Oh hu ia hacih, bhap bini pak ini njauk pandar ia hajan, ia bingun

Labik Cầu Trá di xã Phước Hậu lac labik daok jaik palei Chất Thường, xã Phước Hậu haong palei Thái Giao, xã Phước Thái, huyện Ninh Phước, tỉnh Ninh Thuận. Labik ini atah di pasak xã 2km, hu 24 baoh sang haong labaih 100 urang. Min, meng rilo thun ini mai, bhap bini di labik ini ka oh hu ia hacih piah pandar yaok harei. Ong Trượng Ốm daok di Xã Phước Hậu, huyện Ninh Phước ndem lac: “Meng rilo thun ini mai, tui dahlak mboh,  điện ye hu siam, daok ia lac jalan nding praong nao gah barak min gah barak hu takik sang, daok gah maraong ye hu rilo sang jang, jalan katung talei meng jalan nding ia praong nduac tame lac 200-300 mét, nan ye bhap bini caong hu jalan nding ia praong piah trun manieng jien buh tame, hu ia hacih ka bhap bini, dak samar dak siam.”

Sang amuk Sử Thị Mắn daok di gah ini Cầu Trá, lac atah di jalan gah dieh oh ka tal 20 mét min caong ba ia hacih mai tal sang, amuk Mắn njauk eng drei buh jien tabiak labaih 5 triệu đồng. Raidiuk daok rilo kan kandah, nan ye sang amuk brei pandar ia bingun. Amuk Sử Thị Mắn brei thau hatai caong lac:“Mayah hu ia hacih, ye biak siam jang rilo ia bingun…”

Tui panuac khan di bhap bini daok di xã Phước Thái, huyện Ninh Phước, tapa dom mbang taom gaok ndem biai nao mai di dom urang HĐND dom pakat haong cử tri, dom thun tapa, tuk padang ngak palei pala, dom jalan nding praong piah ba ia hacih mai ka bhap bini pandar hu bak abih dom puk palei. Min, kayua bhap bini daok vil val labik Cầu Trá tuh mai gah maraong, bhap bini daok parai rai nan ye bruk buh jien tame ngak jalan nding ia praong ka oh hu sangka, pasang iek. Oh hu ia hacih, bhap bini pak ini njauk pandar ia hajan, ia bingun. Yaom lac jeng thau ia ini oh siam min bhap bini oh hu jalan pilih ruah halei karei. Ong Nguyễn Ngọc Trường, Phó akaok UBND xã Phước Thái, huyện Ninh Phước caong lac: “Dalam tuk bhap bini pandar ia yaok harei, ka 1 lac mikva nao pajeng, pajeng meng dom sang drei randap, sang gauk gar, jalan biak atah saong biak kan kandah. Ka 2 lac mikva njauk buh jien tabiak piah blei dom bình ia halang hacih piah manyum, daok ia pandar lac oh hu. Ka 3 lac urak ini, mikva pandar ia tui dom mblang hamu, tui kraong ribaong pakat 2, nan ye prein yava di mikva takik rilo jeng oh siam tuk pandar ia oh hacih,kayua yau nan ye caong lac samar sangka, ruah duah, padang ngak jalan nding ia praong piah ka bhap bini hu jalan ia ba mai tal sang piah pandar. “

Harei 06/01/2022, UBND xã Phước Thái pambuak haong Jabat ngak nong saong patagok palei pala huyện Ninh Phước hu  pasang iek bruk caong pandar ia hacih piah pabak ka 24 baoh sang daok vil val labik Cầu Trá piah likau UBND huyện Ninh Phước samar brei buh jien piah ngak, samar ba ia mai ka bhap bini pandar. Tapa pasang iek mboh lac, labik ini tok peih praong sa gah jalan nding ia praong di labik Cầu Trá tuh mai gah maraong lac bhap bini meda ba ia mai tal sang. Hadei di tuk pasang iek, caong lac ia hacih samar hu ba mai piah daong ka bhap bini labik Cầu Trá saong dom labik daok vil val hu ia hacih piah pandar./. 

Urang lang: Thu Thao - 28/02