Tagok bhum taphia negar padang mbang ngui hu rilo thun, sang sa-ai Lê Thị Hẹ, daok di puk Cỏ Quen, xã Phú Lợi nan lac sa dalam dom baoh sang kan kandah di palei. Pasang sa-ai Hẹ jaoh jo meng sit, oh ngak bruk hu, sang tok hu 2 công taneh, naong trak bruk duah jien saong raong anek mbang bac yau caik abih tagok dua gah ba-ra  di sa-ai Hẹ. 3 thun dahlau, meng hu mbaok tame kapol urang rik phun jien payeng tui bilan yuak padai, sa-ai suak sam hu phun jien jaik 50 trieu dong, buh tame ngak mbang, patagok kinh tế. Urak ini, tuk hu tabiak truh angan sang kan kathaot, hu sang danaok tani tanat saong jien mek tame ginup piah raong 2 urang anek mbang bac, dua diuk pasang tuk halei jeng iek praong bruk hu taduan phun jien, iek nan yau prein khang pachreih drei yam tagok, saong daok hu mbaok tame kapol rik phun jien piah daong ka dom adei sa-ai kumei karei. Sa-ai Hẹ khan lac:“Tuk tame kapol hu phun jien ye dahlak blei limo mai raong, daok veik hadom buh tame ngak 2 công padai, mboh cakrok patagok.”

Dalam tukvak camereip bahrau padang tagok, hadei di yaok bilan yuak padai, yaok adei sa-ai rik tame meng 1 tal 2 trieu dong, urak ini tagok meng 3 tal 5 trieu dong sa urang piah daong ka 1 tal 2 urang kumei sang kan kandah hu jien ngak mbang. Urang dalam kapul jeng hu rilo jang, meng 12 urang tagok jaik tal 40 urang. Phun jien 1 urang dalam kapul hu taduan, hu tuk tagok tal labaih 70 trieu dong. Ini lac phun jien biak praong bo dom sang kathaot di bhum taphia negar meda hu nyim bo oh bayar jien laba hagait. Dom urang dalam kapul taduan hu phun jien jeng khang hatai buh tame raong limo, blei khak drak, pasiam taneh hamu ngak padai, atau pablei salih sit, pala njam patam. Meng hu yau nan bo raidiuk dak harei dak ginup meda jang. Dom sang kathaot daok di puk Cỏ Quen jeng dak harei dak trun khang kajap, takik urang gilac kathaot veik. Tal urak ini kapol hu daong ka labaih 20 mbang urang dalam kapul hu phun jien tabiak truh kathaot khang kajap. Sa-ai Lâm Thanh Thúy, urang dalamm kapul urang kumei brei thau: “ Meng phun jien nan dahlak padang hu sang laneing lanoi jang, meyah oh hu phun jien nan dahlak oh hu jien ngak sang praong siam yau urak ini”

Piah hu yau nan, dahlau abih lac meng hu angan je di urang akaok kapol brei mesre phun jien nan lac anai Văn Siêu Cuội, dang tabiak padang kapol mesre phun jien tui bilan padai akaok meti di urang kumei huyện Giang Thành, brei rik jien tame dahlau min oh suak sam bo caik veik ka adei sa-ai kumei karei. Anai Cuội hu pachreih ba, tui iek dom adei sa-ai hu taduan phun jien brei pandar njauk bruk, pataom tame ngak mbang patagok kinh te.

Hadei di sa tukvak katut panak padang tabiak, kapol rik phun jien palei Cỏ Quen hu pambak praong, rilo kapol rik phun jien patui gauk tabiak rai, jeng tui jalan payeng ka gauk tui bilan padai. Bruk urang kumei taphia negar daong gauk ngak mbang patagok kinh te jeng meng nan hu chreih chrai tagok. Muk Tạ Thị Kim Phấn, Akok Kapol Urang kumei huyện Giang Thành khan lac:“ Dahlak mboh bruk ngak nan di adei sa-ai biak siam hadei ini meda pathau khan veik dalam palei jeng yau tacei pato tabiak langiu puk palei, xã karei piah ba mbuan lagaih ka adei sa-ai kumei dalam tukvak anak tal.

Kapol rik phun jien payeng ka gauk tui bilan padai di kapol Urang kumei Cỏ Quen, xã Phú Lợi, huyện Giang Thành, tỉnh Kiên Giang oh lac ba mai rilo kein laba lagaih haong bruk jak ba gauk ngak mbang patagok radiuk di bhum taphia negar, bo daok lac kadha bac megru ka bruk patak pataom, anit ranam gauk tui jalan  sahaneng, jalan diuk rai di Ho Chi Minh hu ba tame ngak tui di bhum palei./.

Urang lang: Ai Nghiem -28/4/2022