia biak praong; hatai anit ranam gauk di dam dara biak siam gheih, hatai anit ranam di anek maik, anek ame biak praong glaong; hatai ranam gauk di ayut saabat kak kajap yau adei saai sa ralow darah saong gauk.

Urak ini đờn ca tài tử daok dang anak bruk maraik gauk biak khang di dom janih ilamo, ragu ragam bahrau karei karei. Bruk nan caik tabiak bruk lac njauk peih bruk roh duah, ba tabiak jalan ngak piah khik ramik saong patagok dom yaom glaong inem krung ilamo đờn ca tài tử dalam raidiuk bahrau. Ong Ngô Hoàng Việt, Phaok yam ndok Pasak ilamo - Thể thao saong papar sap ban Cao Lãnh brei thau: "Anak tal meda ba dom asal kadha di đờn ca tài tử tame danak dak bruk ngak di thun, ngak jeng mblang me-in piah ka dom cei nghệ nhân hu taom gaok, bac magru ilamu haong gauk. Taphia di nan lac talei pambuak dom kalup kapul đờn ca tài tử di ban haong kalup kapul đờn ca tài tử dom kapul ayut saabat dalam saong langiu tỉnh, piah meng nan ba danak dak đờn ca tài tử ban Cao Lãnh dak harei dak cak rok patagok".

Ilamo đờn ca tài tử di pasak Bhum Taneh Sen hồng – Đồng Tháp dak harei dak cak rok patagok saong jeng pandap du lịch biak gheih. Dom “tài tử, giai nhân” yaok harei danei pok sap daoh, ragu hò piah dui pachreih, khik takai tuan damuai atah jaik mai tal ma-in, maong iek, piah ka thaot binguk bhum taneh, anek manuac Cao Lãnh saong inem krung ilamo di rahra lambaok ka manuac sia dak harei dak hu rilo urang thau tal saong khik ramik./.