Ini lac sa jalan taong phat biak bahrau, hu rilo anek saih saong amaik ame brei thau lac siam saong ndung bak bruk pato pakai. Vũ Hường, urang vak daok di TP.HCM hu kadha vak ndem ka bruk ini:

Quang Anh, anek saih bac tal 11 sang bac THPT Bùi Thị Xuân, lac sa dalam dom anek saih daok njauk taong phat puac tapuk – vak hatai sahaneng, chreih chrai khan lac, dahlau deih tuk ngak suan adei saong dom ayut saabat meda njauk nao ngak bruk công ích yau ye puh ramik sang vệ sinh, uak sang saong adei mboh oh takre jalan taong phat ini. Min, meng di tuk taong phat tui jalan puac tapuk ini, Quang Anh biak pachreih tui. Jeng meng nan, adei thau lac sang bac drei hu rilo baoh tapuk siam piah puac, saong tuk oh njauk taong phat adei jeng tagok gilang tapuk piah duah puac: “Harei dahlau adei puac baoh tapuk “Little stories” pataom veik dom dalikan katut meng sap Anh, sang bac jeng ieu lang sap veik, meng nan adei pasram hu ilamo sap Anh di drei, daok daong ka drei thau cambaih jang ka dalikan. Kayua vak, nan je drei jeng thau cambaih rup drei jang, drei jeng thau makna bo dalam dalikan caong khan tal urang puac tapa dom baoh tapuk nan. Adei mboh hanjul, adei oh khin ngak suan veik. Adei mboh jalan taong phat ini lac biak siam.”\

Langyah ka bruk pandar jalan taong phat ini, ong Huỳnh Thanh Phú, akaok Sang bac THPT Bùi Thị Xuân brei thau, hadei di tuk taduan hu khau tin anek saih ngak suan meda ngak bruk công ích, ong sahaneng saong duah jalan taong phat bahrau piah lagaih haong saman ini, tui jalan pato pakai di sang bac. Blaoh meng nan, jalan taong phat puac tapuk hu tabiak rai. Tui ong Phú, anek saih brei hu tukvak piah ngak randap haong jalan taong phat bahrau ini, lavik lavik nao, mayah ngak yaok harei, yaok adit, dom adei meda njaom tame meng bruk puac tapuk tal hatai sahaneng thau ka ilamo văn học. Ong Huỳnh Thanh Phú ndem lac: “Drei ngak yau nan jeng lac piah ka dom adei plaih atah di smartphone, hu rilo tukvak ba drei tame haong bruk puac tapuk. Daok jalan taong phat anek saih, dahlak sahaneng lac drei njauk roh duah, pamaong tal bruk pato pakai jalan sahaneng. Taong abih dom jalan taong phat dahlau deih, dahlak sahaneng lac drei njauk salih.”

Tui Tiến sĩ tâm lý Đào Lê Hoà An, dom jalan taong phat, lac piah ka anek saih smboh hu bruk ngak oh njauk di drei, meng nan salih tui jalan siam makre. Saong yaok jalan ngak jeng hu kein lagaih mayah dalam tuk peih ngak, dom adei mboh hu dom bruk ngak suan, piah pasiam veik, cak rok patagok rup pahap di drei dut saong dahlau deih.  “Ini lac sa dalam dom bruk biak njauk ngak di sang bac phổ thông piah daong ka dom anek saih thau bruk padang hu dom yaom glaong siam makre, meda ngak jeng dom hatai siam makre di drei. Meng nan, dom adei sahaneng mboh hu bruk ngak, jalan ngak siam makre dalam raiidiuk di drei.”

Min jeng hu dom anek saih maong jalan taong phat ini jeng daok biak hanjul, abih di nyu nan lac dalam sang bac njauk padang hu hatai iek praong kỷ luật.  Saai Thuý Quỳnh hu 2 anek daok tui bac di Sang bac Bùi Thị Xuân ndom lac: “Jeng caong khin dom sang bac hu dom jalan ngak ini, gam haong nan hu dom jalan daong ka dom adei thau,  tuk sang bac hu pandar jalan taong phat siam lagaih ini. Meng jalan ngak siam lagaih yau nan, dom adei meda sahaneng mboh saong salih jalan sahaneng.”

Bruk taong phat anek saih meng jalan puac tapuk saong vak hatai sahaneng lac jalan ngak bahrau, pamaong tal yaom glaong siam makre, daong ka anek saih cak rok patagok, hu thau dom khau tin kein, lagaih meng tapuk./.