Peih ứng dụng pang Rayo sap ndom Viet Nam angaok phone tangin, tame labik drei takre, caik tanyi pang, nan lac bruk bhian randap di rilo dam dara urak ini. Meng baoh smartphone, hu pambuak internet, meda pang, iek danak dak bo drei takre tuk nao angaok radaih buýt tal sang bac, dahlau di tuk ndih, atau tuk halei lahaiy, daok saoh.

Dom danak dak papar sap, papar binguk di Rayo sap ndom Việt Nam urak ini oh lac tok hu angaok radio, tivi, bo daok hu di angaok rilo labik karei gauk tapa dom ứng dụng OTT di VOV, yau ye: VOV Media, VOV Live, VTC Now, atau angaok báo điện tử VOV.VN, angaok facebook, youtube, spotify... piah urang hu pang, hu maong iek di yaok labik, yaok tuk. Nhà báo Lê Quốc Minh, Tổng biên tập Báo Nhân dân, Phaok akaok mban Tuyên giáo Trung ương, Chủ tịch Hội Nhà báo Việt Nam ndom lac: bruk Rayo sap ndom VN tui jalan pandar kong nghe số dalam ngak báo lac jalan nao njauk: 

"Rayo sap ndom VN biak khang hatai dalam bruk pandar dom kong nghe bahrau, hu dom takai yam biak khang kadang dalam tuk salih. Jalan ngak ini di Rayo sap ndom VN lac jalan nao njauk. Urang pang dom danak dak di Rayo sap ndom VN oh gaok kan kandah kayua bruk salih karei dalam tuk salih bahrau kong nghe báo chí bo daok pambak tabiak hu praong jang, abih di nyu lac ngan saong dom urang pang rayo daok di negar langiu".

Salihsố oh lac salih gah kong nghe, gah jalan ngak, bo praong di abih, nan lac salih gah jalan sahneng, meng pakat khik ramik, pan akaok tal dom labik, dom binah di bruk ngak tabiak saong parabha sản phẩm báo chí. Thau hu yau nan, yaok urang jakar, urang vak, biên tập viên, kỹ thuật viên di Rayo sap ndom VN tuk halei jeng caga dahlau, duah thau saong pandar kong nghe số dalam ngak tabiak dom sản phẩm báo chí. Nhà báo Vũ Thị Tuyết Mai, akaok mban Ilamu- Xã hội (VOV2) brei thau: 

"Ngak dom sản phẩm báo chí, asal số ye oh lac di sa kapul urang vak peih ngak asal số, bo taong abih dom phòng chuyên môn jeng brei ngak. Kadha ini jeng nao gam haong bruk dom urang vak, dom urang biên tập di VOV2 brei salih jalan sahneng dalam jalan ngak, dalam bruk ngak. Kol dahlak oh lac ngak dom kadha dalam samar drah, pabak dom khau tin, dom bruk praong pambuak tal bruk ngak di drei angaok web saong page".

Tui ong Vũ Hải Quang, Phaok Taong Yam ndok Rayo sap ndom VN, urak ini, Rayo hu padang ngak Danak dak nền tảng số papar sap pakat negar piah padang hạ tầng số hu siam lagaih saong dalam tukvak samar drah di abih. Salih số ba mai ka Rayo dom siam mekre bahrau nan lac ba papar sap meng kan mai jaik jang, taom gaok tapak saong pabak hatai caong di urang pang hu samar jang, min jeng hu rilo cuang kandah brei hu langyah dalam dalam tukvak tal: 

"Bruk praong di kol dahlak urak ini, lac daok padang sa hạ tầng số, piah ka taong abih dom ứng dụng ka dom bruk ngak di Rayo sap ndom Việt Nam, meng bruk khik ramik gah harak gar, jien padai, menuac ngak saong menuac nao duah khau tin, kadha vak khik piah papar sap jeng hu ngak angaok nan saong pandar sa cơ sở dữ liệu haong gauk. Dalam nan, biak caik hatai tal bruk ba pandar dom  prein khang di trí tuệ nhân tạo, piah langyah, pataom veik tin, bài brei thau ka urang pandar pabak hatai caong tui hatai takre di urang pang".

Lac gah brei thau dang akaok di taneh ia, haong ginup 4 janih báo chí lac báo in, báo điện tử, papar sap saong papar binguk, Rayo sap ndom Việt Nam daok kham merat nao jaik saong dui pachreih urang pang, urang maong iek di rilo gah karei gauk angaok mạng haong dom sản phẩm báo chí chreih chrai di abih. Labik halei hu menuac pang, menuac maong, menuac iek, labik nan hu Rayo sap ndom VN – lac sap ndom di taneh ia, sap ndom di bruk biak,  bruk tantu, cambaih laih, sap ndom di bhap bini, sap ndom di hatai caong siam mekre./.