Dalam xã Bom Bo urak ini hu 58 jalan praong, sit, atah abih tih jaik 136km. Meng tuk xã mek hu angan palei pala bahrau di thun 2019, dom jalan dak harei dak hu Karja caik hatai sangka jang, gam haong bhap bini ba tangin tame rami ramik, ngak pasiam, peih praong bruk buh jien tame ngak bharau. Tal urak ini, dalam xã hu labaih 47km jalan nhựa, jaik 72km jalan bê tông xi măng saong labaih 16km jalan patau randaih.

Amuk Hoàng Thị Siêu daok di palei 3, xã Bom Bo brei thau: dahlau daih, Bom Bo lac labik ngak cách mạng, njauk mesruh metak ngak tayah tayac biak khang. Meng bruk jum pataom di abih hệ thống chính trị saong di abih bol bhap rahra, tal urak ini, Bom Bo salih bharau mbaok meta. Jalan điện, jalan radaih, sang bac, bilai iek ruak hu ginup abih, dom dịch vụ xã hội bahrau dak harei dak rilo. Hạ tầng praong siam, raidiuk bhap bini tagok mboh di anak meta, abih di nyu lac karja biak caik hatai sangka tal bruk bac ta-a, pato megru.

Tui ong Nguyễn Đức Đặng, Phaok Bí thư Thường trực Đảng ủy xã Bom Bo, sang bac hu maong lac labik piah daong ngak brei salih bahrau chất saong lượng di xã bhum atah bayah, mek anek menuac ngak pasak. Xã Bom Bo urak ini hu 4 sang bac, lac 1 sang bac mẫu giáo, 1 sang bac tiểu học, 1 sang bac TH&THCS saong 1 sang bac THCS&THPT. Sang bac daok hu padang ngak dom khối phòng bộ môn, bilik ngak bruk hành chính gheih, mekre.

Thun 2019, xã Bom Bo mek hu angan palei pala bahrau. Thun 2022, xã hu UBND huyện pilih ruah ngak iek bruk padang ngak xã palei pala bahrau paglaong, peih tabiak jalan piah kham merat tagok jeng đô thị janihi V. Xã Bom Bo ngak hu ginup abih 20 tiêu chí padang ngak palei pala bahrau paglaong, daong ngak brei salih bharau mbaok mata, chất lượng raidiuk bhap bini.

Sang sa-ai Mai Thị An daok di palei 5, xã Bom Bo bahrau hu alin brei baoh sang anit ranam praong 50m2. Sa-ai Mai lac urang amaik hu rilo anek, oh hu pasang likei, kan kandah ka sang daok, oh hu taneh pala drak. Karja xã Bom Bo hu jak ba daong brei taneh saong jien padang ngak sang. Gam haong nan, jak ba alin brei dom pandap piah pandar dalam sang. Sa-ai An khan lac: Dahlak hu 5 urang anek, sang kan kandah, patuah hu karja sangka, ieu dom urang ngak pahla daong brei. Urak ini amaik anek dahlak hu sang daok khang kajap saong hu ginup pandap piah pandar dalam sang.”

Gam haong bruk daong ka urang kan kathaot, peih ngak sarak daong ka rahra cakrok kinh tế sang, lac bruk ngak gam gam di pakat ủy, karja, dom kapul nyaom di xã Bom Bo. Ong Nguyễn Xuân Hùng daok di palei 8 brei thau: Hadei di labaih 20 thun meng tỉnh Bình Dương mai Bình Phước padang mbang ngui, sang dahlak pilih ruah Bom Bo kayua taneh siam, anek menuac salut mbut, siam hatung hatian. Urak ini sang hu raidiuk tani tanat haong labaih 10 ha taneh pala cao su, pa-ok blait, cà phê, durian haong phun mbang baoh. Tani tanat raidiuk, nan ye ba drei tame dom bruk ngak ka rahra, ka puk palei.

Đảng bộ, karja xã Bom Bo jeng hu ba tabiak dom jalan ngak piah paglaong jien mek tame ka rahra tui jalan pachreih ba, daong palagaih ka rahra liên doanh, pambuak gauk patagok bruk ngak mbang, pala drak, pablei salih, ngak jeng bhum ngak tabiak kaya pandap, pandar ilamu kỹ thuật tame bruk ngak, patagok năng suất, sản lượng, tani tanat raidiuk, rik daong patagok kinh tế - xã hội di palei. Jien mek tame kuhria tui akaok menuac di xã thun 2023 hu labaih 80 triệu đồng.

Mai tal Bom Bo harei ini, hu mboh bruk salih bahrau di sa xã palei pala bahrau, tapa nan brei mboh jak jeng meng bruk rik prein, sa hatung hatian haong gauk di Đảng bộ, karja saong bol bhap rahra. Xã Bom Bo ngak hu blaoh 20 tiêu chí padang ngak palei pala bahrau paglaong saong daok kham merat tal thun 2025 ngak hu dom tiêu chí đô thị janih V. Bruk ngak di anak mata saong suai lavik, Bom Bo daok pataom prein tame ngak piah hu jeng bhum pasak, kinh tế saong du lịch di huyện Bù Đăng./.