Dak ramik dom kalaok aia danko tagok kadai meyaih khan pandap panda di Harei nyaom, ayut Nguyễn Kim Trọng, sinh vien Sang bac Trung cap Mekong (quan Bình Thủy) khan brei thau, danak dak Aia danko sang Trọng di ayut bahrau mek hu brei mayaom harak dang akaok di mbang pakacah Roh duah urang naih gheih peih bruk ngak mbang salih bahrau hadah krah ban Can Tho. Danak dak brei tal pabak brei anek danko pajaih, ilamu ky thuat saong dom janih pandap panda hu ngak tabiak meng danko tui jalan siam gheih. Ini lac jalan raong anek danko mbuan taom gaok, mbuan peih ngak, jien buh tame ngak takik saong pandap panda ngak tabiak mboh taong abih lac tu nhien:

“Hu mbaok tame Harei nyaom adei ba mai di ini dua janih pandap ieu lac aia danko bingu baoh darang saong aia danko tràm. Aia danko bingu darang hu peih ngak mai meng dom bein darang biak karei di bhum ĐBSCL nan lac darang xuong; Aia danko tràm hu peih ngak mai meng dom glai tram diuk aia di Láng Sen – Lung Ngọc Hoàng. Dua janih pandap ini di adei ieu lac ia danko dalam glai nan ye adei tok hu ngak dom pakuang piah anek danko mai kandauk, hadei di nan anek danko nao duah njuk mek mật meng glai ram mai saong adei mek aia danko meng dom baoh thùng danko nan, oh brei ka nyu mbang hagait.”

Nao yeng vil sa mbang rivang iek dom baoh kadai di Harei nyaom, ye mong mboh hu 20 baoh kajang prai yaih iek pandap panda, dana dak mek hu harak mayaom dalam dom mbang pakacah peih bruk ngak mbang thun 2024, dalam nan mbluak di abih ieu lac dom gah yau: ngak kong khao tin, ngak tabiak pandap panda, ndap nda ngak gheih,... Tui urang dang ngak, dom danak dak, hatai saneng peih bruk ngak mbang, salih bahrau hadah krah saong panduan salih số di yaok urang – kapul nyaom hu meyaih khan, parang iek di harei nyaom meda hu taom gaok nao mai, pambuak bruk haong dom urang buh jien tame ngak, dom urang ilamo. Sa-ai Nguyễn Xuân Đào, mai meng quan doan Bình Thủy brei thau:

“Khaol dahlak hu mbaok tame daoh kadha dua urang daoh “Can Tho angaok ar ala gilai”, makna di nyu lac pok meyaom ban, abih di nyu ieu lac tapen kraong Ninh Kiều saong hatuang hatian di bhap bani labik ini. Dahlak mboh biak bui sambai, dom kapul nyaom pakacah kuhria caga biak siam gheih. Harei nyaom gam ba brei mblang ma-in ka dam dara, gam pathau meyaih khan Can Tho ka tuai damuai saong dom puk palei karei.”

Tui sa-ai Đỗ Thị Ngọc Duy, Phaok akaok Kapul nyaom dam dara VN Ban Can Tho, Harei nyaom nan ieu lac sa kadah di dalam dom bruk ngak prong piah jhul patagok hatai saneng salih bahrau hadah krah, patagok ilamu, cong nghe, panduan salih lek taka saong cak rok patagok jalan padang peih bruk ngak mbang dalam ban. Nao gam haong dam dara dalam bruk peih bruk ngak mbang, tukvak anak tal, dom pakat bo Doan – Kapul nyaom patui veik peih ngak rilo bruk ngak daong ba dom ayut sahabat ranaih dalam bruk peih ngak bruk ngak mbang. Pagap yau: tư vấn, daong peih ngak bruk pablei salih, pathau khan brei taom gaok phun jien mesre, daong pato tacei saong panduan jao ilamu kỹ thuật ka dam dara…

“Dam dara, anek saih, sinh vien, hu mbaok tame Harei nyaom daok hu ba drei tame baoh kajang pato peih radaih siam mekre, pato pathram ilamu peih radaih – ndik radaih angaok jalan saong ilamu ndom puac anak bol bhap rahra. Caong khin tapa dom bruk ngak di Harei nyaom meda patagok hu hatai saneng peih buk ngak mbang, hatai rik daong di dam dara, ngak jeng sa kadha piah ka dom ayut sahabat patagok hu pren khang di drei.” 

Tui harak pathau khan di UBND Ban Can Tho, urak ini hu 23 kapul nyaom/jabat hu mbaok tame khik iek, peih ngak dom bruk ngak daong ba peih bruk ngak mbang salih bahrau hadah krah dalam ban. Hu 2 kadung jien brei ka bruk peih bruk ngak mbang hu padang tagok, daok peih ngak nan lac: Kadung jien brei ka bruk peih bruk ngak mbang FUNDGO kayua Kongti Co phan TRUSTpay khik iek saong Kadung jien buh tame ngak kayua kapul nyaom dom urang buh jien tame ngak mbang dalam majam talei peih bruk ngak mbang MeKong dak padang.

Ngan haong hatai saneng kham merat glong, halar hatian brei ka bruk ngak brei hatai caong khin jeng bruk ngak biak, Harei nyaom “Dam dara Can Tho – Youthfest” thun 2024 oh lac mbang ma-in piah ka dom ayut ranaih brei mboh pren khang di drei, klah rabha dom jalan saneng bahrau, bo daok lac labik pambuak pagam haong kadung jien buh tame ngak, dom kapul nyaom, jabat, ngak brei jhul patagok bruk peih ngak mbang dak harei dak prong abih./.