Lac kapul parang ma-in peih mbaok di Harei pataom ilamo daoh Then - capi Tính ban Buôn Ma Thuột mbang ka 2 – thun 2024, kalup kapul capi Tính – daoh Then ban Buôn Ma Thuột ma-in 5 kadha lac Pắc Pó Ba Đình, kadha then alin amaik, Trẩy hội Bản Đôn, Xuân Đắk Lắk saong Cắp khoăn tơ hồng. Dalam nan, Cắp khoăn tơ hồng lac kadha then meng kan di urang Tày brei mboh hatung hatain di urang amaik likau po yang brei ka anek kumei hu pasang saong hu raidiuk trei sir haniem phul. Kadha daoh Then alin amaik biak drut drui meng urang parang me-in abih hatung hatian, pambuak haong thaot binguk brei mboh bruk cang maong dalam joa gindang di urang amaik tuk anek tagok jalan nao mesuh, blaoh var drei jan tuk mehit lac anek lahik piah khik saron mbon ka taneh ia, palei negar. Amuk Luân Thị Mai, Akaok kalup kapul capi Tính – daoh Then ban Buôn Ma Thuột khan lac, dom kadha ini lac bruk jak jeng hadei di tukvak pasram abih drei meng yaok yaok bruk ngak, yaok panuac daoh:

" Kol dahlak caga luac sa bilan ini mai paje, tuk camriep brei pasram tui nyaom, pasram blaoh yaok sa adit gaok gauk klau mbang piah ngak pasiam veik, ginum biai dom kadha halei lagaih, ngak brei siam makre dom panuac daoh Then, sap daoh bingi pang piah caga ka harei pataom".

Lâm Đồng lac tinh Tây Nguyên hu rilo urang bangsa Tày, Nùng daok saong ilamo daoh Then, capi tính hu cak rok meng rilo thun ini mai. Gam haong dom urang dalam kalup kapul daoh Then – capi Tính xã Tân Thanh, huyện Lâm Hà, tỉnh Lâm Đồng tal ban Buôn Ma Thuột parang ma-in, amuk Hoàng Thị Kim, Phó akaok kalup kapul brei thau, taphia dom kadha daoh then meng kan, capi tinh pak Tân Thanh urak ini hu rilo kadha daoh hu cih veik panuac bahrau ka nyu lagaih saong njauk tui bruk urak ini. Abih di nyu nan lac, meng hu dom bruk parang ma-in, taom gaok gauk yau harei pataom daoh Then, capi Tính pak ban Buôn Ma Thuột mbang ini, dom urang hu thau tal rilo kadha daoh then bahrau, ngak parilo jang bruk ngak di kalup kapul:

"Dahlak mboh biak bui sambai, mboh kadha halei jeng gheih, bingi pang, jeng hu rilo makna. Dahlak caong lac urang daok sa palei haong gauk tame pak ini piah taom gaok, piah ba drei tame, piah ngak randap, bac magru, ndem mayai nao mai saong daoh saong gauk biak bui sambai. Dom adei saai jeng hu hatai takre, mai pataom gauk saong tal urak ini padang kapul, nao halei parang ma-in lac dom adei saai jak gauk nao".

 Sa bruk njauk caik hatai dalam harei pataom mbang ini, lac bruk tabiak mbaok di dom “nghệ nhân sit” daok ranaih umo min thau daoh then biak gheih, bingi pang. Kamuan Dương Bảo Châu, umo 9 thun, daok pak ban Buôn Ma Thuột, lac sa dalam 2 urang dalam kapul umo sit abih di kapul Buôn Ma Thuột, hu mbaok dalam 2 kadha daoh pakacah di harei pataom ini. Dương Bảo Châu khan lac:

"Anek takre ragu then meng amuk nan ye anek meng bac, amuk pato anek ma-in capi. Dom panuac Then hu ba mai ka anek bui sambai, anek biak takre. Anek meda parang ka  urang iek, pang kadha daoh then di bangsa anek".

 Tui taong yaom di Mban peih bruk, yaom lac hu dom bruk ngak bahrau, daoh then di dom kapul kapul dalam Harei pataom jeng daok khik hu bruk trang nghiêm, brei mboh veik suan yava adat cambat di kadha daoh then. Rilo kapul hu sahneng duah bahrau dalam parang me-in, brei mboh hu makna di panuac daoh, hu bruk pambuak gauk di dom rai dalam yaok kadha daoh. Bruk nan brei mboh daoh then capi tính jeng daok hu khik ramik, patagok dalam raidiuk di rahra. Amuk Phạm Thị Hải Bình, Phó akaok mban peih bruk harei pataom brei thau:

"Dom kapul tut angan hu mbaok tame ba mai biak rilo jalan parang me-in saong asal kadha jeng hu biak rilo janih. Jeng caong maong lac meng dom mbang pataom daoh then capi Tinh ini, mikva bangsa Tày, Nùng, Thái di dalam ban Buôn Ma Thuột jeng meda khik ramik saong patagok dom yaom glaong ilamo di bangsa drei. Gam haong nan, pambuak haong cak rok du lịch piah ba jien mek tame ka baoh sang saong ka puk palei". 

Harei pataom ilamo daoh Then - capi Tính ban Buôn Ma Thuột mbang ka 2 haong rilo bruk parang ma-in ilamo ini di dom bhum palei pak Tây Nguyên, lac tuk piah ka urang bangsa Tày, Nùng di Đắk Lắk jeng yau di Tây Nguyên patui veik mayaih khan ka Inem krung ilamo di bangsa drei. Bruk ini hu daong paglaong yaom glaong ilamo jang yau pabak hatai pachreih piah ngak jeng dom kapul urang patui veik khik ramik saong patagok dom yaom glaong ilamo siam gheih ini ka rai hadei, ngak brei gheih mekre jang blah rup thaot ilamo meng kan pak Đắk Lắk saong abih bhum Tây Nguyên./.