Sarak Nyaom roya Ndang bo tinh Dong Nai brei thau tal puac thun 2025, tinh hu abih tih 100% xa mek hu palei pala ngak nong bahrau pakat glaong, 25% dom xa salah blaoh palei pala ngak nong bahrau brei iek saong xa Xuân Lộc klak salah blaoh palei pala ngak nong bahrau brei iek.

Thun 2024, xa Xuan Loc ieu lac bhum palei dang dak ka 3 dalam negar dom palei mek hu palei pala bahrau paglaong. Kuhria tal tukvak dahlau ngak bruk karja palei 2 pakat, dom xa Xuân Trường, Xuân Thọ, Suối Cát, Xuân Hiệp saong ban sit Gia Ray (urak ini si pagam tame jeng xa Xuân Lộc) jeng mek hu palei pala brei iek bahrau paglaong.

Bruk jak jeng mai meng bruk kham merat biak rilo di sa majam politik saong bruk ginum prein, sa hatai di rahra. Tal ini, rahra mbang tui bruk jak jeng ini, daong salih mbaok meta palei pala, paglaong asar siam raidiuk. Ong Võ Văn Thuyên, rahra bhap bini di xa Xuân Lộc chreih chrai lac: “Rahra thau lac urak ini mbaok meta palei pala hu hadah, hijao, hacih sa-at, gheih ghang. Labik daok yau nan mikva hu daok, raidiuk dak harei dak hu paglaong nan mikva biak bui sambai”

Tapa pasang duah iek di So Ngak nong saong Alam langik tinh Dong Nai, hadei di pagam, tinh hu 72 xa daok dalam labik palei pala ngak nong. Dalam nan, hu 67 xa mek hu palei pala bahrau, 25 xa mek hu palei pala ngak nong bahrau pakat glaong (hu 34%).

Ong Nguyễn Văn Thắng – Phaok Yam ndok So Ngak nong saong Alam langik tinh Dong Nai brei thau, ini lac bruk jak jeng di rilo thun pataom buh jien tame ngak, gam tui majam jalan mbak, gom truac, sang bac saong balai anak meta hu ngak samu gauk, dom bruk ka jien mek tame, ilamo, alam langik saong bruk ngak mbang ngak hu siam glaong.

Dong Nai daok cakrok patagok khang danak dak “yaok xa hasa janih ndap nda” (OCOP). Tal kreih thun 2025, dalam tinh hu 298 ndap nda OCOP, dalam nan hu 50 ndap nda hu tanut 4 patui, 8 ndap nda hu 5 patuk, tapa tanut hu kuhria ba tabiak meng akaok. Tui ong Thắng, bruk ini bhian gaok dom kan kandah, min gah ngak nong tinh hu truh tapa

“Tukvak dahlau, bruk pilih ruah dom ndap nda bhian mbuan, hu dahlau dom kein lagaih. Tapa sa tukvak, dom ndap nda daok gaok kan kandah kayua pasiam veik tanut ba tabiak. Hadei tuk pasiam saong hu tacei ba di dom gah ye meda salah blaoh, hu ginup tanut piah mbaoh tangin.”

Luac bruk ngak padang palei pala bahrau, Dong Nai tuk halei jeng lac sa dalam dom tinh nao dahlau dalam negar. Dahlau tuk pagam tinh, ban, dalam tinh hu 114/116 xa hu mbaoh tangin brei angan palei pala bahrau paglaong; hu 43 xa mek hu palei pala ngak nong bahrau kieu mau. Tui pato tacei di Trung uong, tukvak thun 2021 – 2025 anak meta brei padeih taong yaom ka bruk brei mbaoh tangin. Kayua nan, bruk peih praong dom xa mek hu tanut daok hu pataom caik ka tukvak hadei 2025.

Amuk Nguyễn Thị Hoàng -Urang jakar tinh Dong Nai brei thau, tinh daok padang jalan ngak neh rabha xa tui tanut piah hu jalan ngak daong ka njauk lagaih. Bruk buh jien tame oh ngak grauk rilo labik, bo brei caik ngak dahlau ka dom xa hu prein ngak dalam bruk salih lek taka so, ngak nong ilamo kong nghe glaong, alam langik atau bruk daok dang mbang ngui di rahra.

“Dong Nai ngak palei pala bahrau dalam hatai srap gap ngak, kham merat, ngak ka tathak. Tal ini, mbaok meta palei pala bahrau di Dong Nai hu salih biak rilo. Jalan mbak, gom truac, sang bac saong balai hu buh jien tame, raidiuk rahra hu paglaong.”

Tukvak anak tal, dom bhum palei dalam tinh salih tapa bruk ngak bahrau, karo kajap jang dalam padang palei pala bahrau. Dom xa hu kein lagaih ka gah ngak nong, ngak kong sit atau jitvu mayao mayit palei pala daok hu pachreih patagok bruk OCOP, kinh te pambuak bruk saong dom bruk ngak kong payeng. Maong gilac tanut ka palei pala bahrau dalam Sarak di Nyaom roya Ndang bo tinh, tal ini Dong Nai mek hu rilo jak jeng, dalam nan, rahra hu mbang tui jak jeng biak siam lagaih.