Kreh jala pandiak khang yau pui khuah di sa harei puac bilan 2, mangaok labik padang ngak di pok thầu XL-9, danak dak pasiam ribaong Tham Lương - Bến Cát - rạch Nước Lên, Phường 13, quận Gò Vấp, kol dahlak mboh bruk jar var ngak bruk di kapul labaih 10 urang ngak. Dalam nan, hu urang peih radaih kuac haluk, urang cakak pasei, urang hàn xì.. Sap jamriak, sap paoh gauk di pasei pasiak yava tagok. Langik pandiak hu tuk mboh yau tagok tal 40 độ min bruk padang ngak jeng daok hu ngak dalam samar drah.

Tui panuac di sa-ai Huỳnh Xuân Đạo, lambaok nhà thầu daok padang ngak, yaom lac langik pandiak biak glaih glar ka urang ngak, min langik pandiak lac lagaih piah padang ngak. Tui kuhria, bruk padang ngak labaih 300m sàn giảm tải abih labaih 3 bilan. Nan ye, nhà thầu brei ngak rilo jang tuk langik pandiak thu piah pabak hu bruk haong gauk: “Adei sa-ai glaih glar min kham merat ngak. Glaih min ngak samar jang bilan hajan. Padang ngak tok caong langik lagaih, daok hajan ye biak kan ngak. Kham merat ngak piah njauk haong panuac sanya haong po đầu tư”

Ong Nguyễn Hoàng Anh Dũng, Phaok Yam ndok mBan Khik iek danak dak padang ngak hạ tầng đô thị TP.HCM brei thau, piah ngak salah saong ba tame pandar di bilan 4/2025 (samar jang 8 bilan duk haong tukvak kuhria dahlau), mBan hu panuac ieu dom nhà thầu salih jalan ngak, oh cang gauk, oh caik tukvak klaak saoh.

Ndom ka bruk ini, di mbang pasang iek tapak labik padang ngak bahrau ini, Chủ tịch UBND TP.HCM Phan Văn Mãi jeng hu panuac lac, brei duah dom jalan ngak, pambuak bruk samu gauk, ngak dalam samar drah bahrau ka nyu lagaih: “Ngak veik tui tukvak bahrau saong tui nan pambuak gauk, oh cang kè blaoh meng ngak mangaok vỉa hè ye lahik tukvak. Bruk hagait kol drei ngak gam gam haong gauk hu ye njauk pataom tame ngak, min oh pambak hagait tal chất lượng di bruk ngak. Nan ye brei rami ramik ngak veik piah dui katut panak tukvak, oh lac ngak samar ngak drah bo chất lượng oh siam”

Dalam TP.HCM daok hu rilo danak dak praong karei di rilo labik yau ye danak dak padang ngak sang ga T3 – mblang kapal haoh dunya Tân Sơn Nhất, Vành đai 3 TP.HCM, nút giao An Phú, hầm chui Nguyễn Văn Linh – Nguyễn Hữu Thọ, peih praong jalan Roya 50, jalan pambuak Trần Quốc Hoàn – jalan Cộng Hòa… Dom nhà thầu jeng daok jhul samar dom bruk ngak meng di tuk akaok thun piah ngak salah tukvak haong gauk. 

Thun 2024, phun jien đầu tư công di TP.HCM daok hu jaik 79.000 tỷ đồng, dalam nan hu jaik meteh brei ka jalan mbak. Ini lac sa bruk biak trak damak ka gah padang ngak bo meyah oh hu dom jalan ngak khang meng tuk akaok thun ye kan ngak truh.

Tui panuac di Yam ndok Sở Jalan mbak pajeng ba TP.HCM Trần Quang Lâm, thun 2024, ban raya kham merat peih bruk padang ngak 16 danak dak saong pok thầu praong. Dalam nan hu rilo danak dak praong bo rahra maong akaok meng lavik mai yau ye Vành đai 2 labik 1 saong 2, tatua jalan Nguyễn Khoái…: “Meng akaok thun kol drei hu padang jalan peih ngak. Abih di nyu lac akaok UBND TP.HCM, akaok mban tacei jalan dom danak dak praong jeng hu ginum biai saong tacei pato taong abih dom po chủ đầu tư padang jalan ngak cambaih laih, tui sơ đồ Gantt brei mboh cambaih tukvak ngak salah di yaok bruk dalam sa danak dak, piah ka dom sở, ngành, puk palei pambuak bruk ngak siam dom danak dak, duh siam jang ka bhap bini, ka bruk patagok kinh tế”

Thun 2024 lac thun bản lề dalam tukvak 2020 – 2025 saong dom tanut ngak, dom bruk ngak ka patagok jalan mbak dalam tukvak ini ngak hu halei oh, lac meng kham merat yam tagok samar dalam thun 2024. Meng dom hatai khang chính trị praong gam haong bruk ba tangin tame bruk meng tuk akaok thun, bhap bini caong lac samar hu mbang tui dom jak jeng bo gah jalan mbak ba mai./.