Labaih 1 thun ini, Sang iek ruak Da khoa labik Ca Mau ba tame pandar dua ki-ot hadah krah di labik tut angan pasang iek saong taong ruak. Oh daok dak talei atah, urang ruak urak ini meda ta-eng tut angan pasang iek ruak, bayar jien saong ngak harak gar karei biak samar drah tok meng dom bruk.

Tui bruk tacei ba di urang ngak di gah y te, urang ruak pabak khau tin, urang oh thau tani tanat ye hu daong pabak khau tin blaoh hadei nan tok brei bah CCCD atau angan QR code piah salah blaoh harak gar. Bruk lagaih mai meng bruk, rahra oh ba tui harak caga bao hiem y te jeng meda pasang iek ruak hu. Bruk ini oh lac daong patrun rilo tukvak cang maong bo daok ngak ka harak gar hu ramik lagaih jang. Sa-ai Mai Tuyết Anh, urang mai meng xa Lương Thế Trân, tinh Ca Mau ndom meyai lac:

“Bayar jien saong ngak harak gar, taong abih bruk jeng hu drah samar lagaih jang. Tok brei bah kat lac bayar jien hu, oh daok kandah kandaiy yau dahlau. Urak ini nao pasang iek ruak tok brei ba tui kat can cuoc, biak lagaih.”

Luac jalan tut angan pasang iek ruak di ki-ot hadah krah tok lahik labaih sa minit, daong sang iek ruak langyah dom bruk oh daong abih hu ka urang saong ba mai bruk duh siam jang ka rahra. Tui kuhria, meng tuk peih ngak, tal ini hu labaih 2.500 mbang urang ruak hu pandar tapa jitvu ini. Sa-ai Nguyễn Như Quỳnh, urang ngak bruk di labik tut angan di Sang iek ruak Da khoa labik Ca Mau, brei thau:

“Hu sa urang ngak bruk brei tacei ba dom mikva praong tut angan pasang iek ruak di angaok ki-ot hadah krah, daong patakik tukvak cang maong di labik pasang iek ruak saong daong urang ruak gaok bac si samar drah jang, rilo meng lac urang praong thun. Langiu di nan, meyah dalam phone di rahra hu ngak tantu angan tanut 2 ye meda hu pandar app VneID piah pabak tame, pasang iek saong taong ruak biak lagaih. Dua jamraik mac moc ini daong patakik ka dom adei ngak bruk tut angan pasang iek saong taong ruak yau meng kal dahlau biak rilo.”

Gam haong ki-ot hadah krah, Sang iek ruak Da khoa labik Ca Mau daok pandar rilo jalan ngak salih lek taka so karei piah ngak lagaih abih bruk pasang iek saong taong ruak. Sang iek uak peih bruk bayar jien oh meng jienmbaok hu rilo jalan ngak karei di yau jamraik mac POS, bah ma angan QR, kadung ndien tu atau bayar jien tapa Mobile Banking. Urang ruak meda mbuan si ruah jalan bayar jien njauk lagaih di abih haong drei. Langiu di nan, majam jeng brei ka urang ruak pasang iek tukvak pagun sanya mai pasang iek ruak veik tapa ung dung VneID, ngak jeng sa jalan tapak meng tut angan tal pasang iek ruak veik.

Tui Bac si CK II Nguyễn Hoàng Phong, Phaok Yam ndok Sang iek ruak di Ca Mau brei thau, sang iek ruak brei thau slaih lek taka so lac bruk njauk ngak brei pamaong tal. Piah mek hu jalan ngak ba tabiak, sang iek ruak hu pandar dom kapul ngak bruk nao rivang me-in, bac megru ilamo di dom sang iek ruak pakat angaok. Meng nan, pataom saong ngak samu abih dom phan mem y te, daong paglaong asar siam jitvu saong ilamo ngak bruk di kapul y, bac si. Sang iek ruak jeng daok kham merat ngak rilo jalan langyah piah bhap bini rahra thau saong pandar dom jitvu y te tapa ung dung ilamo kong nghe lek taka so siam lagaih jang.

“Dalam tukvak anak mai tal, sang iek ruak brei patui veik buh jien tame padang dom janih gah ndap nda kaya kan, ndap nda kaya piah ngak bruk salih lek taka so. Dak harei dak hu pato pakai, paglaong ilamo ngak bruk di urang jakar y te ka ilamo khoa hoc ky thuat. Abih di nyu nan lac, brei patagok lien thong du lieu haong majam y te negar, ngan haong jalan ngak hu makna abih lac mek urang ruak ngak pasak ka taong abih bruk patagok di sang iek ruak.”

Dom takai yam akaok meti di Sang iek ruak Da khoa labik Ca Mau hu brei mboh siam lagaih salih lek taka so ngak tabiak dalam bruk paglaong asar siam sangka prein yava bhap bini. Salih lek taka so daok daong bruk pasang iek saong taong ruak siam jang, brei hu jhul samar pandar dalam gah yte.