Ong Nguyễn Văn Việt, Akaok Mban pasang iek di rahra  phường Phước Long A, ban Thủ Đức brei thau: meng bilan 6 thun 2023 tal urak ini, Mban peih bruk pasang iek 9 danak dak ngak jalan, 2 danak dak pasiam veik jabat khu phố saong UBND. Dahlau deih, Mban pasang iek di rahra phường Phước Long A hu pok panuac likau urang pan akaok phường brei padeih ngak  sang bac pakat 2 yaom 40 tỷ đồng ngak suan. Ong Nguyễn Văn Việt haduh hatai lac anak tal oh daok tổ dân phố, bruk ngak dak trak damak jang: "Pasang iek di rahra oh cang hu rilo menuac, tok hu 3 - 5 urang, saong oh huac glaih glar piah ngak, oh nao pasang iek ye ngak habar bo thau hu bruk ngak suan di gah padang ngak. Urak ini, jien brei ka mban pasang iek di rahra oh hu hadom, mayah kayua jien ye kol dahlak oh ngak".

Dang akaok bruk pasang iek di Quận 6 biak lavik, ong Phạm Văn Phú, Phó Akaok Ủy ban MT negar Quận 6 brei thau, bruk ngak di Mban Thanh tra rahra saong Mban pasang iek di rahra lac hu siam lagaih, min jeng daok having akaok kayua ka oh hu tacei tabiak cambaih laih dalam adat hukum. Abih di nyu nan lac bruk pasang iek brei thau hu bản vẽ thiết kế, maong meng mata jeng thau lac bê-tông tuh hu chat luong halei oh: "Dahlak caong lac mayah lagaih ye ieu pataom dom chuyên gia, thau bruk piah pasang iek danak dak padang ngak. Ka dua veik lac phun jien tagok, jhui padeih di bruk daong, bo brei hu adat, njauk biyar jien samu haong prein buh tabiak, ieu pataom hu dom chuyên gia, urang hu ilamo ye chat luong meda hu glaong".

 Ong Lê Minh Đức, Phó Mban Pháp chế HĐ bhap bini TPHCM brei thau: Hukum peih ngak dân chủ cơ sở 2022 tacei lac UB bhap bini pakat tỉnh, huyện njauk padang ngak saong pathau tagok ka HĐND gam pakat patabik dom jalan ngak piah khik kajap bruk peih ngak dân chủ cơ sở pak di labik nan. Meng nan daong ka dom Mban Thanh tra rahra, Mban pasang iek di ka rahra dom jalan ngak, khik ka bruk ngak di drei hu patagok: "Urak ini, kol drei hu caga dahlau kayua hu adat Hukum, njauk patagok, abih di nyu lac dalam tuk TP.HCM daok peih ngak kanja đô thị. Jien sahui ngak bruk di Mban thanh tra rahra saong Mban pasang iek di rahra njauk hu rami ramik, HĐND likau taduan, kayua sarak ini kayua HĐND TP ba tabiak pamaong tame dom adat  hukum, di Rajaei saong di Mintri Jien padai".

Piah paglaong siam lagaih bruk ngak di Mban Thanh tra rahra saong Mban pasang iek di, tui Ủy ban MTTQ Việt Nam TP.HCM, bruk ngak di dom Mặt trận pakat ban, quận lac njauk paglaong bruk pato pasram; Ủy ban Mặt trận negar phường ba tabiak jalan, pato tacei asal kadha pasang iek, meda daong padang jalan ngak, kuhri kuhria phun jien. Ong Phạm Minh Tuấn, Phó akaok Ủy ban MT negar TP.HCM ndem lac: "Yaok thun njauk hu takik di nyu 1 mbang peih bruk pato pasram ka dua kapul ini, piah daong ka dom urang ngak di Mban thanh tra rahra, Mban pasang iek di rahra peih ngak “njauk bruk, njauk kadha”. Hu yau nan meng oh hu bruk pasang iek langiu bruk ba tabiak"

Urak ini Hukum peih ngak dân chủ cơ sở hu ba tabiak pandar saong jeng hu sarak pato tacei jalan ngak, min, meng bruk di TP.HCM njauk ngak brei cambaih jang bruk karei gauk di bruk ngak di Mban Thanh tra rahra saong Mban pasang iek di rahra piah patagok siam bruk ngak di dua Mban saong di dom urang ngak. Gam haong nan, bruk pambuak gauk di Kanja lac biak praong piah khik kajap bruk pasang iek, pacang khik menuac khin ndem, khin ngak saong hu jalan pok mayaom cambaih laih./.