Daok metian anek bilan ka 7 min sa-ai Đinh Thị Minh, urang ngak di Cty Giày da Tài Lộc (phường Trường Thạnh, ban Thủ Đức, ban raya HCM) jeng biak chreih chrai hu ngak tăng ca haong dom urang ngak haong gauk. Sa-ai Minh brei thau, tuk Tết meng blaoh, Cty hu bayar jien bilan 13 saong daok hu lì xì ka urang ngak. Tết blaoh, mehit Cty hu biak rilo bruk, nan ye brei tăng ca meng bilan 3, urang ngak thei jeng uan tabuan. Kayua lac duk haong labik karei, bruk ngak pak ini tani tanat, doanh nghiệp sangka kuhria ka raidiuk di urang ngak. Jien bilan di sa-ai Minh, gam haong jien tăng ca jeng hu 12-13 triệu đồng sa bilan:“Harei halei glaih adei likau mai sang, daok harei halei oh glaih ye adei daok veik tăng ca. Drei metian min mboh bingi dalam rup nan ye daok veik tăng ca duah jien. Drei metian anek jeng hu brei padeih 1 mon, nan ye meyah drei tăng ca jeng hu labaih hasit jien ndo”.

Daok sa-ai Cao Kiều Tiên lac urang ngak di Cty TNHH may mặc Triple Việt Nam (xã Tân Thạnh Đông, huyện Củ Chi) brei thau,  Cty hu bruk ngak rilo, urang ngak hu tăng ca lac bruk bui sambai, patuah jamo. Dahlau nan, kayua gaok kan kandah, sa-ai Tiên likau padeih hadei di 14 thun ngak bruk di Cty piah mai palei iek amaik taha ruak kik. Urak ini sa-ai mai ngak bruk veik hu 6 bilan, jeng daok hu mbang rilo phúc lợi meng công ty: “Cty thưởng năng suất glaong. Pak ini ngak rilo ye năng suất glaong nan ye kol adei chreih chrai lo. Abih gauk dalam chuyền may jeng tagok năng suất biak glaong, thei jeng kham merat piah tagok năng suất. Tuk halei mban giám đốc jeng hu pandap brei kol adei ngak nan ye oh mai sang sớm. tapa nan kinh tế di adei hu tani tanat, kayua adei hu 2 urang anek daok bac pakat 2 nan ye jien ndo mbang bac ka kol nyu jeng biak rilo”.

Amuk Huang Hsu Chuan, Tổng xưởng trưởng Cty TNHH May mặc Triple Việt Nam (huyện Củ Chi, TP.HCM) brei thau, urak ini Cty hu 1.700 urang ngak. Meng pandap ngak hu rilo yau urak ini, Cty daok pilih ruah 300 urang ngak piah pabak ginup pandap ka gah pambuak bruk.

Bruk njauk biai nan lac, Cty pataom tame pilih ruah saong khik takai urang ngak hu tangin gheih ngak piah samar pabak pandap ka gah blei pandap, gam haong nan, ngak jeng sa doanh nghiệp chất lượng glaong. Doanh nghiệp patagok bruk ngak hadei di Tết, taduan raok đơn hàng bahrau, labik blei bahrau daok brei mboh lac hu rilo siam mekre.

Di Cty TNHH may Oasis, huyện Củ Chi, TP.HCM, dom đơn hàng dahlau daih hu mai veik tal abih thun 2024. Cty bahrau pilih ruah jaik 40 urang ngak piah peih chuyền bahrau, ngak dom đơn hàng bahrau. Oasis brei thau, Cty tuk halei jeng sangka tal raidiuk di urang ngak, iek praong iek glaong urang ngak. Cty brei khik veik dahlau dom urang ngak klak piah pandar dom menuac ngak bhian randap haong bruk ngak, hu tangin gheih ngak, pabak hu bruk ngak:“Doanh nghiệp saong urang ngak jeng hu dom kan kandah karei. Urang ngak jeng caong hu sa bruk ngak atau lac mai veik haong sang di drei, daok doanh nghiệp jeng caong khik takai urang piah hu dom menuac ngak hu tangin gheih ngak. Nan ye kol dahlak tuk halei jeng duah jalan ngak halei nan atau sangka tal urang ngak rilo jang piah urang mboh lac ini baoh sang ka 2 di urang, tuk nan, urang meng daok veik haong kol dahlak”.

Tui mBan khik ramik Dom labik chế xuất saong ngak kong TP.HCM, thun blaoh, rilo doanh nghiệp gaok kan gah đơn hàng nan ye jien bilan di urang ngak trun biar. Thun ini, rilo urang ngak caong khik bruk ngak urak ini, oh daok khin chat bruk hadei Tết yau dahlau daih nan ye urang ngak di doanh nghiệp hu tani tanat. Dom bilan akaok thun, rilo doanh nghiệp di dom labik ngak kong di TP pilih ruah labaih 10.500 urang ngak piah pabak ka bruk ngak di drei./.