Meng hatai chreih takre dom ragam Ariya bangsa Cam blaoh meng rilo thun ini mai, ong Lộ Minh Trung hu nao abih dom palei Cam, sa ta-eng drei duah pataom tui hatai caong khik ramik caik ka rairah urang Cam sa bruk siam gheih di dom ragam adaoh hari puac Ariya bangsa Cam.

Oh lac sa janih ndaom rilo ragam Ariya Cam, ong Lộ Minh Trung daok paneh bahrau rilo kadha Ariya piah brei mboh hatai anit ranam di ong haong bruk khik ramik dom ragam adaoh hari Ariya Cam. Dalam nan, hu kadha ampam pok meyaom Po Nai. Tui ong, Po Nai hu dom palei Cam yau ye palei Ram, Hamu Tanran, Cuah Patih, Katuh… mai pok ndap nda kaya duh Po yaok thun. Ong Lộ Minh Trung, palei Hamu Tanran, xa Phước Hữu, tinh Khanh Hoa brei thau:

“Dalam Ariya Cam hu rilo jalan adaoh hari karei gauk. Drei meda hu hari saong adaoh tui ragam adaoh dam dara jeng hu:

 Seni nghe thuat, hari, adaoh Ariya hu meng suai lavik mai dalam dom mbang daok dang me-in ilamo adaoh tamia di bhap bini dom palei Cam. Dom urang meda hu adaoh di grauk tukvak grauk labik. Urang ngak hamu hadei sa harei ngak bruk glaih glar di mblang hamu ye hu ndih angaok ayun adaoh hari piah var dom rambah rambup di harei ngak bruk glaih glar. Dalam dom adat pacip padhi, adat rija dalam palei pala, dom urang nghe nhan, dom urang chreih takre adaoh hari Ariya taom gaok gauk klah rabha bui sambai, drut druai saong daong ka hu chreih sambai. Amuk Châu Thị Đông, Palei Baoh Hadeng, xa Ninh Phước brei thau:

“Ariya pato adat kamei brei thau daok dang, raong anek bik piah hadei ini nao bac megru”

Dom kadha puac Ariya mbuan adaoh, mbuan hadar, ndung bak hatai anit ranam bhum palei, negar, uranam dalam baoh sang, hu ilamo dalam raidiuk hu dom urang nghe nhan pasram adaoh dalam dom tal bac yau ini lac dom kadha Ariya hu angan hu urang Cam caik meng rai ini tapa rai diah meng yaok rituh thun ini.

Urang Cam di Khanh Hoa jeng daok khik piah 106 kadha Ariya, hu 24 nghe nhan daok adaoh saong 20 nghe nhan pato magru. Min, seni ragam ragu puac Ariya daok mbuan kurang lahik kayua nghe nhan dak harei dak takik, rairah sit thun umo takik sangka maong tal. Ong Lê Xuân Lợi, Phaok Yam ndok Pasak Khik ramik drap ar ilamo tinh Khanh Hoa ndom meyai lac:

“Urak ini, biak mbuan si lahik kadha Ariya. Meyah khol drei patui pato megru akhar huroh bangsa Cam ka anek saih, sinh vien meng pakat 1 tagok tal pakat 3 ye uranaih Cam hu thau akhar huroh Cam saong dom urang nan puac hu dom harak gar ka Ariya Cam saong adaoh hari hu. Min, hu makna abih lac dom nghe nhan adaoh hari Ariya brei pato veik ka dom adei hadei ini.”

Bruk Mentri Ilamo, Pahat padhih saong Jirah rivang mbaoh tangin ka Seni nghe thuat ragam puac Ariya di urang Cam mek hu angan drap ar ilamo oh mboh di meta pakat negar oh lac brei mboh hu iek praong dom ilamo siam gheih di mikva urang bangsa takik, blaoh daok peih tabiak kein lagaih piah Ariya jeng sa janih ilamo – jirah rivang me-in karei, dui pachreih tuai damuai jirah rivang dalam negar saong dunya. Gam haong nan pachreih bhap bini urang Cam saong rairah sit thun umo khik ramik, daong ngak rilo veik ilamo di Viet Nam./.