Ini lac bilan padai hu makna praong dalam bruk ngak padai di bhum taneran kraong Cuu Long

Tui dom urang ilamu, bruk rami ramik bilan pala saong brei trun pajaih aval, lagaih ka dom bhum njauk ia mbak njom tame yaok thun di dom tỉnh tapen tasik meda khik hu ginup ia ka ngak padai saong trun takik dom khat lahik meda tamuh tabiak. Bhap bini tuk halei jeng caik hatai sangka glaong di abih piah khik ka bilan padai hu siam mekre, kein laba. Langiu di nan, di bilan padai ini, dom tỉnh ban saong bhap bini brei caik hatai tal dom janih ruak kik halak halin palai kaik saong dalam bilan Đông Xuân tuk langik la-an, hu ia kakua ye brei caik hatai tal ruak đạo ôn di tuk tabiak dhar.

Meyah bhum taneran kraong CL hu ia mbak njaom tame aval di bilan 12 saong dui atah mbiah tal bilan 4 ye tukvak ini oh hu phun pala di mangaok mblang hamu. Kayua yau nan ye, dom tỉnh ban brei ngak njauk tui tukvak ba tabiak, brei trun pajaih samu gauk, ngak tui yaok bhum, yaok mblang hamu.

Tui Tổng cục Thủy lợi, meng prein pabak ia yau urak ini, di tuk tabung glaong di abih, ia mbak meda njaom tame tal 4 tỉnh tapen tasik haong mbaok taneh praong abih tih jaik 60.000 ha. Kayua yau nan ye, dom tỉnh ban ini brei hu jalan pala drak ka nyu lagaih haong bruk di ia, brei trun pajaih aval di dom mblang taneh oh caga hu ia taba.

  Ong Lương Văn Anh, phaok akaok Tổng cục Thủy lợi brei thau, tal tukvak urak ini, daok biak aval piah kuhria mboh hu cambaih bruk ia mbak njaom tame dalam bilan thu thun 2022-2023 kayua ia mai bhum taneran kraong CL daok pagam pambak tame biak praong ia nduac meng gah angaok kraong Mê Kông. Min dom tỉnh ban oh brei iek lap:”Dalam bilan pandiak bhang, ia njaom mbak thun anak brei ngak njauk tui bruk kuhria mboh dahlau ka halau ia saong dom bruk pambuak tal ia meng bhum tapen tasik tame tal dalam. Kayua lac nyu biar jang yaok thun min jeng hu 60 – 70km rah tui dom kraong praong, kol drei brei caik hatai tal bruk peih, kreik dom công trình thủy lợi, khik siam mekre, salamat di abih. Dalam tuk ia praong, ia njaom mbak ye kol drei brei kreik dom cống veik, ngak habar brei khik hu salamat dalam labik pala drak.”

Ong Lê Quốc Doanh, Thứ trưởng Mintri ngak nong saong patagok palei pala khan lac, dalam bilan padai ini, dom tỉnh tapen tasik brei trun pajaih njauk tui tukvak ba tabiak lac jaik 400.000 ha piah plaih njauk pandiak bhang haong ia mbak di puac bilan saong dom mblang taneh daok veik brei trun pajaih dalam bilan 11 saong trun salah abih dalam bilan 12.

Sa dalam dom bruk praong bo dom tỉnh ban njauk caik hatai sangka lac patrun patakik pajaih tam drak. Urak ini bhap bini daok patrun patakik pajaih min jeng daok suai damuai, ba tal palai pajoa asar pajaih , ngak brei tabiak rilo khí nhà kính saong lagaih ka ruak kik halak halin tamuh tabiak. Anak bruk yau nan, Thứ trưởng Mintri ngak nong saong patagok palei pala Lê Quốc Doanh ndom lac, brei patrun patakik pajaih dalam tam drak, pandar ilamu kỹ thuật dalam pala, ngak, abih di nyu lac khak drak, jru khik caga phun pala: “kham merat trun pajaih aval, daok pandar pajaih hagait ye tal urak ini kol drei hu biak rilo pajaih padai, takik harei, hu năng suất, chất lượng glaong ye kol drei pilih ruah dahlau pajaih siam hu chất lượng glaong, pablei tabiak negar langiu saong pala ngak mbiah piah pabak mbiah ginup ka darak pasar.”

Ini lac bilan padai hu makna praong dalam bruk ngak padai di bhum taneran kraong CL, bilan padai ini brei năng suất chất lượng glaong abih dalam thun, rik daong biak praong tame bruk pablei brah tabiak negar langiu di Việt Nam. Kayua yau nan ye, dom tỉnh ban brei ba tabiak “lịch thời vụ” tui njauk panuac ieu kakei piah plaih di pandiak bhang, ia mbak saong kurang ia pruh di puac bilan. Gam haong nan, brei pataom tame pambak praong dom bruk hu kein laba glaong dalam pala ngak, yau ye: “Mblang hamu praong”; “3 trun 3 tagok”, “1 ngak, 5 trun”, “Khik iek jit palai kaik meng công nghệ sinh thái”, takik pajaih tam drak piah takik hu ruak kik halak halin saong khak drak pamaong tal bruk ngak padai tui jalan hijao, khang kajap, piah pabak tanut di dom darak pasar, brei mboh angan je brah Việt Nam di mangaok darak pasar dunya./.

Urang lang: M. Phương – 03/10