Puac thun 2020, jaik 50 baoh sang daok di puk Cao Biền, xã Phú Thượng, huyện Võ Nhai meng hu jalan điện negar. Cao Biền jeng lac labik puac abih dalam tỉnh oh daok bruk oh hu điện. Bruk ini hu brei mboh jak jeng di Danak dak pabak dien palei pala tỉnh Thái Nguyên, tukvak 2016-2020. Saai Triệu Thị Sinh, daok di puk Cao Biền, xã Phú Thượng, huyện Võ Nhai ndom lac: " Triệu Thị Sinh “Dahlau deih pandar thủy điện sit piah truac hadah min oh pandar hu ka tu laar. Meng tuk hu điện drei biak uan tabuan, drei nao blei chip tu laar piah caik pandap mbang".

Ong Triệu Phúc Tiến, Akaok puk Cao Biền, xã Phú Thượng, huyện Võ Nhai, khan lac: “Hu Đảng, Kanja katung điện mai tal puk Cao Biền khol dahlak hulin biak chreih chrai, uan tabuan. Ini lac bruk caong maong yaok piluh thun ini mai di mikva bhap bini daok pak ini”.

 Oh lac hu dien, bo rilo sarak bangsa jeng hu tỉnh Thái Nguyên dak padang saong ba tabiak ngak yau ye Sarak daong sara I ốt pacang caga ruak baok takoi, thiểu năng trí tuệ; Danak dak cak rok patagok kinh tế, xã hội bhum An Toàn Khu saong bhum bangsa takik biak kan kandah; danak dak khik ramik, cak rok patagok ilamo dom bangsa takik di tỉnh Thái Nguyên tal thun 2020... Ong Lý Văn Mùa, Bí thư Chi bộ palei Lũng Luông, xã Thượng Nung, huyện Võ Nhai, mboh lac: “Tapa dom danak dak jeng hu daong ka mikva tabiak truh kan kathaot jang yau padang ngak dom ilamo siam mekre di mikva, di puk palei”.

Bahrau ini, Sarak ka 39 di UBND tỉnh Thái Nguyên “Tacei tabiak bhum padang urang jakar ka dom bangsa daok dalam gah pilih ruah tame dom sang bac phổ thông bangsa gam bac gam daok di pak ini”, jeng lac sa sarak lagaih, hu samar drah lang talaih dom kan kandah tuk tabiak adat bahrau hu dom xã, puk palei lac biak kan kandah hu patakik veik. Ong Nguyễn Thái Nam, Phó akaok Ban Dân vận Tỉnh ủy, akaok Mban Bangsa tỉnh Thái Nguyên dahlau deih, brei thau:  “Nyaom roya Đảng bộ tỉnh Thái Nguyên hu ba tabiak jalan ngak praong lac kham marat 8% anek saih bangsa takik hu nao bac di dom sang bac bangsa gam bac gam daok. Tapa Sarak ka 39 gah pato magru hu pilih ruah ginup anek saih”. 

Mayah thun 2016, tỉnh Thái Nguyên daok 48 xã biak kan kandah ye tal abih thun 2021, dom baoh sang kan kadhah hu trun 70%, dom baoh sang kan kathaot bhum bangsa takik saong bhum ceik trun 3% yaok thun. Abih thun 2021, dalam tỉnh Thái Nguyên hu 73/100 xã bhum bangsa takik saong bhum ceik mek hu tanut chuan palei pala bahrau, rilo jang 3 mbang duk haong kuhria rah tapa dalam taneh ia. dom bruk siam lagaih ini brei mboh dom jak jeng meng dom sarak bangsa đặc thù, siam lagaih, patabiak meng bruk di anak meta, sarak samar drah di tỉnh Thái Nguyên./.