Kol dahlak mai ravang sang bac phổ thông bangsa bán trú THCS xã Phước Hà huyện Thuận Nam, tỉnh Ninh Thuận di dom harei puac bilan 11. Bahrau yam takai tame sang bac, abih gauk jeng mehit cambaih sap Mã La yava tagok chreih chrai

Sang bac phổ thông bangsa bán trú THCS Phước Hà ba nhạc cụ Mã La di urang Raglai tame pato ngoại khóa meng thun 2016 saong hu amaik ame di anek saih biak njauk hatai. Sang bac hu pambuak bruk haong dom nghệ nhân ưu tú, taha palei thau cambaih ka ilamu bangsa piah pato pakai. Ilamu hu dom nghệ nhân, taha palei roh duah saong pilih ruah tani tanat dalam gilang ilamu Raglai. Danak dak ini gam pato pasram ilamu diukrai ka anek saih, gam daong khik ramik ilamu meng kan di bangsa, ngak jeng kadha bahrau dalam raidiuk ilamu di urang bangsa Raglai. Urak ini, sang bac daok hu 4 baoh Mã La kayua Kadung jien daong Khik ramik Ilamu bhap bini daong brei.

Sang bac phổ thông bangsa bán trú THCS Phước Hà lac labik pato ka 2 di  huyện Bác Ái padang hu kalup kapul Mã La. Tuk sang bac atau palei peih ngak dom bruk praong lac dom adei dalam kapul daoh tamia ba gauk me-in biak gheih.

Cei gru Đàng Quang Vinh, Tổng phụ trách Đội thiếu niên tiền phong Hồ Chí Minh di sang bac brei thau:“sang bac iek praong dom bruk daoh tamia, me-in sambai lac piah dui pachreih anek saih mai bac rilo jang.

Tui dom nghệ nhân di xã Phước Hà, Mã La hu maong yau pandap ginreih, oh kurang hu dalam raidiuk di urang bangsa Raglai. Tapa ragu ragam di Mã La, urang taih nyu brei mboh hatai thau dhar phor dom yang ceik, yang taneh hu daong ka menuac sia puk palei pala drak njauk, padai, tangei bak jaruk, brei thau hatai thau dhar phor ong muk, amaik ame, but pajaih, puk paga daong ka anek taco hu raidiuk siam mekre, bac da-a naih joi…

Taphia di bruk bac megru jalan me-in alat ragam bangsa Raglai, sang bac daok hu ieu dom adei hu mbaok tame dom kalup kapul pato pakai ilamu diukrai, yau ye: kalup kapul “menuac dang akaok di bruk salih bharau” – piah salih karei jalan maong, jalan sahneng ka bruk lakhah caga, khin likei khin kamei tuk oh ka tal umo thun tui sarak karja, khin gauk dalam but pajaih ralow darah di urang bangsa takik; ngak dom video ka dom kadha pahat rup di tuk padeih padei kreh mong bac; padang ngak dom tiểu phẩm tame pakacah duah thau ka salamat bruk nao amai angaok jalan... Meng nan, daong paglaong hatai sahneng ka bac ta-a di dom adei, gam haong nan, daong ka gru pato kak kajap haong sang bac ini. Ong Ông Bà-Râu Đắc, sa urang ngak di sang bac brei thau:"Dom bruk ngak pahadar harei 26/3 atau harei 20/11, daoh tamia lac dom adei biak takre. "

Langiu di padang ngak dom bruk ngoại khóa pambuak pagam haong bruk padang labik bac siam mekre, anek saih siam mekre, sang bac jeng caik hatai daong palagaih ka dom gru pato kham merat sahneng duah bahrau dalam pato pakai, langyah dom sarak samar drah ka gru pato. Cei gru Bá Vũ Anh Vũ, Phó Hiệu trưởng sang bac brei thau: “Dom gru pato di labik ini jaik abih lac meng atah mai ini pato nan ye biak jum pataom gauk, hatung hatian bui sambai chreih chrai, abih drei ka bruk pato". 

Meng bruk ngak hu  brei mboh lac, bruk ba ilamu bangsa tame pambuak haong paglaong chất lượng pato saong bac di Sang bac phổ thông bangsa bán trú THCS Phước Hà lac sa dalam dom jalan pathau khan, pato pakai biak siam, njauk haong “bruk pala menuac” bo Wa Hồ tuk daok diuk hu pato, kakei./.