Tok kuhria dalam 6 bilan akaok thun, dalam tinh hu 474 mbang radaih ginuh paoh gauk, ngak ka 215 urang metai, 434 urang njauk rambuac saong ngak khut 745 sruh radaih. Makna praong abih lac kayua hatai saneng di urang nduac radaih angaok jalan daok bier, nduac samar, nduac suan, oh maong jalan mbak. Taphia di nan, bruk mbaih mbaoh di jalan mbak pak dom labik jeng ngak patagok bruk mbuan rahtabiak bala.

Ong Ngô Xuân Đoàn, sa rahra daok pak Ban Dĩ An brei thau, Ong biak duhb hatai ka bala jalan mbak urak ini saong caong dom jabat chuc nang samar drah hu dom jalan langyah siam lagaih: “Canh sat jalan mbak oh njauk lac dang di sa labik angaok jalan piah cang mek radaih taong phạt, kayua rilo tuk dang pak nan oh hu radaih nduac suan min tuk drei nao lac hu radaih nduac suan. Tui dahlak hulin lac ramik caik camera piah phạt hadei, blaoh payua harak gar nduac suan tal sang. Atau lac urak ini hu ung dung Vned, meyah urang peih radaih nduac suan ye khik harak brei nduac radaih di urang nan angaok ung dung”.

Oh njauk lac duh hatai ka bala jalan mbak saoh, rahra jeng daok gaok bruk lahik an ninh dak harei dak rilo jang. Dom bruk klaik mek drap ar, klaik radaih, taong gauk, handaoh mek pandap bhian rahtabiak. Ong Nguyễn Văn Thanh, urang daok di phường Phú Hòa, TP.Thủ Dầu Một duh hatai lac: “Dahlak hulin mboh dom phường di Thủ Dầu Một jeng hu kalup kapul pacang caga urang duas min urak ini mboh jua gindang, adei sa-ai takik nao pasang iek. Công an phường njauk brei ka kapul pacang caga kol duas bhian nao pasang iek piah sumu duah mboh, pacang cakak. Tuk nao pasang iek ka oh mek hu duas ye jeng pagui pateok ka nyu huac bo klak nduac.”

Anak bruk an ninh saong radaih ginuh, paoh gauk rahtabiak srau hadau, urang pan akaok tỉnh hu pato tacei dom gah chuc nang patagok dom jalan langyah piah khik kajap siam makre, salamat ka rahra.

Thượng tá Nguyễn Thị Thanh Nga, Phó Jabat Cảnh sát jalan mbak, Công an tỉnh Bình Dương brei thau, Jabat hu pambuak gauk pasang iek, taong phạt catang dom bruk ngak suan adat hukum jalan mbak, abih di nyu nan lac anek saih nduac radaih oh njauk tui hukum. Jabat jeng pachreih rahra pabak khau tin ka dom bruk ngak suan gah siam mekre salamat jalan mbak piah langyah: “Kol dahlak brei khik bruk pathau khan, jak ba dom menuac urang, dom labik ngak mbang gah pajeng ba tuai damuai, pandap panda tauk bi-ar phản quang gah likuk radaih piah pacang caga bala. Kol dahlak hulin daok brei ramik saong patagok siam lagaih bruk ngak di kapul cơ động langyah bruk radaih ginuh, paoh gauk angaok jalan dalam tỉnh piah daong ka gah cảnh sát jalan mbak dalam bruk khik kajap siam mekre salamat jalan mbak, pacang caga bala jalan mbak saong gar jalan.”

Dalam bruk khik ramik siam mekre, Bình Dương kham marat ieu pataom, jak ba prein khang di rahra. Rilo kapul eng drei khik iek hu padang tagok di dom labik daok di rahra, pagap yau Kalup kapul “6 pagam 1” di phường Đông Hòa, Ban Dĩ An. Kalup kapul oh lac pataom prein tame pacang caga kol ngak duas bo daok sangka tal bruk xã hội, daong ka rahra. Ong Phạm Minh Hiếu, akaok kalup kapul brei thau: “Dalam danak ye jeng hu ba tabiak bruk ngak cambaic laic nan lac bruk ngak ka dom urang nan yau habar, pato bruk ngak atau daong brei masaiy hu phun jien jeng yau duah thau bruk kan kandah. Tapa nan piah jaik gauk jang blaoh urang khan brei thau hatai sahaneng saong mboh lac hu karja palei sangka rilo jang”

Meng dom kham merat oh padeih di karja saong bruk njauk hatai  di bhap bini, bruk an ninh trat tu di Binh Duong hu dom salih karei siam mekre jang. Min, tukvak anak tal, njauk brei salih birau, duah jalan ngak bahrau piah paglaong  kein laba bruk khik brei salamat an ninh trat tu, rik daong dak padang sa tỉnh Binh Duong  dak harei dak siam mekre, salih birau hadah hadai./.