Sa-ai Đinh Văn Quân, umo 47 thun, urang bangsa Thái daok di xa Mường Nhé (Dien Bien), khan lac: Dahlau diah, baoh sang sa-ai saong mikva diuk rai ndam gam tame hamu taneh, pala tangeiy, bei kayau, ba jien mek tame oh hu hadom 1–2 trieu dong/bilan. Blaoh hadei di nan tuk Kapul nyaom Ngak kong katak Viet Nam pambuak bruk saong karja puk palei pathau khan brei thau ka jalan ba me-om hijao taneh mbuan ceik kalu meng phun katak piah patruh eik patrun kathaot. Sa-ai Quân gam saong rilo baoh sang karei khang hatai rik daong taneh piah pala phun katak. Urak ini, yaok bilan baoh sang sa-ai hu jien mek tame tani tanat 6-7 trieu dong, ginup cai pandar mbang huak yaok harei, raong anek mbang bac. Oh lac tok yau nan, urang rik daong taneh daok hu parabha 10% kein laba, mikva thei thei jeng bui sambai. Sa-ai Quân lac: Urak ini rai diuk oh daok cuang kandah kan daman yau dahlau:

“Karei biak rilo, dahlau diah mikva pambu pandiak, rak hajan di langiu mblang hamu, urak ini jeng daok glaih glar min gilac veik hu jien mek tame siam jang dahlau. Phun katak ieu lac sa janih kayau phun ngak kong yau nan ye nyu njauk suai lavik, hu katak tal puac thun ye langiu di jien bilan kuah katak ye daok hu parabha jien rik taneh. Rilo baoh sang mai meng di nan hu jien mbang jien piah brei ka anek mbang bac, padang ngak sang bahrau, blei radaih blei limo…” 

Di dom bhum taneh daok gaok rilo kan kandah yau Mường Nhé, bruk ngak di dom urang ngak mbang blei salih oh padeih di jalan ngak duah mek kein laba, blaoh daok lac yau ye dalikan ka sa bruk ngak brei ka bol bhap rah ra, ka sa bruk ngak suai lavik ndam gam saong labik akaok di palei negar piah gam haong mikva dak padang sa rai diuk bahrau.

Ong Nguyễn Hữu Toàn, Akaok Kompany Katak Mường Nhé, urang hu labaih 36 thun pambuak pagam saong Kompany Katak Phú Riềng, Bình Phước (urak ini ieu lac tinh Dong Nai) khan brei thau: “Khaol dahlak hu tacei ba mai ini ngak bruk meng di Đông Nam Bộ, ba tui ilamu ngak tabiak saong peih ngak bruk khik iek piah rik binah me-om hijao taneh mbuan ceik kalu, ba brei bruk ngak ka urang bangsa takik. Min langik tasik taneh riya pak ini pandiak rilo jang dut haong dom hagait daok saneng.”

Dom urang jakar yau ye ong Toàn saong ayut sahabat, yaom lac dom urang hu rilo thun ngak bruk di bhum atah bayah – thau cambaih dom kan kandah blaoh di puk palei daok gaok. Dalam tuk nan, ilamo di sa binah bhap bani daok bier, ba tal bruk pato pathram ilamu jeng daok gaok rilo kan kandah. Ong Toàn khan brei thau:

“Hu Kompany Phú Riềng ba tabiak ini piah mong iek bruk ngak di Kompany katak Mường Nhé, akaok camereip dahlak jeng saneng kuhria biak rilo, tuk yaom jien mek tame di urang ngak oh ka glaong, bhum atah bayah nan ye jien cai pandar biak glaong, abih di nyu lac pandap mbang saong xăng radaih. Dom kadha ini ngak ka bruk khik takai urang ngak mboh biak kan kandah. Kompany jeng palaghaih abih drei ngak habar bayar jien ginup abih dom sarak gar karja brei mikva ndam gam saong katak kasu.”

Ndom mayai ta-eng di Kompany Katak Mường Nhé, Dien Bien, jeng yau Kapul nyaom ngak kong katak di Viet Nam, tuk halei jeng caong iek yaok urang ngak urang bangsa takik oh njauk lac urang ngak saoh bo daok lac asal gha pasak dalam bruk cak rok patagok urang Ndang, dalam bruk dak padang cak rok patgaok bruk ngak mbang patagok di bhum tapen. Ong Lò Văn Dâm, Akaok puk Mường Nhé (bahrau), xa Mường Nhé, tinh Dien Bien bui sambai khan brei thau lac:  

“Meng di tuk mikva jeng urang ngak katak saong rik daong taneh piah pala, dahlak mong mboh rai diuk di mikva dak harei dak tani tanat, siam jang dahlau di ngak hamu ngak apuh biak rilo. Hu bruk ngak mbang rilo baoh sang tagok hu jien mbang jien piah.”

Angaok jalan me-om hijao dom bhum taneh di tapen negar, thaik binguk siam hatung siam hatai di bhum taneh Đông Nam bộ njaom mbak tabiak prong di bhum mbuan glaong Tay Bac. Meng taneh mbuan ceik kalu tal dom bein phun hijao, meng sa rai diuk kan kandah tal sa rai diuk tani tanat, kaya meda… nan lac dom baoh jeng mek hu di sa bruk ngak cak rok patagok khang kajap, pambuak pagam haong doanh nghiệp saong bhap bani rahra. Nan ieu lac sa kadha brei mboh ka sa bruk ngak mbang ndung bak inem gheih ghang salut mbut, labik “Phú Riềng Bhong” patui veik vak pagam dom dalikan salih bahrau angaok dom canah jalan bhum taneh Tay Bac di palei pala taneh negar./.