Di anak mblang sa baoh hotel pakat glaong di pasak ban Nha Trang, dom baoh li-u siem kanduh hijao maong iek gheih meta hu parang di kadai baoh kayau duh ka tuai damuai. Di angaok baoh li-u lac sa ma huruh QR sit, mboh gheih meta. Tuk bah mah QR meng phone, urang pandar meda duah thau ginup khau tin ka labik pala, luac jalan sangka pala, harei paik baoh, jalan pajeng ba. Dom baoh li-u ini mai meng labik 5 hecta di ong Nguyễn Phi Trường, daok di xa Tây Ninh Hòa (dahlau diah ieu lac xa Ninh Tây, ban sit Ninh Hòa klak), bhum taneh thu, taneh srau saong cuah, njauk ka bruk pala li-u tui jalan huu co. Bruk pagam ma QR oh lac ngak tantu cambaih laih ka ndap nda bo daok ngak jeng bruk karei ka ndap nda kaya nong bhum palei. Ong Nguyễn Phi Trường brei thau: “Khol dahlak jeng daok kham merat ka tuai damuai thau lac: li-u di Ninh Hòa karei saong li-u gah Pei yau habar, Khol dahlak hulin ruah pajaih karei, pala tui jalan huu co, nan asar siam saong pahe bangi jeng karei. Pandar ilamo kong nghe oh lac piah pablei ndap nda bo daok piah khan sa kadha – lac memenyum sa baoh li-u lac thau hu ka ilamo pala phun li-u, thau ka bhum taneh Ninh Hòa saong dom khau tin pagam saong yaok baoh li-u cambaih laih.”

Sa-ai kamei Nguyễn Thị Ngân, daok di xa Khánh Vĩnh hu gaok kan kandah dalam bruk pablei baoh kruac bung tuk jit ruak ngak ka bruk pablei tabiak klaih klaoh, padeih. Sa-ai marat hatai salih tapa jalan pablei tui livestream, peih papar tapak di bein piah yaih khan ndap nda. Urang blei meda iek yaok baoh kruac bung, pang yaih khan tani tanat blaoh blei. Hu var livestream tagok tal 10.000 mbang urang iek.

Meng bruk livestream piah patruh kan kandah, sa-ai Ngân urak ini peih Kongti TNHH Pablei tabiak blei tame baoh kayau saong ngap nda kaya kan meng bruk ngai nong Ngân Nguyễn, yaok thun pataom blei hu labaih 800 tan baoh kruac bung meng labaih 300 ha taneh di urang ngak nong dalam bhum palei. Ndap nda urak ini hu ma QR piah thau mai meng halei, tem nhãn angan je, hu tanut OCOP 3 patuk, daok kham merat tagok 4 patuk saong pablei hu di rilo tinh, ban dalam saong langiu negar. Sa-ai Nguyễn Thị Ngân jie dalam hatai lac: “Hadei tuk khol dahlak hulin thau ka salih lek taka so, hu livestream rilo jang saong tapak pambuak haong tuai blei, ye gilac hu gaok veik rilo kan kandah. Kan abih lac di bruk kadung, thaik langiu, saong rilo meng lac bruk pajeng ba – ngak yau habar brei ka urang blei hu ndap nda jeng daok that, jeng daok bangi abih. Nan lac sa bruk ngak, brei ka dahlak hulin njauk pasiam yaok jalan ngak saong abih di nyu nan lac njauk pambuak hu taong abih dom gah: meng paik baoh tal pajeng ba, jao brei ndap nda kaya kan”.

Salih lek taka so daok peih tabiak sa jalan nao bahrau ka ndap nda kaya ngak nong di bhum ceik Khanh Hoa, bhum taneh hu gaok rilo kan kandah dalam bruk pablei saong pambuak darak pasar. Dom janih baoh kayau hu angan yau ye durian, kruac bung, li-u… dahlau diah rilo meng lac pablei tapa urang ikak kaiy meda hu pablei tapak ka urang blei angaok rayak intenet, tagok darak pasar online, yaih khan tapa nen tang lek taka so.

Ong Nguyễn Ngọc Sơn, Phaok Yam ndok So Bangsa saong Agama tinh Khanh Hoa maong yaom lac, peih ngak Sarak 57 di Mentri Politik Chinh tri ka bruk patagok ilamo khoa hoc, kong nghe, salih hadah krah saong salih lek taka so negar di labik lac kein lagaih ka salih lek taka so di bhum ceik. Min, hu makna abih lac salih jalan sahaneng: meng ngak tabiak ndap nda salih tapa kinh te gah ngak nong, meng ndap nda tapa angan je ndap nda, meng urang ngak nong tapa urang pablei salih gah ngak nong. Tuk nan, ndap nda kaya nong bhum ceik meda hu par atah, dang karo kajap di darak pasar dalam saong langiu negar. Ong Nguyễn Ngọc Sơn khan lac: “Rilo dam dara urak ini jeng thau pandar ilamo jamraik ngak kong lek taka so piah pablei ndap nda, min daok tukik. Khol drei brei padang saong dak harei dak padang jeng angan je praong khang. Tuk nan, meng hu lac ndap nda di drei hu nao tal tangin urang blei pandar, hu dom urang nan je tame. Pablei ndap nda tui online siam lagaih  hu makna abih jeng lac asar siam brei ka ndap nda, nan ka meng lac bruk ngak hu angan makna di abih”./.