Khan ao meng kan di urang bangsa Dao Khâu bhian ngak meng tangin lahik biak ralo masa tukvak. Ta-eng tal khan ao di kumei Dao Khâu, gam tui peit dom bingula, buh dom baoh kacing di mbaok ao, pagam dom asal keim pablak tui bingula taleng kaing … lahik abih mateh thun meng blaoh. Sa-ai Tẩn Mý Xuân khan brei thau lac:

“Meng daok sit hu muk mei pato magru brei thau ngak kaya ngui cuk tui ilamu bangsa. Piah ngak hu khan ao bih biak ralo masa tukvak, prein yava meng hu. Min jien pablei oh glaong, oh ganap prein urang ngak buh tabiak”.

Mboh urak ini bruk main ilamo daok ka tamia uak di xa, di palei hu ralo jeng ye khin caong brei ngui cuk khan ao tui ilamo bangsa dak harei dak ralo, sa-ai Xuân raong lavik dalam hatai saong khin peih praong bruk peit jhik kaya ngui khan ao bahrau tui ilamo bangsa di palei:

“Ngak bahrau, ngak ka gheih karei kaya ngui khan ao bangsa Dao Khâu hu pabam lavik di dalam hatai anit ranam brei ka ialmo khan ao bangsa jeng ye hatai chreih saong bruk peit menyim. Hatai asal kadha di drei ieu lac caong khin brei jumpataom gauk khik ramik caga ilamo bangsa, jeng ye khin caong ba kaya ngui ialamo bangsa tabiak darak pasar ralo jang, paralo jien tame brei ka drei jeng ye ka adei sa-ai kumei bangsa Dao."

Piah ngak hu bruk ini, sa-ai Tẩn Mý Xuân dak ndap nda kaya kan palei, hadei di nan ngak jeng ndap nda kaya ngui bahrau di drei. Brei patanak bruk ngak kaya ngui cuk bangsa Dao, nai Xuân padang kapul peit menyim dalam nan hu dom adei sa-ai ngak tanyiak kak akaok, kapul dom adei sa-ai peit tarapha, kapul adei sa-ai ngak ao. Khan ao ngak tabiak yau habar njauk dreih khan ao tui ilamo kaya ngui tui bangsa, khik dreih bingula yau meng kal, mbuan sahnang pandar tui jaman bahrau. Muk Chẻo Mý Lù, daok di xã Phăng Xô Lin, huyen Sìn Hồ, tinh Lai Châu lac: Gam saong ralo janih kaya ngui, gheih mata, yaom kaom lap, ndap nda kaya ngui ngak bahrau di sa-ai Xuân hu urang bangsa  Dao Khâu dom xa, takre mek ba:

“Dahlau diah ngak jeng khan ao tui bangsa Dao Khâu lahik bih ralo masa tukvak. Kaya ngui khan ao bahrau mboh gheih ghang. Kaya ngui khan ao dahlau yaom jien labaih sa pluh trieu dong, hadei ngak bahrau yaom kaom nyu lagaih jang, kaya ngui di adei sa-ai kumei yaom neng dua tal kalu trieu dong”.

Oh sa janih khik ramik brei ka kaya ngui tui ilamo bangsa Dao Khâu, urak ini kadai kaya khan ao di sa-ai Tẩn Mý Xuân dak daong ka labai 5 adei sa-ai kumei hu jien 5 trieu dong sa bilan. Sa-ai Tẩn Phàn Mẩy daok di Tả Phìn, ban Sìn Hồ, tinh Lai Châu khan mayai lac, gait biak uan tabuan kayua hu daong tame bruk khik ramik ilamo kaya ngui bangsa.

“Dahlak hulin sahneng lac bruk khik ramik ilamo bangsa oh lac janih biak kan, drei khik hu dom hagaik nyu lagaih saong ilamu bahrau, dom hagait lagaih dalam bruk mbuan pandar. Sa-ai Xuân padang jeng ye buh ralo prein yava ngak tabiak kaya khan ao bangsa Dao. Di dalam masa meng anak khol drei mada patui ngak tabiak dom kaya ngui bahrau brei ka ralo urang takre urang khin pandar jang, dalam nan duah hu ralo jien mek tame brei ka adei sa-ai jeng ye brei khik ramik caga ilamo bruk ngak brei ka bruk peit mayim di bangsa”./.