Sang amuk Huỳnh Thị Hạnh daok di xã Hưng Mỹ, huyện Cái Nước hu labaih 2 ha taneh raong hadang quảng canh. Yaok mbang ia tuh kuac mek di dalam danao raong di sang amuk hu labaih jaik 10 triệu đồng. Min tapi, dom bilan blaoh tapa, jien mek tame meng danao raong hadang di sang gait trun ralo. Oh njuak lac rup hadang takik sit min mada mai meng jien mek tame sang trun ralo. Tui kuhria di amuk Hạnh, yaok bilan hu 2 mbang kuac mek pablei, jien mek tame trun meng 3 – 4 triệu đồng yaok mbang. Bruk ini ba mai biak rilo, kan kandah tal raidiuk, mbang ngui di sang amuk Hanh:“Urak ini hadang pajaih ye yaom jeng daok glaong min yaom pablei tabiak hadang thẻ takai patih pablei bahrau hu meng 60 – 70 ribau đồng/kg. Urak ini oh hu laba hagait, raidiuk, mbang ngui biak kan kandah lo. Pruh jru, pandap mbang jeng tagok yaom, kanja ngak habar piah langyah ye yaom hadang yau ini lac ngak mbang dak harei dak tavak saiy rilo jang.”

Tui Sở Ngak nong saong patagok palei pala tinh Cà Mau, yaom hadang sit takai putih di quý II/2023 trun jien meng 18.000 - 49.000 đồng/kg dut saong quý I; dut saong tukvak masa ini tui meng thun dalau, yaom hadang sit takai putih mboh trun meng 11.000 – 36.000 đồng/kg, yaom tui yaok drei. Daok yaom hadang sú drei praong meng 20 drei sa kg oh trun, min hadang drei sit jang jeng mboh trun khang dut saong masa tukvak ini meng thun blaoh. Ong Nguyễn Văn Đệm, lac rahra raong hadang di xã Thạnh Phú, huyện Cái Nước brei thau lac: “Hadang biak lap, hadang sú janih 30 drei sa kg yaom tok daok 140 ribau daong sa kg. oh thau ngak yau habar, hadang biak lap, hadang sit janih labaih 100 drei daok hu 60 ribau ndaong sa kg, dahlau deih lac 80, gaok mai labaih 80 ribau daong sa kg. pandap panda patagok jang, hagait oh ptagok ye yaom jeng daok khik tamo, min yaom hadang biak bier, trun yaom miat miat.”

Yaom pablei hadang trun khang, oh lac ngak ka urang raong hadang quảng canh lahik jien mek tame bo daok ngak ka dom urang raong hadang thâm canh, siêu thâm canh mbuan gaok bruk khat lahik. Mikva daok gaok bruk pablei jeng oh jeng bo raong jeng oh hu. Ngan haong yaom yau urak ini, rahra kuac mek hadang meda lahik min raong veik bo yaom hadang oh tagok ye lahik biak rilo jang. Ong Trương Nhật Tiến, lac rahra raong hadang di xã Tân Trung, huyện Đầm Dơi brei thau lac: “Yaom hadang trun khang yau nan lac raidiuk kan kandah paje. Kayua drei daok pak ini ngak mbang rilo meng lac raong hadang. Yaom yau dahlau deih ye mikva raong di pak ini jeng daok tani tanat. Min dut saong yaom di urak ini ye lap bo phun jien buh tame biak glaong, nan ye chất lượng raidiuk di rahra oh yau dahlau deih veik”.

Tỉnh Cà Mau hu mblang mbaok ia danao raong hadang praong labaih 280.000 ha. Dalam nan hu labaih 8.000 ha raong hadang thâm canh, siêu thâm canh. Tui Sở Công thương Cà Mau, makna bo yaom hadang rilo mbang trun lac kayua bruk njauk kan kandah di jit ruak Covid-19 saong njauk kan kandah di bruk mesuh metak, dom gah kinh te praong yau ye Amirika saong nagar Putih chau Au jeng lac bruk njauk ngak pambuak tal, urang pandar njauk kuhri kuhria veik bruk pablei salih, prien pablei salih pandar pandap panda, abih di nyu nan lac pandap hadang trun, caong blei trun dui tui veik lac yaom hadang trun.

Pambuak tal bruk ini, UBND tỉnh Cà Mau hu peih mbang nyaom biai piah taoh talaih. Langiu di bruk likau dom gilang pariak langyah, taoh talaih peih lang dom cuang kandah di phun jien ka urang ngak mbnag blei salih, UBND tỉnh Cà Mau jeng hu pato tacei dom jabat ngak mbang duah jalan pablei tabiak ka drei hadang, dalam nan, hu bruk paglaong bruk duah jalan pablei tabiak pandap panda dalam taneh ia./.