Meng subuh awal, Pasak bhian bac Chu Văn An (Quận 5) mboh hu ralo amaik ame saih mai pang haong blei harak gar ka anek tame bac. Thun bac 2024-2025, Pasak bac pilih mek 450 anek saih tame bac tal 10, khin anek saih di drei hu prein meng bac mbiak, kambuan khanat tagok meng ganap ba tame sang bac.

Gia An (Quận 8) haong amaik di drei brei buh harak tame Pasak ini brei thau lac, adei pacah tame tal bac 10 min tapi druh bih 3 janih khin caong. An pakacah mek hu 12 tanut điểm, dalam nan bier di abih di nyu hu 12,25 tanut ndiam, daok janih 1 glang labaih 2 điểm:“Tuk hu brei thau adei tatuak drei, kayua adei saneng lac tanut mek tame mada trun yaom min tapi nyu tagok glaong 2 điểm. Adei bac janih bhian bac kayua yau nan ye pilih sang bac ini piah bac gam haong saong ayut sahabat. Bac bih tal 12 adei pilih jalan nao ngak”)

Oh lac dom anek saih druh bambang tame tal bac 10 sang bac nagar, jeng mboh hu ralo anek saih oh pacah tame tal bac 10 bo pilih sang bac bruk ngak hadei di bac pakat THCS.

Dak tame prein bac naik joi mintapi Ngọc Huỳnh (Quận 11) oh pacah tame tal bac 10 bo lakau harak bac di Pasak bac bhian bac dan haong bac gah Jru Dược sĩ. Ngọc Huỳnh lac, kayua khin ngak gru pato, yau nan ye hadei di bac 3 di Pasak bac bhian bac, adei mada buh harak brei plih tame bac Univesiti tau Bac pakat glaong Cao đẳng mayah mboh hatai khin:“adei mboh gac bac bhian bac drei gam bac ilamu gam bac bruk ngak, jalan nan lagaih brei ka adei. Adei tui bac kayua tamat bac blaoh, adei nao ngak hu”)

Urak ini, bruk bac di dom Pasak bac bhian oh karei hagait di bac THPT. Dom sang bac trung cấp, cao đẳng jeng pambuak haong dom Pasak bac bhian piah pato ilamu, khik ngak yau habar gam bac bruk ngak, gam mada hadei tamat  THPT hadei di nan.

Thun bac barau, Pasak bac bhian Chu Văn An jeng hu pambuak haong 7 sang bac trung cấp, cao đẳng piah bac bruk ngak oh mek jien brei urang bac, gam haong 9 janih bruk ngak tui hatai khin caong dalam rai diuk yau ye Gah Jru, Gah kadai mbang manyum haong hotel, gah ngak kong khautin, ieik glang pasiam rup siah, bac sap Cina, ieik glang yte; pakatih kế toán, jang ngak sang danaok haong ba urang jirah main.

Ông Lê Văn Chương, Phó Akaok Pasak brei thau lac, tal ini Pasak bac bhian pilih hu blaoh 60% urang bac brei ka thun bac barau, mayah ganap, Pasak bac bhian mada brei gam mek awal. Langiu di nan mayah urang bac kan daman Pasak bac bhian mada brei daong jien bac:“Di labik ini khol hulin dalak brei bac danak giáo dục phổ thông 2018, oh brei klak taka bac halei. Khol hulin jeng khan brei ka urang bac thau, hadei 3 thun brei pacah 1 angan, harak tamat bac oh caik angan giáo dục thường xuyên. Khol hulin dahalak khin caong urang paham tahu barau brei ka Pasak bac bhian”.

Dreih yau nan, di sang bac Cao đẳng công nghệ Thủ Đức, thun ini bac trung cấp di sang bac hu 270 chỉ tiêu dan pilih hu labaih 80%. Kuhria lac ganap janih bac halei drei padeih mek urang bac gah bac nan. Urang bac pilih ralo yau ye gah Công nghệ kỹ thuật ô tô, điện công nghiệp haong dân dụng, eik glang kadai mbang manyum. Gam haong uarng bac gah trung cấp, urang bac hu brei oh mek jien gam daok bac ilamu haong bac bruk ngak.  Ong Triều brei khan lac:“Hu ralo janih kein brei urang bac meng urang ngak mbang dalam tal langiu nagar. Urang ngak mbang blei salih jeng daong urang bac blaoh hadei tamat bac. Tui urang bac gah pakat trung cấp sang bac jeng daong urang bac pambuak bac tagok cao đẳng”. 

Thun ini, B. HCM hu 98.000 saih pacah tagok tal bac 10 sang bac nagar, khin hu tame 77.300 urang bac. Labaih 21.000 anek saih oh gam mada pilih tame sang bac taeng, Pasak bac bhian, bac bruk ngak tui hatai urang bac./.