Sơn mài lac sa dalam dom bruk ngak meng tangin hu meng kan mai di  Đất Thủ - Bình Dương. Meng hatai hadah krah di dom nghệ nhân, pandap panda sơn mài Bình Dương njauk hatai takre di dom urang blei pandar dalam negar saong dom negar karei angaok dunya. Hadei di labaih 100 thun dak padang saong cak rok patagok, jeng yau dom bruk ngak meng kan karei, bruk ngak sơn mài Tương Bình Hiệp dak harei dak takik nao. 

Thun 2016 bruk ngak sơn mài Tương Bình Hiệp hu Mintri Ilamu-Thể thao saong Du lịch pok brei angan lac Inem krung ilamu oh mboh di mata pakat negar. Tal thun 2017, Bình Dương daok brei padang Danak dak “Khik ramik saong patagok palei ngak sơn mài Tương Bình Hiệp pambuak haong du lịch”. Yau nan min, tal urak ini, danak dak jeng oh ka hu peih tabiak, ngak ka dom nghệ nhân duh hatai. Họa sĩ Nguyễn Văn Quý, Phaok akaok kapul sơn mài tỉnh Bình Dương caong lac, danak dak brei samar hu peih ngak piah khik ramik palei ngak: “Hadei di tuk Danak dak hu padang tabiak, langiu di peih bruk pablei salih, dom bruk ngak tabiak pandap pablei salih ye bruk pato pakai jeng njauk ba tame. Bruk ngak biak karei ye urang patui khik  jeng oh meda kurang hu, nyu brei hu bruk patui veik gam gam. Kayua yau nan ye, njauk daa dom nghệ nhân daok trak tian haong bruk ngak ba tame pato pakai di labik palei ngak”.

Bình Dương daok daneiy angan haong bruk ngak tabiak gốm sứ saong hu dom angan je praong yau Minh Long, Cường Phát, Phước Dũ Long… Pandap lam am Bình Dương hu “par glaong, par atah” tal dom negar karei angaok dunya. Yaom lac hu angan je min urak ini dom labik ngak gốm sứ di Bình Dương daok gaok kan kandah.

Bình Dương daok lac labik tamuh tabiak bruk ngak meng tangin gah Meraong yau: pak krem laa, ngak mein, pabui haluk, ta-khaok kayau, chạm trỗ, sarak pandap, ngak nhang… Dom bruk ngak meng kan ini jeng daok gaok kan kandah piah khik ramik saong cak rok patagok.

Bahrau ini, UBND tỉnh Bình Dương brei ramik veik Danak dak “Khik ramik saong cak rok patagok palei ngak sơn mài Tương Bình Hiệp pambuak haong du lịch". UBND ban daok peih ngak danak dak.  

Pambuak pagam tal bruk pato pakai bruk ngak piah hu menuac patui veik bruk ngak, Bình Dương hu ba tabiak sarak oh mek jien bac dom bruk ngak sơn mài, điêu khắc di sang bac Trung cấp Mỹ thuật- Văn hóa tỉnh. Dom sang bac pato bruk ngak jeng meda pambuak haong dom doanh nghiệp, labik ngak bruk ngak meng kan piah pato pakaii tui hatai caong khin. Ong Hồ Trúc Thanh, Phaok akaok Sở ngak nong saong patagok palei pala tỉnh brei thau, anak tal, Bình Dương peih bruk pok angan ka 40 nghệ nhân. Sở meda pambuak bruk haong dom sở brei panuac tagok UBND tỉnh patabiak dom sarak piah ka nghệ nhân hu mbaok tame pato bruk ngak:“Sở Ngak nong saong – Cak rok patagok palei pala pambuak haong Sở Lao động-Thương binh soang Xã hội ngak habar brei panuac tagok UBND jalan ngak, sarak piah ka dom nghệ nhân hu mbaok tame pato bruk ngak dalam dom danak pato bruk ngak di tỉnh piah ngak habar khik ramik patgaok yaom ilamo di nghệ nhân piah khik hu dom bruk ngak meng kan”

Bruk daong phun jien, sarak piah ka dom palei ngak meng kan, manuac urang tui bac bruk ngak meng kan hu pabak pren khang piah buh tame bruk ngak, urang par akaok tỉnh hu tacei pato dom gah brei panuac, ba tabiak jalan ngak karei langiu dom sarak di trung ương. Ong Nguyễn Văn Dành, Phaok Akaok UBND tỉnh Bình Dương ndom lac:"Tỉnh rami ramik labik cak rok patagok yau habar piah cak rok ilamu khoa học, patagok hijao, hacih sa-at, khang kajap piah khik pacang môi trường, khik ramik palei ngak tui jalan bahrau, pandar công nghệ thong tin, pandar ilamu khoa học công nghệ bahrau. Ngak habar piah ka bruk ngak meng kan hu jeng bruk ngak mbang kinh tế pambuak haong cak rok patagok du lịch".

Meda mboh lac, anak bruk pambak di kinh tế thị trường, Bình Dương daok kham merat  ngak brei medeih tagok palei ngak meng kan piah tui samu haong jalan cak rok patagok di urak ini. Bruk ngak ini oh njauk lac tok khik ramik yaom ilamo bo daok daong cak rok bruk ngak mbang KTXH di tỉnh./.