Raok Tết min jeng oh var ngak tui panuac pato tacei di Mintri piah pacang caga jit ruak Covid - 19

Sa-ai Lê Văn Chiến daok di ban Thủ Đức (ban raya Hồ Chí Minh) khan lac, sa-ai haong dom urang dalam sang thei jeng hu klauk meng 2 tal 3 mbang vaccine pacang caga COVID-19. Tết Nguyên đán ini, sang sa-ai daok kuhria nao ma-in Xuân dalam harei, pak di ban drei daok. Bruk nao rivang, tadhau ayuh Tết dom sang ayut sahabat, gauk gar but pajaih daok hu sa-ai sahneng kuhria. Min sang sa-ai jeng oh nao tadhau ayuh Tết ginup abih dom ayut sahabat, gauk gar but pajaih yau tukvak oh ka hu jit COVID-19, abih di nyu lac dom baoh sang hu urang prong thun, hu rilo ruak dalam rup, ranaih sit oh ka klauk vaccine piah pacang caga bruk oh patuah drei jeng menuac pambak ruak, ba ruak mai ka sang bo drei nao rivang.

Daok sa-ai Nguyễn Thị Hải daok di ban sit Phú Mỹ, tỉnh Bà Rịa-Vũng Tàu brei thau, hu tapa blaoh rilo harei brei daok atah di gauk, njauk daok veik sang mac piah ngak bruk tui jalan “3 di labik”, diuk pasang sa-ai biak bui sambai kayua lac urak ini jit COVID-19 di daok pasang iek hu siam. Yaok harei, hadei di tuk ngak bruk, diuk pasang sa-ai meda mai veik sang iek glang dom urang anek. Palei daok di gah langiu ban Hà Nội, Tết thun ini, diuk pasang sa-ai oh nao palei mbang Tết bo daok veik Bà Rịa-Vũng Tàu, labik hu rilo ayut sahabat, mikva puk palei rilo thun kak kajap haong gauk. Min tui sa-ai Hải, Tết thun ini, dom bruk pataom gauk raok thun bahrau, palao thun klak, mbang menyum uan thun bahrau di labik sa-ai daok, hu dom baoh sang ginum biai, njauk gauk peih ngak sit, takik menuac, atau peih bruk tadhau ayuh Tết, “me-in sambai online” di dom baoh sang piah pacang caga jit.

Daok sa-ai Trần Long, Yam ndok sa doanh nghiệp di quận Tân Phú (ban raya Hồ Chí Minh) khan lac: “Puac thun dahlau tuk palao dom urang ngak nao palei mbang Tết, công ty hu ngak sa van mbang menyum sit. Dahlak tuk halei jeng oh van kakei adei sa-ai oh “kateik” gauk menyum. Yaok urang jeng hu sa jalan rami ramik, nao sang meng taxi atau radaih buýt hadei di mbang menyum blaoh, plaih rah tabiak dom bruk pandik harao meng peih radaih hadei di van mbang menyum”.

Khaol drei jeng oh sahneng lac, hu klauk ginup vaccine pacang ruak, hu pren yava siam atau lac hu njauk COVID-19 blaoh bo var klak dom jalan ngak piah pacang caga jit. Kayua lac, hu rah tapa blaoh dom harei, bilan brei daok atah di gauk biak glaih glar kayua jit COVID-19, mong mboh, thau hu cambaih laih dom kan kandah saong dom metai lahik, pandik pandua kayua jit ruak, dak thau jang bruk njauk ngak tui dom jalan pacang caga jit. Hu yau nan, Tết haong khaol drei meng biak biai lac dom harei siam mekre, bui sambai dalam tuk diukrai lagaih haong bruk siam mekre, salamat, khik kajap bruk pacang caga jit COVID-19./.

Urang lang: Jasi – 28/01