Bruk ngak mbang duah jien di palei urang haong rilo kan kandah, min pabak veik, drei hu mikva di Mũi Né klaah raba, anit ranam

Daok di kreh dom talei phun la-u angaok jalan Huỳnh Tấn Phát dalam khu phố 5, phường Mũi Né, ban Phan Thiết, tỉnh Bình Thuận lac dom baoh sang kathaop taik tahak hu urang ngak kan kathaot padang tagok piah hu labik tame, tabiak. Jaik abih dom urang nan jeng lac urang Cam mai meng tỉnh Ninh Thuận.

Saai Kiều Thị Năm asal daok di palei Thành Tín, xã Phước Hải, huyện Ninh Phước, tỉnh Ninh Thuận mai pak ini daok meng lavik mai. Sang saai oh hu hamu taneh, oh hu phun jien, saai tok nao ngak pah piah duah jien mbang tapa harei: “Dua diuk pasang haong 3 urang anek daok pak ini 15 thun paje. Sa urang anek bac tal 12, sa urang anek bac tal 10, daok sa urang anek tra bac blaoh tame Sài Gòn ngak Cty paje. Di palei oh hu taneh riya, drei tame ini mboh ngak mbang hu. Nao trun tasik cakaong ikan, urang likei gilam patau. Thei pah hagait drei ngak nan.”

Bruk ngak mbang duah jien di palei urang haong rilo kan kandah, min pabak veik, drei hu mikva di Mũi Né klaah raba, anit ranam. Amuk Trần Thị Hương daok di khu phố 5, phường Mũi Né, ban Phan Thiết, tỉnh Bình Thuận – lac urang daong ka 6 baoh sang urang Cam padang ngak sang kathaop dalam taneh di sang amuk. Amuk Hương brei thau, dalam sa mbang nao darak gaok adei saai cakaong pandap daong pablei kaya ikan di darak Mũi Né, sua tangi meng thau dom urang ini gaok kan kandah nan ye amuk hu daong dom urang ini: “Jeng lavik paje, drei mboh anit nan yte drei brei ka dom urang ini daok. Tuk nan rilo lô, min urak ini nao abih paje, daok veik 6 baoh sang min. Drei jeng hu daong ka dom urang ini duah jien mbang cai, duah hu brah, oh mek jien hagait.”     

Diuk pasang saai Võ Tấn Thành saong saai Võ Thị Kiều Mai Ly daok di khu phố 15, phường Mũi Né, TP. Phan Thiết lac sa dalam dom baoh sang gaok kan kandah di pak ini. Saai Mai Ly daok matain anek ka 4. Dua diuk pasang jeng oh hu bruk ngak tani tanat, nan ye tuk halei jeng kurang ank, kurang likuk. Anek kumei kacua di diuk pasang saai Mai Ly njauk klaak bac meteh dhi. Patuah lac, hu bruk ba tangin tame di karja saong dom urang ngak pahla nan ye sang saai hu daong ngak dom harak gar yau ye: harak khai sinh, hộ khẩu daong ka anek likei lac Võ Tấn Đạt ( umo 8 thun) saong Võ Tấn Kiệt (umo 6 thun) hu nao bac. Gam tui di nan jeng daok hu ramik ngak pasiam baoh sang sit sot, taik tahak meng lavik mai. Saai Lan Anh, lac urang ngak pahla brei thau: “Sang di dua diuk pasang ini biak rambah, oh hu hagait, jaman ruak tian, ia pandar yaok harei jeng kurang. Langiu di nan, dom harak gar tui rup yau ye sổ hộ khẩu, harak khai sinh di dom anek jeng oh hu, nan ye njauk daong dom bruk nan. Urak ini jeng patuah hu daong ka 2 kamuan hu nao bac”.

   Ong Bùi Ngọc Lâm – Akaok UBND phường Mũi Né, TP. Phan Thiết brei thau, khu phố 5 urak ini hu 11 baoh sang urang Cam di tỉnh Ninh Thuận mai pak ini daok tạm trú, sang gaok kan kandah. Tukvak tapa, karja jeng hu daong ka dom baoh sang ini, daong ka anek di urang hu nao bac, plaih bruk klak bac: “Phường jeng hu sanka daong brei, pagap yau daong brah, pandap mbang dalam tuk gaok kan kandah. Mikva pak ini jeng eng drei nao ngak duah jien diuk hu. Rilo meng lac daok dalam umo ngak bruk, hu dom sang hu anek sit mai tui. Jalan ngak di kanja palei lac taong abih dom uranaih di pak ini jeng hu nao bac. Mayah gaok kan kandah, dalam palei jeng hu sarak, danak dak piah daong ka dom adei, dom kamuan.”

  Urak ini ban Phan Thiết hu 483 sang kan kathaot, 756 sang jaik kathaot. Taeng di phường Mũi Né hu 48 sang kathaot, 156 sang jaik kathaot saong rilo sang jeng daok biak kan kandah. Dalam thun 2022, ban padang hu 9 baoh sang ka urang kathaot; alin brei 20 baoh lanieng ndih ka sang kan kandah. Daok dom anek saih kan kathaot, ban jeng hu brei jien bac dalam thun bac bahrau, dalam nan hu gam sinh viên đại học.

  Ong Nguyễn Nam Long – Phó akaok UBND ban Phan Thiết brei thau lac, piah daong ka urang kan kandah hu tani tanat raidiuk, yam tagok tabiak truh kan kathaot khang kajap, dom jabat, dom mban, dom gah, kapul nyaom di ban Phan Thiết kham merat pathau khan, jak ba rahra ba tangin tame daong: “Ban jeng hu jak ba dom doanh nghiệp, dom urang ngak pahla jang yau pato tacei dom puk palei daong brah, daong pandap panda ka mikva gaok kan kandah piah tani tanat raidiuk. Saong bruk ngak ini njauk ndem lac dom puk palei, dom kapul nyaom di ban hu ngak gam gam.”

Caong lac, meng bruk ba tangin tame di dom pakat karja saong rahra, raidiuk di mikva urang kan kathaot lac urang Cam daok di phường mũi Né, TP Phan Thiết, tỉnh Bình Thuận meda hu tabiah truh kathaot khang kajap, rik daong paglaong raidiuk../. 

Urang lang: Thu Thao – 17/10