Caga ka thun bac bahrau 2023-2024 ini, di rilo bhum bhap bini Khmer dalam tỉnh daok hu ba rilo sang bac bahrau tame pandar, ba mai bui sambai chreih chrai ka gru saong saih, ka dom amaik ame di anek saih lac bhap bini bangsa Khmer. Kadha vak di urang vak Thạch Hồng brei thau ka bruk chreih chrai kuhria caga ka thun bac bahrau di bhum bhap bini Khmer tỉnh Sóc Trăng:

Hadei di rilo thun pato saong bac di dom labik pato sit sot kurang mblang me-in, labik pato mbaih mbaoh, kurang pandap pato saong bac, yam tame thun bac bahrau 2023-2024 ini, labaih 300 adei anek saih bangsa Khmer di sang bac Tiểu học Thuận Hưng A, xã Thuận Hưng, huyện Mỹ Tú hu bui sambai khang tuk hu tỉnh sangka buh jien padang ngak baoh sang bac bahrau, praong, gheih, mekre.

Anai gru Sơn Thị Vành Đa, Hiệu trưởng sang bac khan lac, sang bac hu padang ngak di angaok taneh praong jaik 7.000m2, hu 12 bilik bac, 13 bilik bộ môn, duk ngak bruk… haong paga pacang vil val, mblang me-in gheih, mekre, yaom jien ngak abih jaik 15 tỷ đồng. Tapa nan hu daong ka sang bac khik kajap bilik bac 2 jala sa harei. Anai gru Vành Đa brei thau: "Thun ini urang jakar, gru pato di sang bac saong amaik ame di anek saih uan tabuan lo tuk hu tame bac ta-a di sang bac bahrau, dom adei pataom tame sa labik, ka sa lac hu bilik bac ginup abih piah khik kajap bruk bac 2 jala sa harei, njauk tui danak dak phổ thông, ka 2 lac hu bilik bộ môn piah pato pakai, hu labik ka urang jakar, gru pato ngak bruk saong mblang me-in brei ka dom adei anek saih".

Jeng hu buh jien padang ngak sang bac bahrau, pabak siam ka bruk pato saong bac, gru Lâm Hùng, Phó Hiệu trưởng Sang bac Tiểu học Phú Mỹ C, xã Phú Mỹ, huyện Mỹ Tú brei thau, sang bac hu labaih 400 anek saih lac urang bangsa Khmer tui bac. Meng bruk sangka padang ngak sang bac gheih mekre, ba bui sambai ka gru pato, ka anek saih saong dom amaik ame, taong abih jeng caong lac, bruk bac ta-a di sang bac daok hu paglaong tagok: "Hu baoh sang bac bahrau yau hu pabak prein bahrau, meng nan, pakhang hatai jia, ba bui sambai ka amaik ame di anek saih saong mikva dalam palei, abih di nyu lac pachreih ba ka bruk pato saong bac ka gru pato saong dom adei anek saih".

Dalam dom thun tapa, huyện Mỹ Tú biak sangka buh jien padang ngak dom labik bac ta-a. Tui nan, rilo tal bac, rilo sang bac hu ramik ngak, padang bahrau gheih mekre, dak harei dak pabak siam bruk bac ta-a di dom adei anek saih. Urak ini, langiu di 2 sang bac Tiểu học Phú Mỹ C saong sang bac Tiểu học Thuận Hưng A hu ngak bahrau haong yaom jien jaik 30 tỷ đồng, dalam huyện daok hu sang bac Trung học cơ sở Thuận Hưng jeng daok hu buh jien tame padang ngak bahrau. Urak ini, baoh sang bac ini hu ngak salah dom labik chức năng, kuhria ba tame pandar dalam bilan 9 tal, daok bilik bac meda hu ngak salah di akaok thun 2024. Taphia nan, huyện daok buh tabiak yaok tỷ đồng piah ngak pasiam rilo labik sang bac sit, blei pabak pandap panda, komputer, bàn ghế, tivi piah pabak ka bruk pato bac. Ong Nguyễn Thanh Phong, Phaok akaok UB bhap bini huyện Mỹ Tú brei thau: "Meng jien di kadung jien karja huyện saong jien di gah angaok buh tame ngak, dak harei dak padang ngak brei khang kajap sang bac, tal bac. Caga ka thun bac bahrau ini, urak ini, huyện uỷ, UB jeng hu tacei pato gah pato megru pasang iek veik sang bac, tal bac piah samar ngak pasiam pabak ka thun bac bahrau, gam haong nan, dom sang bac bahrau daok hu padang ngak, jeng jhul samar tukvak ngak piah ba tame pandar njauk di tuk tame thun bac bahrau".

