
Dahlau abih, brei mboh bruk ba drei ngak dahlau saong dom rik daong di Kapul Urang Kamei Viet Nam dalam bruk peih ngak dom bruk hu pambuak tal lakei kamei. Bruk ba drei ngak, siam lagaih dalam bruk padang ngak saong abih di nyu nan lac bruk ngak hu meng bruk bayar phun jien siam hu brei mboh prein ngak saong pagun sanya khang kajap di he thong Kapul. Dom kham merat ini hu ngak tabiak dom salih siam mekre akaok meti ka urang kamei saong uranaih bhum mikva urang bangsa takik saong bhum ceik, daong ngak lagaih jalan ngak “Oh luai ka thei daok gilac gah likuk” saong ngak jak jeng jalan ngak pakat Negar ka bruk lakei kamei samu gauk tukvak 2021-2030.
Yaom lac mek hu dom jak jeng, bruk peih ngak Danak dak 8 saong dom bruk ngak pablak tame lakei atau kamei karei hu mboh dom kan kandah njauk taduan kuhria veik piah hu jalan langyah ka lagaih.
Tui ong Phùng Quốc Huy, Phaok Jabat Dui ba Trung uong Danak dak pakat Negar, sarak tacei ba pasang iek yaom lac biak tantu cambaih laih ngan haong labaih 200 tanut (dalam nan hu labaih 70 tanut pambuak tal lakei kamei), min gilac ngak tabiak sa naong trak ka pakat di labik. Di pakat xa saong huyen (tukvak I), urang jakar ngak bruk biak takik, oh tal urang ngak piah pataom mek, kuhria taong abih saong pathau khan dom du lieu praong yau nan. Gam haong bruk nen tang salih lek taka so oh ka samu gauk, ba tal bruk kurang du lieu, ngak ka bruk taong yaom bruk lakei kamei oh njauk. Ong Phùng Quốc Huy jeng tacei tabiak dom kadha daok “oh ka lagaih” di sarak.
"Dalam bruk padang danak dak, rilo danak dak thanh phan karei jeng hu vak “caik dahlau ka urang kamei”. Min, nan meng lac jalan ngak, daok biak nao oh ka thau “caik dahlau yau habar”. Bruk ini ngak ka khol drei oh mada salih nyu jeng sa tanut lakei kamei cambaih laih dalam dom danak dak nan piah mada hu dut iek saong taong yaom."

Piah truh tapa dom kan kandah nan saong paglaong bruk lakei kamei samu gauk dalam Danak dak paket Negar, tukvak anak tal lac tukvak di bruk ngak tapak. Brei pasang iek piah pataom prein ngak tame dom asal kadha, bruk ngak hu brei mboh hu siam lagaih, salih ka bruk lang dak. Njauk ndom tal lac, brei caga tani tanat bruk pagam dom asal kadha ka urang kamei tame dom danak dak karei. Meyah oh hu bruk rabha saong pasang iek jien padai karei, cambaih laih lac, bruk “neh sit” kadung jien ngak kan kandah ka bruk kuhria taong abih saong bayar jien. Khik tani tanat sa kadung jien karei ka dom danak dak hu makna di Kapul Urang Kamei lac sa jalan ngak brei kuhria tal. Daok bruk ba tagok panuac likau tagok bruk rabha pakat saong jao bruk ka bhum palei, ong Phùng Quốc Huy ndom meyai lac:
“Brei patrun jien padai khik gilac di Trung uong, salih di nan lac jao tanut saong prein ngak rilo jang ka labik. Bhum palei lac labik tapak peih ngak saong thau cambaih laih abih ka hatai caong tapak, kayua nan jao bruk ka gah nan brei hu daong ka dom danak dak hu ngak njauk saong siam lagaih jang”.

Maong taong abih lac, piah paglaong bruk lakei kamei samu gauk dalam Danak dak pakat Negar, tukvak anak tal brei lac tukvak salih meng dom jalan ngak haong gauk tapa dom jalan ngak kuhrai hu, meng bruk pataom tapa jao bruk ka labik. Bruk ini khik kajap yaok phun jien buh tame jeng ba mai bruk salih saong karo kajap ka raidiuk di urang kamei saong uranaih bhum mikva urang bangsa takik, daong ngak jak jeng Jalan ngak pakat negar ka bruk lakei kamei samu gauk tukvak 2021-2030./.
Viết bình luận