Pha Đin jalan ceik huyền thoại nan urak ini hu buh jien tame, pambuak haong dom tỉnh bhum ceik Tây Bắc

Dalam chiến dịch Điện Biên Phủ (1954), gam haong canah klau Cò Nòi, đèo Pha Đin lac sa dalam dom labik jalan nao mai hu makna praong njauk kol thực dân France taong palai biak khang. Kayua kol France mboh lac, mayah cakak hu jalan praong ini, bol bala drei meda gaok rilo kan kandah tuk oh taduan hu ginup bruk daong pandap mbang, phao siu meng hậu phương. Yaom lac njauk kol kamang taong palai biak khang, min meng hatai khang kham marat khik hu jalan daong ka mblang mesruh Điện Biên Phủ, bhap bini saong dom kapul dam dara halain hatain di pak ini khik hu ka jalan tapa ceik Pha Đin tuk halei jeng nao mai hu, daong ka dom phao praong di drei hu salamat tal mblang mesruh, ngak jeng jayah thun 1954 di Điện Biên Phủ.

68 thun nao tapa, ceik Pha Đin ini hu palahik abih dom tayah tayac palai pajoa di mesuh metak caik viek, jeng oh daok nao mai kan kandah yau rilo thun dahlau. Jalan bahrau hu peih praong khik tani tanat ka bruk nao mai, meng nan rik daong praong ka bruk pambuak pablei salih di tỉnh Điện Biên haong dom tinh, ban gah ala.

Ong Lầu A Dùa, akaok UBND xã Tỏa Tình, huyện Tuần Giáo brei thau: meng patagok hu dom kein lagaih di jalan nao mai hu makna praong ini, mbaok meta puk palei bahrau, bruk ngak mbang kinh tế di xã Tỏa Tình hu hadah hadai jang dahlau. Lac labik praong gheih mekre, ceik Pha Đin urak ini daok lac labik ravang me-in chreih chrai ngan haong dom labik du lịch sinh thái hu bhap bini pak ini padang tagok. Meng hu dom kein lagaih gah du lịch, prein khang di kaya nong, bruk tari tarieng kham marat di bhap bini bo dom baoh sang kan kathaot di xã hu trun, kuhria rah tapa, yaok thun trun meng 1-2%, jien mek tame kuhria tui akaok manuac hu labaih 10 triệu đồng sa thun: “Dom thun tapa, bhap bini Tỏa Tình biak kham merat salih phun pala, athur raong hu yaom kinh tế, nan ye raidiuk di mikva hu salih bahrau mboh di anak meta. Mikva biak pachrieh tui bruk cak rok patagok kinh tế xã hội nao gam haong khik caga inem krung sajarah di pak ini. Tỏa Tình hu langik biak siam lagaih, nan ye bruk ngak dom labik du lịch ka tuai mai rivang lac kein lagaih praong ka palei tabiak truh kan kathaot.” 

Ong Mùa Va Hồ, Phó akaok UBND huyện Tuần Giáo, tỉnh Điện Biên brei thau: Urak ini ceik Pha Đin hu jeng sa labik bhong ka bruk du lịch dui  hu biak rilo tuai mai rivang main. Thau ka prein khang nan, peih ngak dom sarak di tỉnh, Đảng bộ, karja bhap bini dom bangsa dalam huyện Tuần Giáo daok kham marat jhul khang bruk cak rok patagok khik caga gilai di pak ini piah ba mai labik gheih mekre cak rok patagok du lịch sinh thái: “Ngan haong Tuần Giáo, jalan ceik Pha Đin ini hu makna biak praong, gam lac inem krung sajarah, gam lac jalan nao mai pablei salih biak lagaih haong bruk cak rok patagok du lịch sinh thái, patagok gilai. Đảng bộ huyện jeng hu Sarak ka bruk patagok kinh tế jang yau patagok du lịch di labik ceik Pha Đin. Bhum palei biak caong khin urang buh jien tame ngak mbang, daong ka pak ini tabiak truh kan kathaot”.

Pha Đin jalan ceik huyền thoại nan urak ini hu buh jien tame, pambuak haong dom tỉnh bhum ceik Tây Bắc saong brei mboh lac labik hu yaom glaong, daong ka Điện Biên Phủ patui jalan cak rok patagok./.

Urang lang: Thu Thao – 07/05