Gam haong nan jeng brei mboh bruk sangka di Đảng, Kanja brei ka bhap bini daok di bhum ceik saong bhum biak kan kandah. Bruk ini biak njauk ngak, hu Đảng, Kanja sangka saong daok brei ngak dalam tukvak anak tal. kadha vak di urang vak di rayo sap ndem Viet Nam ka bruk “Piah sarak brei mbao ka bhap bini bangsa takik patagok hu kein laba”.

Tukvak meng thun 2019 - 2021, 19 jabat mbao, tạp chí hu kak kajap haong bruk ba tabiak saong jalan pathau khan; bhian pabak tame dom khau tin bahrau njauk haong bruk di anak meta, salih bahrau asal kadha saong jalan ba khau tin, paglaong asal khau tin, kadha vak, thaot binguk, brei thau cambaih ka yaok gah dalam raidiuk di mikva bhum bhap bini bangsa takik saong bhum ceik. Min jeng daok hu dom kan kandah yau ye dom kadha vak ka oh lagaih haong akaok sahaneng, ilamo saong hatai caong di mikva. Dom tinh, ban, abih di nyu nan lac di pakat xã, palei ka oh khik ramik siam dom ấn phẩm; bruk pasang iek ka oh hu peih ngak gam gam…

Akaok Mintri, Chủ nhiệm UB Bangsa Hầu A Lềnh khan, bruk caong hu di mikva lac biak praong min dalam tuk ngak daok hu rilo tavak tavaiy, ngak kan kandah tal bruk peih jien brei: “Tal harei ini, hu jao phun jien di Danak dak bruk ngak paje, dalam nan hu binah ka 10, UB bangsa hu pato tacei dom jabat chuyên môn pasang iek veik saong patui bruk peih danak dak ini meng kadung jien kanja di thun 2022”.

Bahrau ini, Ủy ban Bangsa hu pambuak bruk haong dom mintri, dom gah, gam haong UBND dom tinh, ban peih ginum biai online pakat negar brei panuac ka dự thảo Danak dak “patui bruk peih ngak sarak brei dom ấn phẩm mbao, tạp chí saong roh duah salih bahrau jalan pabak khau tin lagaih haong bhum bhap bini bangsa takik saong bhum ceik, bhum biak kan kandah” tukvak 2023 - 2025. Di nyaom biai, Mban bangsa dom tinh, ban jeng hu panuac caong UB Bangsa patui veik likau Thủ tướng rajaei brei pabak bo oh mek jien mbao, tạp chí ka bhum bangsa takik saong bhum ceik tukvak 2022-2025; tagok dom blah mbao ka kapul chính trị - xã hội puk, palei, dom Sang bac bangsa gam bac gam daok; Gam haong nan, brei peih praong bruk pabak brei dom jabat ngak bruk bangsa dom pakat, urang jakar ngak bruk bangsa pakat xã.

Tui amuk Hoàng Thị Hạnh - Thứ trưởng, Phaok Chủ nhiệm UB Bangsa, urak ini UB Bangsa hu panuac brei salih bahrau gah asal kadha, jalan pabak khau tin lagaih haong bruk di bhum bangsa takik saong bhum ceik, bhum biak kan kandah. Dom khau tin, dom kadha vak praong di dom blah mbao, tạp chí hu pandar công nghệ puac tự động meng sap Yuan saong dom sap bangsa piah pabak khau tin samar drah tal dom puk palei nao mai kan kandah, tal yaok rahra, jabat khik ramik tapa phone par tangin, komputer saong dom pandap pang – iek karei karei: “Bruk brei thau di khol drei njauk kham merat jhul khang jang, mbuan thau jang, jaik haong mikva jang, lagaih haong adat cambat, tanarakun di mikva, piah ka mikva halain hatain klah rabha. Brei thau camriep abih njauk ndem tal mbao ndem, mbao thaot binguk. Rayo papar binguk Viet Nam, rayo sap ndem Viet Nam jeng hu dom kênh meng sap bangsa takik piah ka mikva bangsa mbuan pang, mbuan thau, langiu di nan mbao in njauk hu rilo jalan ngak karei di gauk, abih di nyu nan lac thaot binguk, sap ndom panuac puac….”

Pambak tame bruk cak rok patagok di báo chí rilo janih, anak tal, sarak brei harak báo ka mikva bangsa takik njauk ngak ka nyu lagaih jang, pasiam bruk mbao, tạp chí in suai tal tangin urang puac, oh daok ndung bak bruk thời sự, khik piah lavik yau meng blaoh di dom labik. Oh lac pabak khau tin tal bhap bini bangsa takik bo sarak daok njauk daong ka rahra dalam taneh ia saong di dunya hu pabak jalan piah thau ka bhum bangsa takik biak samar drah, siam makre, njauk bruk, siam lagaih, kein laba di bruk brei thau hu paglaong./.