Tukvak tapa, bruk ngak ini hu tỉnh Bà Rịa- Vũng Tàu jhul khang peih ngak, pabak bruk ngak harak gar hu samar drah, mbuan lagaih ka menuac urang, kapul nyaom tapa bruk giao dịch điện tử.  Kadha vak di Lưu Sơn, urang vak di rayo sap ndom VN daok di TP.HCM hu ndom ka bruk ini:

Ong Đỗ Văn Khuê, daok di phường Phước Hiệp, TP Bà Rịa mai ngak harak taneh riya di  labik sa pabah mbang pakat huyện brei thau, menuac ngak di labik sa pabah mbang hu tacei pato cambaih laih bruk nộp harak gar, mbuan thau saong biak lagaih tuk ngak: "Biak mbuan lagaih, rahra kol dahlak meng dahlau mai oh thau hagait ka bruk taneh riya, min gah Tài nguyên & môi trường khan brei thau ginup abih di sa pabah mbang ye rahra kol dahlak thau hu abih ka bruk taneh riya di tỉnh. Sang dahlak thau hu abih ka bruk taneh riya,  quy hoạch yau habar".

Thun 2016, tỉnh Bà Rịa- Vũng Tàu hu ba tabiak ngak dịch vụ công online samu gauk di 3 pakat lac tỉnh, huyện saong xã. Tal thun 2019, Pabah mbang brei thau bruk hành chính công di tỉnh jeng hu ramik veik ka nyu lagaih haong bruk bahrau, tacei pato bahrau di Rajaei, rik daong palgaih ka rahra, ka doanh nghiệp pandar dom bruk hành chính công.

Meng bilan 5/2022, taong abih harak gar adat cambat hành chính dalam jabat Karja di dom huyện, thị, ban di Bà Rịa- Vũng Tàu hu ngak tui jalan online tapa Pabah mbang dịch vụ công di tỉnh, oh nộp harak gar tapak di Pasak Duh ka bruk hành chính công saong labik sa pabah mbang dom pakat, langiu di dom bruk oh ka hu pabak dịch vụ công online pakat 3, 4.

 Di ban Vũng Tàu, tal urak ini, taong abih UBND xã, phường hu pambuak tame dalam dịch vụ hành chính công online. Tui ong Huỳnh Xuân Hoà, Phó Trưởng phòng Nội vụ, ban Vũng Tàu, ban hu pabak taong abih dịch vụ công pakat 3, 4, ba mbuan lagaih ka rahra saong dom kapul nyaom: " Kol dahlak ngak khang bruk langyah harak gar tapa harei sanya saong pabak dịch vụ công pakat 3, 4 ka dom kapul nyaom, rahra caong ngak. Ban brei pataom jamriak mac moc bahrau piah ngak bruk chuyển đổi số pambuak haong salih bahrau hành chính".

Tal tukvak ini, tỉnh Bà Rịa- Vũng Tàu meda lac pabak hu ginup mac moc jamriak, labik duh ka dịch vụ công online. Tỉnh hu ba labaih 360 thủ tục hành chính tagok Cơ sở dữ liệu pakat negar ka  adat ngak harak gar di Pabah mbang Dịch vụ công taneh ia. Tỉnh hu ngak saong pasang iek labaih 350 dịch vụ công pakat 4 tagok Pabah mbang Dịch vụ công pakat negar piah ka Jabat Rajaei brei thau, taduan mek saong langyah labaih 72.500 harak gar online.

Bà Rịa-Vũng Tàu urak ini hu pabak online jaik 2.000 adat ngak harak gar, dalam nan labaih 350 adat pakat 3; labaih 1.500 adat pakat 4 (langiu di dom adat dalam gah taduan rahra, langyah khiếu nại, tố cáo, pacang caga tham nhũng).

Amuk Nguyễn Thị Huệ, Akaok Jabat Salih bahrau adat ngak harak gar saong Văn thư lưu trữ, Sở Nội vụ tỉnh Bà Rịa- Vũng Tàu brei thau: "UBND tỉnh hu ieu taong abih dom jabat brei pataom tame dom jalan ngak parilo dom harak gar hồ sơ langyah tui jalan online. Dom puk palei hu pathau khan biak khang, pagap yau: dom tờ rơi, pano, áp phích… piah ka rahra salih bahrau jalan sahneng, salih bahrau bhian randap ngak meng tangin tapa ngak meng online".

Meda lac, salih bahrau hành chính, chuyển đổi số saong ba bruk ngak di rahra, doanh nghiệp tui jalan online di tỉnh Bà Rịa-Vũng Tàu mek hu dom jak jeng tuk camereip. Ini lac jalan nao njauk, lagaih, peih tabiak jalan nao patui di nan, rik daong peih ngak danak dak chuyển đổi số pakat negar tal thun 2025, pamaong tal thun 2030./.