Sang amuk H’Sắk daok di palei Mơ Nú, xa Chư Á, ban Pleiku hu 7 urang, daok di dalam baoh sang pakat 4 hu padang ngak meng lavik mai. Pasang amuk H’Sắk oh daok diuk kayua ruak trak, rup amuk daok taeng drei sangka ieik glang sa urang adei di pasang njauk ruak metai mateh rup meng ndih tapui tabiak, yau nan ye raidiuk di gait biak kan kandah, jien mek tame abih di nyu mai meng ngak mbang apah. Piah daong ka sang amuk H’Sắk hu yam tagok, “Danak dak parilo janih mbang ngui, peih praong bruk patrun kan kathaot” hu daong 1 drei limo binai. Amuk H'Sắk biak uan tabuan kayua hadei di 2 thun raong glang, amuk mboh hu jak jeng siam:

Băng: “Thun ini limo amaik hu manek sa drei limo anek, dalam sang mboh biak uan tabuan, dahlak oh pablei nyu blaoh piah raong brei parilo anek limo”.

Tui amuk Nguyễn Thu Hương, Phaok Akaok UBND xa Chư Á, langiu di bruk cak rok patagok bruk raong glang meng anek lamo ine kayua kanja daong brei, bruk patrun kan kathaot di ini daok patagok kein lagaih tapa bruk brei masaiy laba tukik, salih bruk ngak. Klau thun blaoh, xã hu brei 42 drei limo ka baoh sang kan kathaot, daong phun jien piah salih bruk ngak ka 10 baoh sang saong brei ka 8 baoh sang hu masaiy jien mek tukik laba. Amuk Nguyễn Thị Thu Hương brei thau lac.

 “Yaok thun di xa jeng brei ngak dahlau dom danak dak, bruk ngak mbang ngui kayua ban Pleiku saong xã peih ngak daong ka dom baoh sang kathaot, baoh sang jaik kathaot ka gah y te, bac magru, sang danaok daok, masaiy jien mek tukik laba, pato bruk ngak hu ba mai kein lagaih, meng di nan brei daong rik tame tani tanat dalam raidiuk, mbang ngui, patagok bruk pambuak haong dom mayit raidiuk hu mai ka baoh sang kathaot saong sang jaik kathaot.”

Di mata mboh lac, yaok baoh sang kathaot di ban Pleiku tinh Gia Lai hu kan kandah saong hu hatai khin hu daong karei di gauk. Pagap yau ye amuk Trần Thị Phượng, umo 50 thun, daok di palei 4, xa Trà Đa, ban Pleiku, hadei di tuk abih jien padai kayua sangka taong ruak ung the ka gauk gar, dak caong hu rilo bruk daong ba. Yau nan ye, mboh meng kanja xã, kapul urang kumei, dom urang ngak pahla ngak phol hu gam sa tangin haong gauk, daong ka amuk tapa kan kandah. Amuk Phượng oh var hu dom paok jien daong biak praong glaong yau nan, meng yaok var lisei tal sa baoh sang:

 “Tuk kan daman di abih, kanja bhum palei hu daong ka sang dahlak hu sa baoh sang daok, dom mbang, dom gah daong ka dom anek dahlak hu dom var huak mbang harei harei tuk kan daman. Urak ini, dom anek di dahlak kham marat bac magru piah ptruh eik patrun kathaot. Tuk pasang di hulin dahlak ruak trak ye hu xã Trà Đa saong Kapul urang kumei daong brei ka dahlak 5 trieu dong piah biyar jien pah manuac paik cà phê kayua tuk nan dahlak daok pak sang ieik ruak nan ye njauk pah manuac paik, sa pakuah tuk lapa do sa paok praong tuk trei sil, dahlak oh war hu.”

Ong Trần Tấn Quang, Akaok Jabat Kinh tế ban Pleiku, brei thau lac, dom sang kan kathaot dalam ban jaik 0,24%, ngan haong 149 baoh sang urang kathaot. Ban daok patui bruk roh duah, peih ngak rilo bruk mbang ngui lagaih piah paglaong kein lagaih bruk ngak ini:

 “Ngan haong bruk ngak lac kapul dang tapak peih ngak dom panuac pato pakai di ban ka bruk daong mbang ngui ka urang kan kathaot, kapul hu peih ngak jeng biak dom bruk daong ba bruk mbang ngui, pandap panda ngak mbang lagaih haong raidiuk, dak harei dak tabiak truh kan kathaot saong tabiak trun kan kathaot karo kajap. Jabat Kinh tế ban meda daok gam haong UBND dom xa, phuong saong Pasak Mayit ngak nong roh duah, peih ngak parilo janih bruk mbang ngui, lagaih haong raidiuk saong bruk ngak di rahra, paglaong kein lagaih di jalan ba tabiak patrun kan kathaot karo kajap di ban dalam tukvak masa meng anak mai tal”.

 Bruk patrun kan kathaot hu ban Pleiku tỉnh Gia Lai peih ngak yaok mbang gam gam dalam rilo thun tapa. Dalam tukvak masa cak rok bahrau bruk ngak ini hu kuhria tantu cambaih laih tapa bruk brei ngak dahlau langyah dom bruk ka rahra, sang danaok saong bruk mbang ngui, daok dang. Tapa di nan, patagok kein lagaih, prein khang cak rok di ban, jhul khang bruk cak rok patagok ban praong ban raya, kinh tế - xã hội rahra di dalam ban karo kajap, pambuak bruk gam khik ramik langik tasik moi truong alam./.