Palei Đuôi Chuột, xã Tam Lập, huyện Phú Giáo lac sa dalam dom palei atah bayah abih di tỉnh Bình Dương. Meng mbaok taneh praong saong menuac sia daok parai rai, atah di gauk, bruk padang raidiuk ilamu di pak ini bhian gaok oh takik kan kandah. Min meng bruk abih hatung hatian di mban khik iek palei saong bruk pachreih tui di bhap bini, mbaok mata bahrau hu hadah hadai tagaok.

Urak ini tuk mai tal palei Đuôi Chuột, bruk ngak ka urang mboh tatuak drei di abih lac dom jalan sit mbaih mbaoh, bak hareik hareim dahlau daih urak ini hu salih jeng dom jalan hacih mekre, dua gah jalan pala bingu, truac gom hadah saong hu camera an ninh. Amuk Trần Thị Thanh Thảo, akaok mban khik iek palei khan lac, mikva pak ini rilo meng ngak bruk kuah katak cao su, malam ngak harei padeih nan ye piah jak ba mikva tame bruk diukrai hu ilamu siam mekre lac bruk oh mbuan. Min tui jalan ngak lac “hajan lavik njaom suai", mban khik iek ngak hu jak jeng.

 “Rahra pachreih tui ye hu bruk jum pataom saong prein khang biak praong piah peih ngak dom bruk. Bruk pachreih tui di rahra lac hu makna biak praong piah peih ngak. Anak tal brei jak ba abih gauk salih jalan sahneng, jalan diuk rai siam jang saong hu rilo gah cakrok jang piah ka palei Đuôi Chuột dak harei dak salih bahrau, hadah hadai".

Oh lac palei Đuôi Chuột, bo rilo labik karei di ban Thủ Dầu Một jeng ngak hu dom bruk praong dalam padang ngak đô thị văn minh. Dom bruk yau: wifi brei saoh, labik sang daok anit ranam, labik cà phê mesup caik hatai tui pang panuac caong di bhap bini... hu daong paglaong biak rilo siam mekre raidiuk.

Abih di nyu nan lac, bruk ramik ngak jaik 143 ha taneh karja jeng 149 mblang bein hijao mekre, hu ngak meng jien di kadung jien karja haong jien rik daong di bhap bini, hu ba mai labik daok siam ka rahra dalam ban. Taphia nan, bruk pala labaih 200.000 phun hijao hu daong ngak jeng sa ban hijao - hacih – mekre, langik tasik la-an bingi ka rahra dalam ban rilo menuac.

Ong Lư Phương (umo 58 thun), sa urang daok di phường Phú Cường khan lac: dahlak biak njauk hatai haong dom salih bharau di ban:

 “Ramik ngak yau nan, lac biak siam, harei halei jeng hu menuac puh ramik mblang bein haci hacih. Dahlak pagaiy mesup halei jeng tabiak pasram pahat meng mon 4 tal mon 6, biar harei jeng tabiak tra. Pasram pahat rup yau nan ka nyu khang kajap prein yava, dahlau daih oh hu labik pasram, biak glaih glar, daok la lavik oh hu”.

Hadei di 3 thun peih ngak danak dak 02 di Tỉnh ủy Bình Dương ka bruk jak ba hu mbaok tame padang raidiuk ilamu - văn minh đô thị tukvak 2021-2025, jaik abih dom rahra, doanh nghiệp…hu mbaoh tangin sanya ngak dom bruk ka  padang ngak raidiuk ilamu – salih bahrau.

Dalam tỉnh urak ini hu 352 mblang bein, ngak jeng rilo labik me-in, pasram, pahat ka bhap bini. Urang rik prein saong jien ndo tame ngak, tui kuhria lac labaih 1.000 tỷ đồng piah padang ngak dom jalan kiểu mẫu, kuac raok kraong ribaong tahuak ia, padang ar pacang...

Ong Bùi Thanh Nhân, akaok Mban Jak ba tỉnh Bình Dương mboh lac, di yaok puk palei, rahra ba gauk tame ngak dom bruk piah ngak brei mbaok mata ban, palei pala dak harei dak gheih mekre jang. Njauk ndom tal di abih jeng lac bruk buh jien padang ngak papraong, pasiam dom jalan nao mai.

 “Ramik ngak pasiam dom jalan palei, rahra ba tangin tame ngak piah hu mbang tui nan ye rahra biak pachreih tui. Mbaok mata dom jalan palei hu padang ngak dahlau daih, urak ini rahra rik prein tame ngak pasiam veik. Dom jalan bahrau hadei ini hu ngak biak siam, daong padang mbaok mata puk palei piah padang raidiuk ilamu siam mekre di dalam tỉnh”

Tui jalan ngak lac padang sa tỉnh mek anek menuac ngak pasak, labik menuac sia hu daok dalam haniem phul, Bí thư Tỉnh ủy Nguyễn Văn Lợi ndom tal bruk padang sa palei hadah krah, siam mekre, salih bahrau, brei hu bruk hu mbaok di bol bhap rahra. Ong jeng hu panuac ieu ramik pasiam veik dom labik daok di bhap bini tamuh eng tui jalan "Karja saong bhap bini ba gauk ngak” piah patak pataom jien padai saong patagok bruk pambuak gauk dalam bhap bini.

 “Meyah kol drei peih bruk đấu thầu njauk bruk njauk jalan, sa danak dak haong yaom phun jien buh tame ngak abih tih 1.500 tỷ đồng meda daok veik yaom 1.000 tỷ đồng piah peih ngak danak dak hadei di tuk kaoh tabiak dom yaom jien ka thiết kế, khik iek danak dak... Nan ye, piah ka rahra eng drei khik iek, eng drei ngak, eng drei pasang iek, eng drei tui iek saong mbang tui ye yaom glaong gah tinh thần, kaya pandap meda tagok jang rilo mbang”

Meng bruk kham merat glaong saong bruk ba tangin tame di abih bol bhap rahra, jia lac Bình Dương oh padeih salih bahrau saong cakrok patagok, jeng sa ban văn minh, hiện đại, njauk haong angan je, labik dang di sa tỉnh ngak kong praong./.