Tabiak mbaok di bilan 7 meng blaoh, bruk “salih nerak mek pandap” di Kapul urang kumei quận Bình Thủy taduan hu bruk pachreih tui di adei saai kumei dalam bruk paglaong hatai sahaneng pataom mek nerak tachrauk katak, abih di nyu nan lac adei saai pablei salih di dom darak, dom labik pablei pandap mbang. Amuk Nguyễn Thị Dư, akaok Kapul urang kumei bhum 4, phường Trà An brei thau lac, yaok baoh sang jeng hu kadung nerak parabha nerak hữu cơ, nerak oh ralai hu, ngak jeng thaot binguk gheih mekre ka mikva dalam puk palei ngak tui: “Dalam tukvak bahrau blaoh jeng hu biak rilo bruk ngak piah khik ramik alam môi trường. Pagap yau bruk ngak yaok bilan, yaok adit puh ramik dom labik dalam phường; pataom mek pandap oh daok pandar hu saong urak ini lac pataom mek nerak. Langiu di nan daok hu danak dak pandar ống hút oh ngak meng katak,… pathau khan biak siam ka adei saai kumei.”

Dom harei ini, nao angaok dom jalan dalam ban Cần Thơ, urang jeng mboh  dom mbaik gheng điện hu cih thaot bingu hướng dương gheih mata. Ini lac danak dak “Gheng dien raak bingu” kayua dam dara ban peih ngak. Meng jak jeng di jalan cih rup cih dom thun dahlau, urak ini lac 190 mbaik gheng dien daok ba prein yava bahrau ka ban anak bruk pahadar 20 thun Cần Thơ daok dalam Trung ương. Adei Tạ Anh Thư, sinh viên bahrau bac tamat, hu mbaok tame nyaom 200 urang ranaih cih rup cih di  mangaok mbaik gheng dien brei thau: “Dahlak sahneng lac nyu pambak tabiak khang hu bruk ba gauk tame khik caga alam  langik tasik tal bhap bini, piah tapa nan bhap bini paglaong hatai sahneng ka bruk ngak di drei. Labik darak, labik mbang menyum, kraong, ribaong, tapen kraong ye bhian hu dom labik pataom nerak ye kol drei njauk buh ka nyu njauk labik, kakei gauk ba tangin tame khik caga alam langik tasik piah ka ban dak harei dak hijao, hacih, mekre saong salamat jang.”

Meng bruk ngak lac ba akaok nao dahlau, hadei di tuk ba tabiak bruk di UBND ban Cần Thơ di dah page 22/10, yaok rabau kapul dam dara hu peih bruk ngak hu makna lac puh ramik di binek Hồ Búng Xáng, bến Ninh Kiều; palao 350kg ikan kan di mblang ma-in Hạ Tầng Xanh; sraong nerak rah tui kraong darak angaok kraong Cái Răng; peih bruk ngak “jalan hẽm hijao – hacih – mekre”di taong abih dom phường di quận Ninh Kiều. Adei Phan Văn Danh, sinh viên Sang bac Đại học Cần Thơ rilo mbang hu mbaok tame bruk ngak di alam môi trường di dunya jang yau di bhum palei brei thau lac: “Drei sahaneng lac di ban Cần Thơ ye njauk pabak dom kadung nerak di labik hu rilo manuac. Di dalam ban jang yau di dom labik sang bac ye njauk hu rilo phun hijao halui jang, rik tame khik caga alam môi trường.”

Tui ong Dương Tấn Hiển, Phó akaok thường trực UBND ban Cần Thơ, rah tapa 20 thun padang tabiak saong cak rok patagok, ban Cần Thơ mek hu rilo jak jeng di gah kinh te, ilamo, xã hội… kham marat peih ngak siam bruk khik caga alam moi truong, rik tame padang ngak van minh do thi, palei pala bahrau, palei pala bahrau kieu mau paglaong. Ong Duong Tan Hien khan lac: “Meng dom jalan ngak njauk di dom pakat kanja, bruk sa tangin haong gauk di yaok rahra, di doanh nghiep saong bruk daong abih drei di kapul dalam saong langiu negar, kol drei meda mek hu rilo jak jeng ka bruk khik caga alam moi truong saong ngak trun manieng bruk tachrauk nerak alam môi trường.”

Bruk chreih chrai di dam dara jang yau rilo bruk ngak hu siam lagaih di ban Cần Thơ ka khik caga alam moi truong, jia lac nyu pambak tabiak dom siam mekre, pahadar gauk diukrai siam haong alam môi trường; trun manieng bruk pandar dom pandap katak, kadung nilon, jang yau klak bruk bhian randap klak nerak bal glai bal glo, abih bhap bini ba gauk khik ramik alam langik tasik siam mekre saong sambo hijao di baoh taneh./.