Mik va bangsa takik thau pandar ilamu dalam bruk pala drak 

Meng caga hu ia, mik va Chăm di palei Tuy Tịnh 2, xã Phong Phú, huyện Tuy Phong, tỉnh Bỉnh Thuận peih bruk salih phun pala, athur rong, ba mai kein laba kinh tế glong. Dom mblang padai praong yaok thun 3 vụ; dom bein pa-ok, thanh long… bak boh, dok dong ka bhap bini di pak ni tabiak truh kan kathaot, yam tagok ngak kaya meda. Saai Mai Văn Bình, akaok palei Tuy Tịnh 2 brei thau, abih palei hu labaih 350 sang , urak ni dok 5 sang kan kathaot min:

(Mai Văn Bình: (tiếng Chăm: 30 thun dahlau , rai duik  kinh tế pak ni biak beir, mik va biak kan kandah ….)

Sang ong Thông Tân daok di palei Chăm, ban sit Lạc Tánh, huyện Tánh Linh, dahlau deih hu 8 ha taneh ngak padai song pala njam patam. Hadei di nan, ong salih tapa pala cao su di angaok binah mblang taneh pala padai takik kein laba. Urak ni, phun cao su ba jien tame rilo ka sang ong, yaok mbang kuah katak  mek hu jiak  2 triệu đồng, kuhria tabiak sa thun hu labaih 100 triệu đồng. Boh sang bahrau hu ong Thông Tân padang ngak abih jiak 2 tỷ đồng.

Mai tal palei Lâm Giang, xã Hàm Trí, huyện Hàm Thuận Bắc, rah tui jalan prong vil val palei meda mboh hu cambaih bruk salih bahrau di palei Chăm tapa dom boh sang bahrau hu padang ngak praong, siam, gam haong mbaok meta hadah hadai di bhap bini, hadei di dom bilan pala drak njauk. Ong Khê Thanh Mai daok di palei Lâm Giang, xã Hàm Trí, huyện Hàm Thuận Bắc bui sambai khan lac:  

(Mik va Chăm pak ni biak bui sambai tuk hu karja sangka ….yau nan ye rai duik hu patagok) 

Mikva Cam Bình Thuận urak ni hu 9.041 boh sang gam hong 40.000 menuac, dok di  4 xã: Phú Lạc (huyện Tuy Phong), Phan Thanh, Phan Hiệp, Phan Hoà (huyện Bắc Bình). Dalam dom thun tapa, tỉnh Bình Thuận hu pablak tame dom danak dak buh jien tame ngak cơ sở hạ tầng ka bhum urang Cam 133 bruk haong yaom jien abih tih jiak  60 tỷ đồng. Tal urak ni,, tỉnh hu brei  1.567 ha taneh pala drak  ka 1.439 boh sang urang  Chăm; dong palagaih ka  1.423 sang mesraiy hu 9 tỷ 500 triệu đồng blei jiak  1.900 drei limo menek . Meng nan, sang kan kathaot trun samar, meng labaih  25% (di thun  2004) trun dok labaih  10% (thun  2016 – tui tanut kathaot rilo gah). Hu  3 dalam 4 xã harat  Chăm mek hu tanut palei pala bahrau tuk vak  2016 – 2020.

Ong Nguyễn Minh Tân, Akaok mban bangsa tỉnh Bình Thuận brei thau, oh lac patagok gah  kinh tế, dom gah  y tế, pato pakai bhum urang Chăm dok hadah hadai tagok.

(Tỉnh hu sangka tacei pato dom sở, dom mban, dom gah, dom puk palei  hu rilo urang Chăm peih ngak dom  sarak. Tapa nan, kinh tế - xã hội bhum urang Chăm daok patagok. Dom bruk padang ngak jalan mbak hu sangka buh jien tabiak rilo jang. Tỉnh hu peih ngak 8 danak dak  patagok  kinh tế xã hội song  3 bruk di danak dak  135 song 5 danak dak tái định prong.)

Gam song dom jak jeng hadei di  30 thun padang veik tỉnh Bình Thuận, mik va bhum urang Chăm pak ni dok kham merat yam tagok, rik dong song dom bangsa adei saai ba gauk dak padang puk paga, palei negar dak harei dak siam mekre jang, kaya meda jang./.

Urang lang: Hanipha- 17/9