Dom bilan puac thun, langik laik la-ar, baoh tatua kraong Vầu pambuak pagam 2 xã Ba-Tư di huyện Đông Giang mbuan si jaoh jaleih njauk vang paga pacang; jalan tạm bahrau ngak blaoh jeng njauk aia sua ba seik. Oh hu jalan, labaih 1 bilan ini mai, dom gru jru di Balai iek ruak xã Ba njauk luai craoh nao ngak. Kan di abih jeng lac bruk pajeng ba, cấp cứu urang ruak dalam bilan hajan ribuk.  

Bác sĩ Phạm Thị Kim Bằng, Akaok Balai iek ruak xã Ba brei thau, Balai hu taduan bruk iek ruak, taong ruak ka labaih 600 baoh sang dalam 2 xã Ba saong Tư di huyện Đông Giang min tok hu 6 urang jakar. Akaok thun ini, 2 urang likau nao ngak labik karei nan ye Balai tok daok 4 urang dang tabiak ngak taong abih bruk meng iek ruak, taong ruak tal bruk cấp cứu, jhik labik njauk rambuis, mbuai urang menek... Urak ini daok dalam tukvak tabung glaong pandiak siêu vi saong pandiak tabiak darah, urang njauk ruak tagok glaong, hu harei tagok tal labaih 40 urang ruak, ngak ka urang ngak dalam bilai ini biak glaih glar. Bác sĩ Phạm Thị Kim Bằng brei thau, bruk dom y bác sĩ iek ruak luac tukvak ngak bruk oh daok lac bruk takik hu: “Dalam bilai Y tế drei daok veik tok 4 urang ngak bruk biak glaih glar, trực melam ye brei hu dua urang meng langyah hu bruk. Urak ini, pasak kurang urang ngak biak trak. Daok angaok bhum ceik rai diuk kan kandah nan ye adei sa-ai ngak bruk thei jeng oh khin. Ngak rilo bruk min  sarak daong ye oh hu. Dom adei ngak labaih 10 thun ini mai bo jien balan tok hu 5 triêụ tal 5 triệu meteh nan ye oh ginup cai pandar.”

Jaik abih urang jakar gah iek ruak di bhum ceik lac menuac daok di bhum taneran tagok. Rilo urang njauk diuk rai tui jalan 2 palei. Pagap yau điều dưỡng Nguyễn Thị Hương Thảo ngak di Pasak iek ruak huyện Đông Giang nan lac sa dalam dom urang yau nan. Baoh sang di Thảo daok di huyện Đại Lộc, kayua jalan mbak nao mai kan kandah saong bruk ngak rilo yaok harei nan ye labaih 10 thun ini mai tal harei puac adit Thảo meng nao sang rivang pasang saong anek sit sa mbang. Gaok tuk mai dalam dom mbang tabung glaong di jit ruak, dom bilan meng nao sang sa mbang: "Hương Thảo “Bruk ngak di Pasak iek ruak huyện Đông Giang biak rilo bo jien bilan biak biar, sarak karja daong daok takik. Caong khin pakat angaok hu bruk daong karei ka dom urang jakar ngak gah iek ruak di bhum atah bayah yau khaol dahlak piah khik takai urang ngak.”

Bác sĩ Lê Thị Quyết, Akaok Pasak iek ruak huyện Đông Giang brei thau, bruk ngak di urang jakar gah iek ruak lac kan, ngan haong urang jakar iek ruak di bhum ceik, bhum urang bangsa takik daok kan kandah jang rilo mbang. Abih di nyu lac, hadei di 2 thun jit ruak Covid-19, dak harei dak hu rilo urang likau  salih labik mai ngak di bhum gah ala, gaok mai klaak bruk  ngak ka urang jakar gah iek ruak di bhum glaong dak harei dak kurang.

Bruk ngak biak rilo saong trak damak, dalam tuk bruk đãi ngộ oh ka pabak haong pren buh tabiak nan lac makna ngak ka rilo urang jakar gah iek ruak klaak bruk ngak dak harei dak rilo di dom puk palei. Ta-eng di tỉnh Quảng Nam, dalam 6 bilan akaok thun ini hu jaik 50 urang y tế likau padeih bruk, ngak ka bruk iek glang pren yava ka bhum urang bangsa takik gaok biak rilo kan kandah. Ong Mai Văn Mười, Akaok Sở Y tế tỉnh Quảng Nam brei thau, gah iek ruak bahrau peih bruk pakacah palih ruah urang jakar gah iek ruak, piah pasiam veik bruk kurang gru jru yau urak ini: “Tukvak tapa, gah iek ruak hu peih bruk pakacah palih ruah jaik 100 bác sĩ saong dom rituh điều dưỡng, dược sĩ Đại học. Tỉnh Quảng Nam jeng hu taom mbaok pachreih adei sa-ai saong iek tui bruk di puk palei bo parabha bruk ka nyu laghaih. Urang pal akaok di dom huyện bhum ceik jeng biak sangka tal bruk ba brei labik mbang daok ka urang ngak daok atah mai. Gah iek ruak jeng daok ba tagok HĐND tỉnh bruk kurang jien mek tame di dom sang iek ruak tuyến huyện. Abih di nyu lac di bhum ceik, kadung jien Karja hu daong ba-yar jien bilan ka urang jakar, urang ngak gah iek ruak."

 Karja saong dom gah chức năng tỉnh Quảng Nam biak caong khin Karja samar hu jalan ngak, sarak palih ruah, daong ka nyu siam laghaih piah khik takai urang ngak gah y tế, abih di nyu lac dom y, bác sĩ daok ngak bruk di bhum atah bayah./.