Tết daok mai jaik tal, min bac báo, pang rayo, iek tivi, amuk Phạm Thị Hoa, sa urang ngak po 47 bilik brei pah di Bình Dương thau lac rilo doanh nghiep oh hu bruk ngak, brei urang ngak padeih bruk, nan ye biak duh hatai. Amuk Hoa khan lac, rilo thun ini mai, thei tagok yaom min amuk jeng daok khik tamo yaom 900.000 đồng sa bilik sa bilan, điện haong ia kuhria tui yaom di karja. Urang ngak halei oh hu jien đóng, amuk brei tavak veik piah sahnang hatai kuhria bruk sang. Amuk Hoa brei thau, amuk daok pilih ruah pandap Tết alin hadiah ka yaok bilik: “Pak ini mikva daok lavik paje nan ye iek yau menuac dalam sang, daong hu hagaik ye drei daong chip. Drei daok kuhria blei pandap hagait ka nyu lagaih ka mikva mbang Tết. Thun halei drei jeng brei, drei sahneng lac drei mbang hadom jeng abih, jien cai hadom jeng abih. Rilo menuac lac sang brei pah labik daok bo daok brei pandap Tết, min drei sahneng lac sang halei brei jeng hu, nan ye thun halei drei jeng brei".

 “Amaik Nguyệt”! lac angan anit ranam bo urang ngak, urang pah bilik daok di phường Phú Lợi, ban Thủ Dầu Một ieu amuk Lê Thị Nguyệt. Dom urang ngak di labik sang pah hu 10 bilik di amuk jaik abih lac menuac daok meng lavik thun ini mai. Thau lac rilo menuac lahik bruk ngak, amuk brei trun meteh yaom jien pah sang, samu 450.000 đồng sa bilik sa bilan. Trần Thị Ngọc Nhã (umo 40 thun, palei daok di An Giang) lac urang ngak di Cty TNHH jhik Kim Long. Meng tuk Cty takik hu bruk ngak, jien bilan di sa-ai daok 5 triệu sa bilan min, oh ginup payua nao palei daong ka pasang blei jru tavao ka amaik taha ruak kik saong raong 2 urang anek sit. Hu amaik Nguyệt daong brah, pandap mbang, trun jien pah bilik daok dalam tuk kan kandah, sa-ai uan tabuan lô: “Kol dahlak daok pak ini hu po sang iek yau menuac dalam sang nan ye mboh biak patuah. Oh thau labik karei hu daong yau ini halei oh? Dahlak caong lac dom po sang brei pah, mboh urang ngak lahik bruk jeng trun meneing jien pah bilik daok piah ka urang ngak trun meneing naong trak".

Amuk Nguyễn Kim Loan, Chủ tịch Liên đoàn Lao động tỉnh Bình Dương brei thau, thun ini, dalam tỉnh hu jaik 290.000 urang ngak lahik bruk atau takik bruk, jien bilan trun daok takik nan ye raidiuk gaok biak rilo kan kandah. Kayua yau nan ye, bruk klah rabha lac bruk daong prein piah ka urang ngak hu prein yam tapa tukvak kan kandah, raok sa Tết chreih chrai:  “Gah Công đoàn biak thau dhar phor dom po sang brei pah hu pachreih tui panuac ieu di gah công đoàn, brei mboh hatai siam di menuac Bình Dương. Caong lac, anak tal, meda hu rilo jang dom bruk klah rabha, daong prein di rilo po sang brei pah, dom kapul nyaom, menuac urang piah gam haong gah công đoàn, haong tỉnh Bình Dương daong hu siam jang ka urang ngak”.

Piah ka urang ngak hu Tết, dom pakat công đoàn di Bình Dương daok kuhria alin hadiah jaik 83.000 pok pandap, yaok pok yaom 500.000 đồng, abih tih lac labaih 41 tỷ đồng brei ka dom urang kan kandah. Liên đoàn Lao động tỉnh Bình Dương peih bruk “Sruh radaih xuân anit ranam” haong yaom jien tui kuhria lac 20 tỷ đồng piah brei vé harak radaih nao mai ka 5.000 urang ngak daok di dom tỉnh bhum kreh negar saong gah brak nao palei mbang Tết. Daok ngan saong labaih 400.000 urang ngak daok veik Bình Dương mbang Tết, ye hu dom pakat, dom gah mai ravang, alin hadiah pandap, bui sambai raok Xuân.

Taphia bruk kham merat di karja piah ka công nhân, urang ngak hu mbang Tết bui sambai, jeng biak caong hu bruk kham merat di doanh nghiệp. Ini yau panuac thau dar phor urang ngak hu rilo prein yava rik daong tame bruk cakrok, patagok di doanh nghiệp./.