Pambuak haong rilo urang ngak pahla piah daong ka rilo sang kan kandah karei

Tal urak ini, amuk Võ Thị Kim Chi, xã Trung An, huyện Củ Chi, TP.HCM jeng oh ka bhian randap tuk yam takai tame baoh sang bahrau di drei. Baoh sang bahrau hu UBMT neagr, Kapul urang kumei xã Trung An jak ba padang ngak pasiam veik, haong yaom jien 70 triệu đồng. Bruk bui sambai daok hu jang rilo mbang kayua dalam harei taduan hu sang bahrau, Kapul urang kumei xã hu alin hadiah brei sổ tiết kiệm 10 triệu đồng daong ka amuk Chi hu mbuan lagaih piah kuhria ka dom taco nao mbang bac. Gam haong nan, daok hu daong ka amuk Chi duah hu bruk ngak lagaih..

          Pamaong tal bruk oh eik lipa kathaot rambah, oh caik ka ranaih klaak bac, harei halei jeng yau nan, tal mon 1 jala pandiak, sa-ai Đặng Thị Phương Oanh – akaok dhar kapul urang kumei khu phố 3, Phường Hòa Thạnh, Quận Tân Phú caga nao taduan raok anek saih. Anek saih sa-ai taduan raok, lac anek di urang daok pah bilik daok, lac sa-ai Siti Saphy Hani Foah. Piah daong prein ka sang sa-ai Siti Saphy Hani Foah, dalam 2 thun tapa, sa-ai Oanh trun 1 triệu đồng sa bilan jien pah bilik daok. Lingiu di nan, sa-ai daok hu tacei labik ka sa-ai Foah ngak bruk tui mon saong ngak công nhân di sa labik ngak di tư nhân. 

          Sa-ai Oanh daok hu pambuak haong rilo urang ngak pahla piah daong ka rilo sang kan kandah karei. Yaok thun, sa-ai jak ba hu labaih 500 pok pandap brei ka urang kan kathaot. Bahrau ini, sa-ai haong dom urang ngak pahla hu alin hadiah 5 pok pandap (yaok pok yaom 1 triệu đồng) brei ka uraniah metui amaik ame kayua COVID-19 saong daong brei dalam 1 thun 1 anek kamar. Uan harei Dunya Urang kumei 8/3 thun ini, sa-ai haong dom labik daok hu brei 15 pok jien bac ka uranaih sang biak kan kandah.

          Dua bilan jaik ini, hadei di tuk hu tuh bê tông, jalan hẻm sit dalam jalan 182, xã Bình Mỹ, Huyện Củ Chi hu bui sambai, chreih chrai. Sa-ai Nguyễn Thị Nhã – akaok dhar kapul urang kumei palei 1, xã Bình Mỹ chreih chrai khan lac: “Meng harei jalan hẻm hu peih praong, hu tuh bê tông, mikva dalam palei thei jeng bui sambai. Biar harei langik la-an, urang praong pasram thể dục, urang taha tabiak me-in, uraniah juak radiah, bui sambai lô”. Dahlau daih lac jalan hẻm sit, patau, radaih bak abih, pandiak ye thur mur, daok hajan ye gluh baok, sa-ai Nhã jak ba mikva rik jien piah tuh bê tông. Jien ngak tui kuhria abih 70 tal 80 triệu đồng, nan ye yaok sang rik tame labaih 3 triệu đồng. daok kurang hadom, sa-ai Nhã haong chi bộ palei jak ba dom urang hu jien dalam xã daong brei. Jalan hu ngak salah dahlau Tết nguyên đán meng bloh, mikva thei jeng uan tabuan.

          Karei jang huyện langiu ban, dalam labik daok dalam ban, bruk pasiam veik dom jalan hẻm lac bruk oh mbuan. Yaom lac yau nan, min dalam 3 thun tapa, di khu phố 3, Phường Hòa Thạnh, dhar kapul urang kumei hu padang ngak saong khik kajap dom tanut “Hẻm hijao – jalan hacih – raidiuk siam mekre” ka 3 jalan hẻm 428 Lũy Bán Bích, 428/55 Lũy Bán Bích saong 364 Trịnh Đình Trọng.

          Sa-ai Đặng Thị Phương Oanh khan lac: “Dom jalan hẻm ini nerak bak abih, sau raong palao, dhar kapul hu peih bruk puh ramik yaok bilan saong kakei mikva khik ramik hacih sa-at labik jalan anak sang di drei. Rilo urang pachreih tui min jeng hu rilo urang oh khin ngak tui. Min kayua bruk hacih sa-at saong piah khik siam prein yava ka abih gauk, kol dahlak kham merat jak ba”  Piah ngak brei jalan hẻm siam jang, sa-ai Oanh daok nao jak ba dom urang ngak pahla daong brei jien padai, mikva rik prein sơn veik dom daning klak, blei dom thung rác caik anak dom labik hu rilo menuac daok...

          Bruk jak ba “dak padang baoh sang 5 oh, 3 hacih” hu ba mai siam lagaih, daong ka urang kumei dalam kapul hu rilo jang ilamu, thau sahneng jang dalam bruk khik ramik labik daok hacih, mekre, sang danaok siam, sa-at. Tapa nan, rik daong dak padang baoh sang haniem phul saong paglaong siam mekre raidiuk di urang kumei dalam tukvak bahrau./.

Urang lang: Mousa Phương – 08/03