Yau rilo sang raong menuk ada dalam bhum, ong Nguyễn Văn Trợ, po trại menuk labaih 20 rabau drei menuk ralow saong menuk mebaoh di xã Mỹ Tịnh An, huyện Chợ Gạo, tỉnh Tiền Giang, daok dalam bruk yau Yuan lac “tiến thoái lưỡng nan”. Jaik 1 thun tapa, tapon menuk di ong dak raong dak khat. Meng menuk ralow tal baoh menuk jeng trun yaom abih, dalam tuk pandap mbang ka menuk raong tuk halei jeng glaong. Ong Trợ khan lac: “Yaom kaom urak ini biak biar, urang raong menuk khat saoh, oh hu laba hagait kayua yaom pandap mbang tagok glaong lo. Baoh menuk trun yaom, trun meng 700-800 đồng sa baoh. Pandap mbang dang yaom glaong yau ini oh mboh trun, urak ini drei daok ndua naong oh hu jalan ngak halei karei”.

Di tukvak ini, yaom menuk ralow meng 52-77.000 đồng sa kg tui janih,  gà ác yaom 70 rabau đồng sa drei. Baoh menuk mala 2.200 đồng sa baoh, daok yaom baoh menuk gà ác tok lac 1.300 đồng sa baoh, samu meteh yaom duk haong tukvak ini thun dahlau. Dalam tuk nan, yaom pandap mbang brei ka menuk urak ini mangaok mala 290 rabau đồng sa bao, tagok jaik 30% duk haong tukvak ini thun bloh. Oh lac yaom menuk trun bo darak pasar jeng takik blei, urang blei salih jeng takik mai blei, ngak ka rilo sang raong menuk gaok kan kandah, glaih glar.

Oh lac menuk saoh bo dom sang raong vak atau katrau di Tiền Giang jeng laik tame glaih glar kayua yaom pandap mbang raong glang tagok glaong. Amuk Lê Kim Châu, po labik raong vak Nguyễn Hồ, daok di xã Long An, huyện Châu Thành  raong tal 300.000 drei vak mebaoh brei thau lac, baoh vak pablei suai, yaom baoh vak saong vak ralow jeng oh tui samu yaom pandap mbang daok tagok glaong, raong sit sot ye khat. Nan lac oh ka ndom tal jit ruak… Amuk Châu khan lac:“Urak ini raong cim vak khat lo, dak raong dak khat. Vak ralow urak ini lap lo, daok yaom haleik chit lo. Raong hu tapon vak daok mebaoh bo khat miat. Urak ini caong yaom haleik nyu trun urang raong meng caong hu laba, oh hu jalan halei karei”. 

Dalam tỉnh Tiền Giang urak ini hu jaik 17 triệu drei menuk ada, dalam nan tapon menuk gà ác hu labaih 3 triệu 500 rabau drei, meblah jaik 20 % tapon menuk ada di tỉnh. Bruk raong menuk ada pataom rilo di huyện Chợ Gạo, Gò Công Tây, Châu Thành haong ban Mỹ Tho.

 Anak kan kandah, dom sang raong menuk ada, dom gah chức năng di tỉnh daok kham merat pambuak gauk lang talaih kan kandah ka urang raong glang. Dalam nan, iek praong bruk tacei pato, daong palagaih ka urang raong pandar công nghệ glaong tame raong athur, menuk ada, pasang iek hu siam jit ruak. Karja saong gah chức năng hu panuac ieu doanh nghiệp, sang raong glang peih bruk pambuak gauk ngak tui chuỗi. Tiến sỹ Thái Quốc Hiếu, Phaok Chi cục trưởng, iek gah Chi cục raong glang thú y tỉnh Tiền Giang khan lac: “Gah raong glang daok rilo bruk kan kandah bo kan kandah di abih dalam raong glang lac darak pasar pablei tabiak. Tỉnh tuk halei jeng palagaih ka doanh nghiệp hu mbang tui dom sarak di tỉnh, ngak habar tagok hu khang tapon athur raong. Drei tok kakei rahra kham merat pambuak gauk ngak piah tani tanat yaom kaom. Hu pambuak gauk meng hu jak jeng, brei raong glang njauk tui jalan ngak meng hu kaya pandap samu gauk, meng ba tabiak darak pasar hu".

Raong menuk ada hu rik daong praong tame bruk ngak nong di tỉnh, daong pabak pandap mbang siam, hu yaom ka raidiuk rahra. Dom kan kandah dui atah daok kateik trak angaok bara urang raong glang, biak caong hu dom gah, dom pakat sangka, daong duah jalan nao./.