Công ty TNHH Ngak pandap – Pablei salih saong dịch vụ Hoan Vinh, daok di xã Tân Lý Tây, huyện Châu Thành, tỉnh Tiền Giang lac gah ngak dom pandap jhik khan aw pablei tapa Mỹ. Hadei di jit ruak Covid-19 ladam trun tal urak ini, doanh nghiệp ni gaok rilo kan kandah kayua trun takik bruk ngak, jien sahui buh tame tagok. Hu tukvak oh pablei tabiak hu, khat lahik dui atah nan je njauk cakak trun meneing urang ngak, meng 1.000 trun daok oh ka tal 500 urang ngak.

Urak ini po doanh nghiệp daok kham marat duah bruk ngak, ba bruk ngak piah raong dom urang ngak hu rilo thun kak kajap haong pak ini. Ong Nguyễn Tấn Thanh, Yam ndok Công ty TNHH Ngak pandap – Pablei salih saong Dịch vụ Hoan Vinh brei thau: “Doanh nghiệp kol dahlak jeng daok hu pablei tapa Mỹ min biak takik, trun 60% dut saong dahlau deih. Bruk kan kandah kayua jien sahui glaong, yaom pah urang ngak glaong jang, hu tuk tagok tal dua mbang. Pandap panda di doanh nghiệp daok kandaong, drei kham marat ginum biai piah pablei tapa Mỹ. Pasiam veik bruk ngak ye kham marat tagok jien bilan ka urang ngak, kham marat pablei tabiak piah ba bruk ngak ka urang ngak pambuak haong drei”.

Công ty cổ phần Gò Đàng, di labik ngak kong Mỹ Tho lac doanh nghiep ba akaok nao dahlau dalam gah ngak kaya ikan di tỉnh Tiền Giang jeng oh plaih njaih hu dom kan kandah, tavak tavaiy kayua prein blei di darak pasa negar langiu trun, abih di nyu nan lac Mỹ saong Trung Quốc. Piah khik takai urang ngak, doanh nghiệp ini duah jalan nao ka drei, yau ye: pa-sre jalan ngak, parilo janih dom pandap panda ngak tabiak meng ikan pra, tani tanat bhum raong ikan pra, trun yaom jien buh tame. Di tukvak ini, công ty hu 07 sang mac ngak bruk gam gam, lac caik laar, yaom patagok, manyek ikan, ngak tabiak 50 pandap panda dom janih meng ikan pra saong nghêu, pablei tabiak jaik 80 taneh ia, bhum taneh di dunya, ba bruk ngak tani tanat ka labaih 5.000 urang ngak yaok harei dalam bhum ĐBSCL. Ong Nguyễn Văn Đạo, Akaok Kapul khik ramik gam lac Tổng yam ndok Công ty cổ phần Gò Đàng ndem lac:“Urak ini, gah kaya ikan daok laik trun hadei di jit ruak Covdid-19, yau nan ye Công ty hu caga dahlau bruk pacang caga anak bruk laik trun ini. Công ty jeng daok parilo janih darak pasa, parilo pandap panda, trun manieng phun jien. Kol dahlak daok ngak siam bruk nan, nan ye bruk ngak hu khik tani tanat, urang ngak daok hu tani tanat raidiuk, meda lac kol dahlak daok pataom veik urang ngak dalam tukvak urak ini”.

Meng hu yau nan, meng hadei di jit ruak tal urak ini, dom urang ngak oh trun bo hu pabak veik tal 5.000 urang. Langiu di dom sarak jien bilan, jien thưởng, bảo hiểm y tế, bảo hiểm xã hội, dom urang ngak hu rilo thun ngak bruk, atah sang daok hu ramik labik daok dalam 160 baoh sang kayua công ty padang ngak. Saai Nguyễn Thị Ngọc Thanh, sang daok di xã Vĩnh Kim, huyện Châu Thành, tỉnh Tiền Giang lac urang ngak di xưởng ikan pra phi lê di công ty Gò Đàng brei thau:“Adei ngak bruk pak ini 10 thun, ngak bruk caga dahlau kadung, bruk ngak biak siam, lagaih. Jien mek tame tui pandap panda, jeng tui bilan meng 8-10 triệu đồng, ngak meng maong 6 dah page tal maong 6 bier harei sup. Công ty daok daong jien pah sang daok, jien xăng radaih...  Bruk ngak jeng oh hagait kan, biak tani tanat, adei mboh công ty lagaih haong drei nan ye kak kajap tal urak ini ”.

Tui Sở Lao động - Thương binh saong Xã hội tỉnh Tiền Giang, meng puac thun dahlau tal urak ini, kayua kan kandah di bruk laik trun di kinh te, nan ye hu tal 40 doanh nghiep di dalam tỉnh gaok kan kandah ngan haong labaih 29.500 urang ngak, rilo meng lac di dom gah kalik takhaok, jhik manyim saong pandap mbang. Piah tani tanat bruk ngak ka urang ngak, rilo doanh nghiệp di dalam tỉnh Tiền Giang biak caong maong dom paok daong di Rajaei, abih di nyu nan lac bruk trun manieng jien laba brei masaiy, padeih mek jien sraiy dalam sa tukvak halei nan  meng gilang paraik, bảo hiểm xã hội, nao gam haong bruk pasiam palagaih harak gar hành chính, sangka tal langyah samar drah dom kan kandah tamuh tabiak di doanh nghiệp./.