Meng phun jien di danak dak bruk ngak negar patagok KTXH bhum bhap bini bangsa takik, tỉnh Sóc Trăng hu sangka buh tame ngak labik bac, blei pandap panda bac ta-a ka dom sang bac bangsa gam bac gam daok. Sang bac Trung học cơ sở bangsa gam bac gam daok Long Phú, huyện Long Phú lac sa dalam 5 sang bac hu padang ngak pabak tame, pasiam cơ sở vật chất, pandap pato bac….haong 10 duk ký túc xá hu ngak bahrau, 25 duk ký túc xá klak hu ngak pasiam veik, ginup labik daok ka taong abih anek saih, oh daok lac ginup ka 70% yau dahlau daih. Langiu di nan, sang bac daok hu ngak bahrau labik hành chính, ngak pasiam veik 8 duk bac, labik mbang huak, jaman, daong ka anek saih hu labik mbang, daok, labik me-in, labik bac ta-a siam lagaih jang, rik daong praong dalam bruk paglaong chất lượng pato saong bac di sang bac dalam thun bac bahrau. Ong Liêng Hiền Sư, Hiệu trưởng sang bac brei thau: " Drei hu labik pato hu ngak pasiam veik lac biak chreih chrai, ngan saong anek saih jeng yau nan, labik mbang, labik daok hacih sa-at, gheih mekre jang. Labik pato, labik bac meng hu ngak pasiam veik jeng pabk hu ginup pandap pato pakai dalam duk bilik".

Bruk pato megru bhum bhap bini bangsa takik biak hu tỉnh Sóc Trăng sangka saong maong ini lac jalan praong piah paglaong akaok sahneng, pato pakai menuac ngak hu ilamu glaong pabak ka bruk cakrok patagok KTXH bhum bhap bini bangsa takik saong di tỉnh. Tui Sở Pato Megru tỉnh Sóc Trăng, urak ini, chất lượng pato pakai bhum bhap bini bangsa takik hu salih bahrau biak siam, khik ginup bruk hu mbaok tui bac di anek saih, bruk klaak bac trun daok takik, anek saih bac tamat Trung học cơ sở, Trung học phổ thông yaok thun hu meng 99%  tal 100%. 

Ong Danh Hoàng Nguyên, Phaok Yam ndok Sở Pato Megru tỉnh Sóc Trăng khan lac, meng thun 2021, gah Pato Megru  tỉnh hu mbang tui danak dak bruk ngak negar patagok KTXH bhum bhap bini bangsa takik, dalam nan hu 3 asal kadha di danak dak sit ka 1 dalam danak dak 5, lac pakhang, patagok dom sang bac Phổ thông Bangsa gam bac gam daok saong palahik bruk oh thau kahar haroh ka bhap bini bhum bangsa takik. Dalam tỉnh hu 7 sang bac Phổ thông bangsa gam bac gam daok hu mbang tui bruk ramik ngak pasiam cơ sở vật chất haong phun jien buh tame ngak jaik 122 tỷ đồng: "Urak ini, cơ sở vật chất di dom sang bac jeng hu khang kajap, kol drei oh daok sang bac, tal bac tạm, meng bruk buh jien tame padang ngak yau nan, mbiah tal tukvak ini, dom sang bac mek hu chuẩn pakat negar dalam tỉnh lac 82%".

Rilo tal bac, sang bac hu ramik ngak, padang bahrau gheih mekre, dak harei dak pabak siam bruk pato pakai saong bac ta-a di gru pato, di dom anek saih bangsa Khmer jeng yau ka anek saih dalam tỉnh. Meng bruk kham merat nan, tỉnh Sóc Trăng caong lac, daok hu rik daong paglaong chất lượng pato megru di tỉnh dalam thun bac bahrau ini./.